ក្រុងម៉ូស្គូ: ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានថ្លែងកាលពីថ្ងៃចន្ទនៅពេលចាប់ផ្តើមបើកកិច្ចចរចាជាមួយភាគីមេដឹកនាំប៉ាឡេស្ទីនលោកម៉ាមុដ អាបាស ថា លោកបានពិភាក្សាអំពីបញ្ហជម្លោះនៅក្នុងតំបន់មជ្ឈិមបូព៌ា ជាមួយសមភាគីអាមេរិករបស់លោក គឺ លោក ដូណាល់ ត្រាំ។
លោកពូទីន បានថ្លែងប្រាប់លោកអាបាស មុនពេលបន្តបើកកិច្ចចរចាសម្ងាត់ថា៖ «ខ្ញុំបានពិភាក្សាជាមួយប្រធានាធិបតីអាមេរិកលោក ត្រាំ»។ «ពិតណាស់ យើងបានពិភាក្សាគ្នាអំពីបញ្ហាជម្លោះរវាងអ៊ីស្រាអែល និងប៉ាឡេស្ទីន»។
មេដឹកនាំប៉ាឡេស្ទីន កំពុងបំពេញទស្សនកិច្ចក្នុងក្រុងម៉ូស្គូជាកិច្ចខិតខំមួយ ដើម្បីទទួលបានការគាំទ្រពីលោក ពូទីនបន្ទាប់ពីលោក ត្រាំ បានធ្វើឲ្យក្រុមភាគីប៉ាឡេស្ទីន និងក្រុមសម្ព័ន្ធមិត្តរបស់ពួកគេ មានការខឹងក្រេវក្រោធតាមរយៈការប្រកាសទទួលស្គាល់ក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែលនោះ។
លោក ពូទីន បានថ្លែងថា៖ «ស្ថានភាពនេះ ហួសឆ្ងាយពីអ្វីមួយដែលចង់ឃើញណាស់» ដោយបានបន្ថែមថា លោកតែងបានគាំទ្រប្រជាពលរដ្ឋប៉ាឡេស្ទីន»។
លោក ពូទីន បានថ្លែងប្រាប់ភ្ញៀវរបស់លោកថា៖ «វាសំខាន់ខ្លាំងណាស់សម្រាប់យើងទាំងអស់គ្នា ដែលបានដឹងពីគំនិតយោបល់ផ្ទាល់ខ្លួនរបស់លោក ដើម្បីបញ្ជាក់ឲ្យបានច្បាស់ និងកំណត់យកដំណោះស្រាយជារួមមួយ ដើម្បីដោះស្រាយបញ្ហានេះ»។
នៅក្នុងសេចក្តីថ្លែងការណ៍ មួយ សេតវិមាន បានឲ្យដឹងថា លោក ត្រាំ បានថ្លែងប្រាប់លោកពូទីនថា៖ «ពេលនេះ ជាពេលវេលា ដើម្បីចាប់ផ្តើមធ្វើការឆ្ពោះទៅរកការធានាឲ្យមានកិច្ចព្រមព្រៀងសន្តិភាព ដែលមានចីរភាពមួយ»។
លោកអាបាស បានបដិសេធចំពោះទំនាក់ទំនងបែបណាមួយជាមួយរដ្ឋការរបស់លោកត្រាំ ចាប់តាំងពីមានសេចក្តីសម្រេចមួយពីក្រុងវ៉ាស៊ីនតោនកាលពីចុងឆ្នាំទៅ។
លោកអាបាស បានថ្លែងថា៖ «ដោយសារបរិយាកាសបង្កើតឡើងដោយសកម្មភាពរបស់អាមេរិកនោះ យើងសូមបដិសេធចំពោះកិច្ចសហប្រតិបត្តិការណាមួយជាមួយអាមេរិកក្នុងឋានៈជាអន្តរការី»។ «នៅក្នុងករណីពាក់ព័ន្ធកិច្ចប្រជុំជាអន្តរជាតិនោះ យើងសុំស្នើឲ្យអាមេរិកកុំចូលខ្លួនធ្វើជាអ្នកសម្របសម្រួលតែឯកឯងឡើយ ប៉ុន្តែ ចូរធ្វើត្រឹមតែជាអ្នកសម្របសម្រួលមួយក្នុងចំណោមអ្នកសម្របសម្រួលដទៃទៀតបានហើយ»។
កិច្ចជំនួបជាមួយលោកពូទីនត្រូវបានធ្វើឡើងពីរសប្តាហ៍បន្ទាប់ពីនាយករដ្ឋមន្ត្រីអ៊ីស្រាអែលលោក បេនចាមីន នេតានី យ៉ាហ៊ូ ក៏បានទស្សនកិច្ចក្នុងក្រុងម៉ូស្គូ ដែរនោះ។
កាលពីថ្ងៃចន្ទ លោក នេតានីយ៉ាហ៊ូ បានថ្លែងថា លោកបើកកិច្ចចរចា ជាមួយក្រុងវ៉ាស៊ីនតោន អំពីបញ្ហាការតភ្ជាប់ជាដែនដីឧបសម្ព័ន្ធនូវតំបន់តាំងលំនៅឋានជាច្រើននៅក្នុងតំបន់វេសប៊ែងត្រួតត្រាដោយអ៊ីស្រាអែល ជាទង្វើមួយដែលត្រូវបានក្រុមមន្ត្រីជាន់ខ្ពស់ប៉ាឡេស្ទីន ធ្វើការថ្កោលទោសយ៉ាងខ្លាំងថា ជា «ទង្វើលួចប្លន់ដីធ្លី»។
សេតវិមាន បានទាត់ចោលការអះអាងរបស់លោកនេតានីយ៉ាហ៊ូ អំឡុងស្ថានភាពដែលកំពុងមានការបែកបាក់គ្នាដ៏ធ្ងន់ធ្ងរ និងកម្រនេះ។
ភាគីប៉ាឡេស្ទីន បានធ្វើការថ្កោលទោសចំពោះទង្វើរបស់លោកត្រាំ នេះ៕