.jpg)
ពលករដែលវិលត្រឡប់មកពីកូវ៉ែតបំពេញបែបបទនៅព្រលានយន្តហោះ។ AFP
ក្រុងម៉ានីលៈ ក្រុមមន្ត្រីហ្វីលីពីន ចេញដំណើរទៅទស្សនកិច្ចកូវ៉ែតនៅថ្ងៃព្រហស្បតិ៍នេះ ដើម្បីស្វះស្វែងរកការការពារសម្រាប់ក្រុមពលករចំណាកស្រុកឲ្យបានទូលំទូលាយជាងមុនក្រោយពីវិបត្តិការទូតកើតឡើងជុំវិញការចោទប្រកាន់ថាមិនមានការថែទាំពលករហ្វីលីពីន បានដិតដល់នៅក្នុងរដ្ឋឈូងសមុទ្រមួយនេះ។
រដ្ឋមន្ត្រីក្រសួងការងារលោក Silvestre Bello បានថ្លែងប្រាប់ក្រុមអ្នកកាសែតកាលពីថ្ងៃពុធថា អនុរដ្ឋមន្ត្រីម្នាក់នៃអនុរដ្ឋមន្ត្រីរបស់លោក នឹងដឹកនាំគណៈប្រតិភូនោះ ដែលគ្រោង នឹងឈប់នៅក្នុងអារ៉ាប៊ីសាអ៊ូឌីត និងកាតា ដើម្បីជំរុញឲ្យមានការកែទម្រង់។
តម្រូវការជាអាទិភាពនោះគឺថា ពលករហ្វីលីពីនគួរតែត្រូវបានអនុញ្ញាតឲ្យរក្សាទុកទូរស័ព្ទដៃ និងលិខិតឆ្លងដែនរបស់ពួកគេដែលអាចត្រូវក្រុមនិយោជកដកហូតយកទុកនោះ។
ដំណើរទស្សនកិច្ចនោះ បានកើតឡើងក្រោយពីប្រធានាធិបតីហ្វីលីពីនលោក Rodrigo Duterte កាលពីសប្តាហ៍មុនបានប្រកាសពីបម្រាមមិនឲ្យចាកចេញសម្រាប់ពលរដ្ឋហ្វីលីពីនដែលមានគម្រោងទៅធ្វើការនៅប្រទេសកូវ៉ែត។
លោក បានឆ្លើយចំពោះការសម្លាប់ស្ត្រីអ្នកបម្រើហ្វីលីពីនដែលសាកសពរបស់ជនរងគ្រោះត្រូវបានរកឃើញនៅក្នុងទូក្លាស្សេមួយនៅក្នុងប្រទេសកូវ៉ែតនៅខែនេះ។
កម្រាមរបស់លោក Duterte បានធ្វើឲ្យមានជម្លោះការទូតមួយរវាងប្រទេសហ្វីលីពីន និងរដ្ឋឈូងសមុទ្រមួយនេះខណៈលោកបានចោទប្រកាន់ក្រុម និយោជកអារ៉ាប់ថា បានចាប់រំលោភពលករហ្វីលីពីន បង្ខំឲ្យពួកគេធ្វើការរហូតដល់ទៅ ២១ ម៉ោងក្នុងមួយថ្ងៃ និងផ្តល់តែចំណីអាហារសំណល់ដល់ពួកគេប៉ុណ្ណោះ៕
