.jpg)
ប្រធានាធិបតី រុស្ស៊ី វ្លាឌីមៀរ ពូទីន ក្នុងខែធ្នូ បានប្រកាសការដកកងទ័ពរបស់លោកមួយចំណែកៗពីទឹកដីស៊ីរី ក្នុងខែធ្នូ។ AFP
ក្រុងម៉ូស្គូៈ ក្រុមមន្ត្រីការពារជាតិរុស្ស៊ី បានឲ្យដឹងកាលពីថ្ងៃពុធថា ដ្រូនជាច្រើនគ្រឿងដែលបានវាយប្រហារមូលដ្ឋានយោធារុស្ស៊ី នៅក្នុងទឹកដីរុស្ស៊ីកាលពីសប្តាហ៍មុន ត្រូវបានបញ្ជូនមកពីទឹកដីខេត្តអុីដលីបជា«តំបន់សុវត្ថិភាព»មួយត្រួតត្រាដោយក្រុមជនសកម្មប្រយុទ្ធប្រឆាំងរដ្ឋាភិបាល។
ខេត្តអុីដលីបបានក្លាយជាប្រភពមួយនៃភាពតានតឹងរវាងប្រទេសគាំទ្ររបបស៊ីរីគឺរុស្ស៊ីនិងប្រទេសគាំទ្រក្រុមឧទ្ទាមគឺតួកគីដោយក្រុង អង់ការ៉ា បានចោទប្រកាន់របបស៊ីរីថាបានបង្កើនការវាយប្រហាររបស់ខ្លួនទៅលើតំបន់ត្រួតត្រាដោយក្រុមឧទ្ទាមសំខាន់ៗនៅទីនោះ។
កាសែតរបស់ក្រសួងការពារជាតិឈ្មោះ Krasnaya Zvezda បានឲ្យដឹងថា៖«ដ្រូនជាច្រើនគ្រឿងត្រូវបានបញ្ជូនចេញពីតំបន់ Muazzara នៅភាគនិរតីនៃតំបន់សុវត្ថិភាពក្នុងទឹកដីខេត្តអុីដលីបត្រួតត្រាដោយក្រុមអង្គការបក្សប្រឆាំងកណ្តាលនិយម។
កាសែតនោះបានឲ្យដឹងបន្ថែមទៀតថាក្រសួងដដែលនេះបានសរសេរលិខិតទៅកាន់ក្រុមប្រមុខយោធាតួកគីនិងសេវាកម្មចារកិច្ចដើម្បីឲ្យស្នើសុំឲ្យក្រុងអង់ការ៉ាធ្វើការអនុវត្តឲ្យពេញលេញនូវកិច្ចព្រមព្រៀងបទឈប់បាញ់មួយនៅក្នុងខេត្តអុីដលីប។
ខេត្តអុីដលីបជាតំបន់មួយក្នុងចំណោមតំបន់សុវត្ថិភាពទាំង៤នៅក្នុងទឹកដីស៊ីរីដែលត្រូវបានធានារ៉ាប់រងដោយកិច្ចព្រមព្រៀងមួយធ្វើឡើងមានគោលបំណងកាត់បន្ថយអំពើហិង្សាត្រូវបានធ្វើឡើងកាលពីឆ្នាំទៅដោយតួកគី រុស្ស៊ី និងអ្នកគាំទ្ររដ្ឋាភិបាលគឺអុីរ៉ង់ (government-backerIran)។
រូបភាពបង្ហាញពីអ្វីដែលក្រសួងការពារជាតិរុស្ស៊ីនិយាយថាជា យន្តហោះ ដ្រូនវាយប្រហារ (Strike Drone) ប្រើប្រាស់អំឡុងការវាយប្រហារដោយដ្រូននាពេលថ្មីៗ ទៅលើមូលដ្ឋានយោធារបស់រុស្ស៊ី នៅក្នុងទឹកដីស៊ីរី។ រូប ហ្វេសប៊ុក ក្រសួងការពារជាតិរុស្ស៊ី (RDM)
យោងតាមប្រភពព័ត៌មានការទូតនានា បានឲ្យដឹងថា កាលពីថ្ងៃអង្គារក្រសួងការបរទេសតួកគី បានកោះហៅឯកអគ្គរដ្ឋទូត រុស្ស៊ី និង អុីរ៉ង់ ឲ្យទៅកាន់ក្រុងអង់ការ៉ា បន្ទាប់ពីបានលើកឡើងថា របបស៊ីរីមានគោលបំណងវាយប្រហារលើក្រុមកងកម្លាំងបក្សប្រឆាំងកណ្តាលនិយមនៅក្នុងទឹកដីខេត្តអុីដលីបនៅក្បែរព្រំដែនតួកគី។
រដ្ឋមន្ត្រីការបរទេសតួកគីលោក Mevlut Cavusoglu បានថ្លែងថា បញ្ហានេះអាចបំផ្លាញកិច្ចចរចានានាមានគោលបំណងបញ្ចប់សង្គ្រាមនេះ។
រុស្ស៊ីមានក្តីសង្ឃឹមជឿជាក់ថា នឹងអាចបើកកិច្ចចរចាស្វែងរកសន្តិភាពនៅស៊ីរីនៅក្នុងរមណីយដ្ឋានឆ្នេរសមុទ្រខ្មៅក្នុងទីក្រុងសូជីនៅថ្ងៃទី ២៩-៣០ ខែមករា។
កាលពីថ្ងៃចន្ទរុស្ស៊ីបានឲ្យដឹងថាដ្រូនគ្មានមនុស្សបើកជាច្រើនគ្រឿងដែលផ្ទុកដោយគ្រឿងផ្ទុះ បានវាយប្រហារលើមូលដ្ឋានយោធារុស្ស៊ីនៅក្នុងទឹកដីស៊ីរីកាលពីសប្តាហ៍មុនដោយមិនបានបង្កឲ្យមានមនុស្សស្លាប់ឬការខូចខាតអ្វីឡើយ។
បន្ទាប់ពីរយៈពេលពីរឆ្នាំនៃការគាំទ្រខាងផ្នែកយោធាពីសំណាក់រុស្ស៊ីចំពោះរបបមេដឹកនាំស៊ីរីលោកបាសារអាល់-អាសាដមក ប្រធានាធិបតីរុស្ស៊ីលោកវ្លាឌីមៀរពូទីន បានប្រកាសនៅក្នុងពាក់កណ្តាលខែធ្នូនូវការដកកងទ័ពជាចំណែកៗពីទឹកដីស៊ីរីដោយបានលើកឡើងថាបេសកកម្មរបស់ពួកគេត្រូវបានបំពេញស្ទើរទាំងស្រុង។
ទំហំនៃការដាក់ពង្រាយកងទ័ពរុស្ស៊ីសរុបនៅក្នុងទឹកដីស៊ីរីមិនទាន់ត្រូវបានបង្ហាញនៅឡើយប៉ុន្តែអ្នកជំនាញការផ្នែកយោធារុស្ស៊ីលោក Pavel Felgenhauer បានថ្លែងប្រាប់ AFP ថា កងទ័ពរុស្ស៊ី និងក្រុមទាហានជាប់កិច្ចសន្យាឯកជនប្រមាណជា ១០ ០០០ នាក់អាចបានចូលរួមបំពេញបេសកកម្មនៅក្នុងជម្លោះមួយនេះ។
តាមការប៉ាន់ប្រមាណពលរដ្ឋជាង ៣៣ ម៉ឺននាក់ត្រូវបានសម្លាប់នៅក្នុងសង្គ្រាមនៅស៊ីរីដែលបានចាប់ផ្តើមកើតឡើងក្នុងឆ្នាំ ២០១១ ខណៈរបបស៊ីរីបានធ្វើការបង្ក្រាបការតវ៉ាប្រឆាំងរដ្ឋាភិបាល។ មនុស្សរាប់លាននាក់បានបាត់បង់ផ្ទះសម្បែង៕AFP/ប្រែសម្រួលដោយសុឹម សានិត
