.jpg)
សកម្មជនលទ្ធិប្រជាធិបតេយ្យហុងកុង (ពីឆ្វេង) Wong Law និងChow។ AFP
ក្រុងហុងកុងៈ លោក Joshua Wong និងកម្មជនលទ្ធិប្រជាធិបតេយ្យហុងកុងដ៏លេចធ្លោ ២ នាក់ទៀត បានឈ្នះក្តីបណ្តឹងឧទ្ធរណ៍ប្រឆាំងនឹងរយៈពេលជាប់ពន្ធនាគាររបស់ពួកគេនៅតុលាការជាន់ខ្ពស់នៅក្នុងក្រុងនេះ កាលពីថ្ងៃអង្គារនៅក្នុងសំណុំរឿងមួយ ដែលត្រូវបានមើលឃើញថា ជាការធ្វើតេស្តពីឯករាជភាពនៃប្រព័ន្ធយុត្តិធម៌របស់ក្រុងនេះ ដែលអ្នកភ័យខ្លាចថានៅក្រោមសម្ពាធពីក្រុងប៉េកាំង។
ប៉ុន្តែអ្នកទាំង ៣ នាក់នោះ បានព្រមានថាវាមិនមែនជាពេលសម្រាប់ការត្រេកអរនោះទេ ដោយសារក្រុងចិនពាក់កណ្តាលស្វយ័តមួយនេះ នៅតែប្រឈមនឹងការគំរាមកំហែងចំពោះសេរីភាពរបស់ខ្លួនដដែល។
លោក Wong លោក Nathan Law និងលោក Alex Chow បានជាប់ពន្ធនាគារនៅក្នុងខែសីហាឆ្នាំទៅ ដោយសារតួនាទីរបស់ពួកគេ នៅក្នុងចលនាគាំទ្រលទ្ធិប្រជាធិបតេយ្យគឺចលនាឆត្រ ដែលបានធ្វើការតវ៉ាកាលពីឆ្នាំ ២០១៤ ក្រោយពីរដ្ឋាភិបាលក្រុងហុងកុង បានជំរុញឲ្យមានការកាត់ទោសឲ្យបានម៉ត់ចត់។
ពីដំបូង តុលាការជាន់ទាបមួយ បានសម្រេចឲ្យ Wong និង Law ធ្វើការងារនៅក្នុងសហគមន៍ ហើយលោក Chow ត្រូវព្យួរទោស។ ប៉ុន្ដែក្រោយពីមានការអន្តរាគមន៍ពីរដ្ឋាភិបាល ពួកគេត្រូវជាប់ពន្ធនាគារចន្លោះពី ៦ ខែ ដល់ ៨ ខែដោយតុលាការឧទ្ធរណ៍។
នៅពេលក្រោយមកសកម្មជនទាំង ៣ រូប ត្រូវបានដោះលែងឲ្យនៅក្រៅឃុំ ដោយរង់ចាំការប្តឹងឧទ្ធរណ៍របស់ពួកគេ។
ប្រមុខយុត្តិធម៌លោក Geoffrey Ma បានថ្លែងកាលពីថ្ងៃអង្គារថា រយៈពេលជាប់ពន្ធនាគារដែលផ្តល់ឲ្យអ្នកទាំង ២ រូបនេះ គឺធ្ងន់ធរ ជាងរយៈពេលដែលផ្តល់ឲ្យសម្រាប់បទល្មើសផ្សេង៕
