Search form

Login - Register | FOLLOW US ON

Logo of Phnom Penh Post newspaper Phnom Penh Post - លោកត្រាំ​ ទម្លាក់ចោល​កិច្ច​ព្រមព្រៀង​រដ្ឋពីរ​នៅ​តំបន់​មជ្ឈិមបូព៌ា

Content image - Phnom Penh Post
លោកត្រាំ (ស្តាំ) និងលោក នេតានីយ៉ា​ហ៊ូ ពិភាក្សា​នៅ​ក្នុងការិយាល័យ​ពងក្រពើ​កាល​ពីថ្ងៃពុធ។ Afp

លោកត្រាំ​ ទម្លាក់ចោល​កិច្ច​ព្រមព្រៀង​រដ្ឋពីរ​នៅ​តំបន់​មជ្ឈិមបូព៌ា

ក្រុងវ៉ាស៊ីនតោនៈ ប្រធានាធិបតី​អាមេរិក លោក​ដូណាល់ ត្រាំ ពីថ្ងៃ​ព្រហស្បតិ៍​បាន​ទុកមួយ​ឡែកនូវ​កិច្ចប្រឹងប្រែង​ពេញ​មួយឆ្នាំ​របស់​ក្រុង​វ៉ាស៊ីនតោន​សម្រាប់​ដំណោះស្រាយ​រដ្ឋពីរ​ចំពោះ​ជម្លោះ​អ៊ីស្រាអែល-ប៉ាឡេស្ទីន ដោយ​ថ្លែងថា លោក​នឹងគាំទ្រ​រដ្ឋ​តែមួយ បើសិន​គំនិត​ផ្ដួចផ្ដើម​នេះ​ពិតជា​នាំទៅរក​សន្តិភាព។

ប្រធានាធិបតី​ថ្មី​រូបនេះ​បាន​ស្វាគមន៍​នាយករដ្ឋមន្ត្រី បេនចាមីន នេតានី​យ៉ាហ៊ូ យ៉ាង​កក់ក្តៅ​មកកាន់​សេតវិមាន និងបាន​លើក​សរសើរ​ចំពោះ​ទំនាក់ទំនង​ការទូត «មិនអាច​បំបែក​បាន» រវាង ប្រទេស​របស់​ពួកគេ។

ខណៈ​បាន​ជំរុញ​លោក​នេតានី យ៉ាហ៊ូ​ឲ្យ «ដកថយ» ពីការ​សង់​លំនៅដ្ឋាន​ជ្វីហ្វ «បន្តិច» លោក​ត្រាំ បាន​ក្បត់​ការស្រុះស្រួល​មតិ​អន្តរជាតិ ដោយ​ទទូច​លើ​អនាគត ដែល​នឹង​បូករួម​នឹង​រដ្ឋប៉ាឡេស្ទីន​នៅក្បែរ​អ៊ីស្រាអែល​ដែរ។

លោកបាន​និយាយថា៖ «ដូច្នេះ ខ្ញុំ​កំពុង​ពិនិត្យមើល​រដ្ឋពីរ និងរដ្ឋ​មួយ ហើយ​ខ្ញុំ​ចូលចិត្ត​រដ្ឋមួយ ហើយ​ភាគី​ទាំងពីរ​ចូលចិត្ត។ ខ្ញុំ​រីករាយ​ណាស់​ជាមួយ​រដ្ឋមួយ ដែល​ភាគី​ទាំងពីរ​ចូលចិត្ត។ ខ្ញុំអាច​រស់នៅ​ជាមួយ​រដ្ឋ​មួយណា​ក៏បាន»។

លោកត្រាំ បាន​និយាយថា លោកធ្លាប់​បានគិត​ដំណោះស្រាយ​រដ្ឋពីរ «មើលទៅ​ដូចជា​វាអាច​កាន់តែ​ងាយ​នៃ​ភាគី​ទាំងពីរ។ ប៉ុន្ដែ​និយាយ​ដោយ​ត្រង់​ទៅ បើសិន​អ៊ីស្រាអែល និង​ប៉ាឡេស្ទីន រីករាយ ខ្ញុំរីករាយ​ជាមួយ​រដ្ឋមួយ ដែល​ពួកគេ​ចូលចិត្ត​បំផុត»។

ការផ្លាស់ប្តូរ​នេះក្នុង​ជំហរ​របស់​អាមេរិក គឺត្រូវ​បានគិតថា​ដើម្បី​តម្រូវ​ចិត្ត​លោក​នេតានីយ៉ាហ៊ូ និង​រដ្ឋាភិបាល​ស្តាំនិយម​របស់លោក។

ដោយ​បន្ទរ​ទៅនឹង​ទឡ្ហីករណ៍ របស់លោក​នេតានី​យ៉ាហ៊ូ ថា ប៉ាឡេស្ទីន​មិនទាន់​បាន​ត្រៀមខ្លួន​សម្រាប់​សន្តិភាព​នោះ លោកត្រាំ បាននិយាយថា៖ «ខ្ញុំ​គិតថា ប៉ាឡេស្ទីន​ត្រូវតែ​កម្ចាត់​ចោល​ឲ្យអស់​នូវការ​ស្អប់ខ្ពើម​ខ្លះ​ដែល​ពួកគេ​ត្រូវបាន​បង្ហាត់​បង្រៀន​តាំងពី​វ័យក្មេង​មក»។

លោក​នេតានីយ៉ាហ៊ូ មាន​ពាក្យ សម្តី​ដ៏កក់ក្តៅ​សម្រាប់​សម្ព័ន្ធភាព​អាមេរិក-អ៊ីស្រាអែល និងបាន​នាំមក​ស្រុក​វិញ នូវ​តម្រូវការ​ជាមុន​សម្រាប់​សន្តិភាព។ លោកបាន​និយាយថា៖ «ទី១ ប៉ាឡេស្ទីន​ត្រូវ​ទទួលស្គាល់​រដ្ឋជ្វីហ្វ​នេះ។ ពួកគេ​ត្រូវតែ​ឈប់
អំពាវនាវ​ឲ្យ​មានការ​កម្ទេច​ប្រទេស​អ៊ីស្រាអែល»។

«ទីពីរ នៅក្នុង​កិច្ចព្រមព្រៀង សន្តិភាព​ណា​ក៏ដោយ​អ៊ីស្រាអែល ត្រូវតែ​ទទួល​បាន​ការគ្រប់គ្រង​សន្តិសុខ​លើសលប់​លើតំបន់​ត្រើយ​ខាងលិច​ទន្លេ​ហ្សកដង់​ទាំងមូល»៕

0

Comments

Please, login or register to post a comment