Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក Kushner ឈានទៅ​បម្រើការ​ក្នុង​សេតវិមាន​ជាមួយ​លោក ត្រាំ

Content image - Phnom Penh Post
លោក Jared Kushner (ឆ្វេង) និង​ភរិយា Ivanka Trump ចូល​រួមពិធី​បង្ហាញ​ម៉ូដមួយ​នៅ​ញូវយ៉ក​។ Afp

លោក Kushner ឈានទៅ​បម្រើការ​ក្នុង​សេតវិមាន​ជាមួយ​លោក ត្រាំ

ក្រុងញូវយ៉កៈ កូនប្រសា​ប្រុស​ដែល​មាន​មុខមាត់​ដូច​ប្រធានាធិបតី​ទើបតែ​ជាប់ឆ្នោត​អាមេរិក លោក​ដូណាល់ ត្រាំ គឺលោក Jared Kushner នឹង​ចូលរួម​ជាមួយ​រដ្ឋការ​ថ្មី​របស់​ឪពុកក្មេក។

ដោយយោង​សម្តី «អ្នកដែល​ពាក់ព័ន្ធ​ក្នុង​ដំណើរការ​នេះ» កាសែត New York Times រាយការណ៍​ថា បច្ចុប្បន្ន លោក Kush ner កំពុង​រៀបចំ​ឯកសារ​បង្ហាញ​ហិរញ្ញវត្ថុ​ចាំបាច់ «ដើម្បី​ទទួល​យក តំណែង​សេត​វិមាន​ផ្លូវការ​មួយ»។

ស្ត្រីអ្នក​នាំពាក្យ លោក Kushner បាន​បញ្ចា​ក់ថា បច្ចុប្បន្ន គាត់​កំពុង​វិភាគអ្វី ដែល​គាត់​នឹងត្រូវ​ធ្វើ មុនពេល​ចូលរួម​នឹងក្រុម​សេតវិមាន។

ជាផ្នែក​មួយ នៃ​ដំណើរការ នេះ លោក​នឹង​លាលែង​ពីប្រមុខ​ប្រតិបត្តិ នៃ​ក្រុមហ៊ុន Kushner និង​ដកចេញ «រាល់​ទ្រព្យសម្បត្តិ​ដ៏ច្រើន​ក្រាស់ក្រែល»។

ក្នុង​សេចក្តី​ថ្លែងការណ៍​មួយ ស្ត្រី​អ្នកនាំពាក្យ​រូបនោះ បាន​និយាយថា៖ «លោក Kushner កំពុង​ប្តេជ្ញាចិត្ត​អនុវត្ត​តាមច្បាប់​សីលធម៌​សហព័ន្ធ និងបាន​និង​កំពុង​ពិគ្រោះ​ជាមួយ​ការិយាល័យ​សីលធម៌​រដ្ឋាភិបាល​ទាក់ទង​នឹង​វិធានការ​ជាច្រើន ដែល​គាត់​នឹងត្រូវ​ចាត់ធ្វើ»។

Content image - Phnom Penh Post
មេដឹក​នាំព្រឹទ្ធសភា​សំឡេង​ភាគច្រើន លោក Mitch McConnell (ឆ្វេង) ជួប​ជាមួយ​រដ្ឋមន្ត្រីការ​បរទេស​តែង​តាំង លោក Rex Tillerson ។ Afp

ស្ត្រី​អ្នកនាំពាក្យ​រូបនោះ បាន​បន្តថា៖ «ថ្វីបើ​គេ​មិនទាន់​បាន​បង្ហើយ​ផែនការ​នោះក្តី ក៏លោក Kushner នឹង​លាលែង​ពីតំណែង​របស់​លោក​នៅក្នុង​ក្រុមហ៊ុន Kushner និងដក​ទ្រព្យសម្បត្តិ​សំខាន់ៗ​អនុលោម​ទៅតាម​គោលការណ៍​ណែនាំ របស់​សហព័ន្ធ​ដែរ»។

ពាក្យថា​លោក Kushner កំពុង​ឈានទៅ​ចូលរួម​ក្នុង​រដ្ឋការ​លោក​ត្រាំ កើតមានឡើង​នៅពេល កាសែត New York Times រាយការណ៍​ថា ស្វាមី​របស់​អ្នកស្រី Ivanka Trump បាន​និង​កំពុង​ស្វែងរក​គ្រោងការ​អចលនទ្រព្យ ជាមួយ​ក្រុមហ៊ុន​មួយ​ដែលមាន​ទំនាក់ទំនង​នឹង​រដ្ឋាភិបាល​ចិន។

លោក Kushner វ័យ ៣៦ ឆ្នាំ គឺជា​សមាជិក​ដ៏មាន​អំណាច​និង​មាន​ឥទ្ធិពល​ម្នាក់ នៃ​មជ្ឈដ្ឋាន ខាងក្នុង​របស់​លោក​ត្រាំ។ ឥទ្ធិពល​នេះ បង្ហាញ​នូវ​ភាពរឹងមាំ​ខាង​គោល​នយោបាយ​ការបរទេស ថ្វីបើ​លោក​មាន​ផល​ប្រយោជន៍​មុខជំនួញ​ឯកជន​ក្នុង​ប្រទេស​សំខាន់ៗ​មួយចំនួន​ក្តី។ លោកត្រាំ ធ្លាប់បាន​និយាយ​ជាសាធារណៈ​ថា Kushner ដែលជា​អម្បូរ ជីហ្វអូតូដុក នឹងមាន​តួនាទី សំខាន់​ក្នុង​ទំនាក់ទំនង​អាមេរិក​ជាមួយ​អ៊ីស្រាអែល។

ក្នុងពេល​ជាមួយ​គ្នានេះ គណៈរដ្ឋមន្ត្រី​លោក​ត្រាំ នៅតែ​ពុំទាន់​ប្រាកដប្រជា​នៅឡើយ នៅពេលដែល​សមាជិក​ដែល​ត្រូវបាន​តែងតាំង ៩ នាក់ ត្រូវរង់ចាំ​សវនាការ​បញ្ជា​ក់មួយ​ពីក្រុម​អ្នកធ្វើច្បាប់​នៃព្រឹទ្ធសភា​អាមេរិក នឹងត្រូវ​ធ្វើ​នៅថ្ងៃ​ព្រហស្បតិ៍​នាសប្តាហ៍​នេះ ដែល ក្នុងនោះ​មានទាំង​តំណែង​រដ្ឋមន្ត្រី​ការបរទេស លោក Rex Tillerson ផងដែរ៕

The New York Times

0

Comments

Please, login or register to post a comment