ក្រុង ប៉ារីស : ប្រភពព័ត៌មានបារាំងបានថ្លែងប្រាប់ AFP ឲ្យដឹងថា ចក្រភពអង់គ្លេសនឹងធ្វើការចុះហត្ថលេខាលើកិច្ចព្រមព្រៀងមួយ ដើម្បីទទួលយកក្រុមជនភៀសខ្លួនក្មេងៗជាច្រើននាក់ទៀតស្របពេលដែលធ្វើការផ្តល់ឲ្យអំណោយថវិកាដ៏ច្រើន សម្រាប់ការអភិវឌ្ឈន៍សេដ្ឋកិច្ចប្រទេសបារាំង ភាគខាងជើងក្រោមកិច្ចព្រមព្រៀងសន្តិសុខតាមបណ្តោយតំបន់ព្រំដែនថ្មីមួយដែលនឹងត្រូវបានធ្វើឡើងរវាងលោក អេម៉ានុយអែល ម៉ាក្រុង និង លោកស្រីថេរិសា ម៉េ កាលពីថ្ងៃព្រហស្បតិ៍។
លោក ម៉ាក្រុង ដែលធ្វើដំណើរទស្សនកិច្ចជាលើកដំបូងរបស់លោកទៅកាន់ចក្រភពអង់គ្លេស ក្នុងឋានៈជាប្រធានាធិបតីបារាំង នឹងជួបជាមួយនាយករដ្ឋមន្ត្រីអង់គ្លេស សម្រាប់កិច្ចជំនួបកំពូលមួយដែលវិបត្តិចំណាកស្រុកនិងគម្រោងចាកចេញរបស់អង់គ្លេសពីសហភាពអឺរ៉ុប (Brexit) ត្រូវបានគេរំពឹងថា នឹងធ្វើឡើងដោយចៀសបំផុត។
យោងតាមប្រភពព័ត៌មានមួយពីការិយាល័យប្រធានាធិបតីបារាំង បានឲ្យដឹងកាលពីថ្ងៃពុធថា ពួកគេនឹង «ចូលរួមធ្វើវិសោធនកម្មកិច្ចព្រមព្រៀង Le Touquet ឆ្នាំ ២០០៣ ដែលបានធ្វើឲ្យព្រំដែនចក្រភពអង់គ្លេសស្ថិតចូលលើទឹកដីបារាំង នៅទីប្រជុំជនកំពង់ផែ Calais ជាកិច្ចព្រមព្រៀងមួយដែលក្រុមអ្នករិះគន់បាននិយាយថា បានធ្វើឲ្យទីក្រុងកំពង់ផែនេះ ជាចំណុចទាក់ទាញខ្លាំងដល់ក្រុមជនចំណាកស្រុករាប់ពាន់នាក់ដែលកំពុងមានក្តីសុបិន្តទៅរស់នៅក្នុងទឹកដីចក្រភពអង់គ្លេស។
កិច្ចចរចារបស់ពួកគេក៏នឹងផ្តោតទៅលើការលើកកំពស់កិច្ចសហប្រតិបត្តិការពារជាតិក៏ដូចជាដំណើរការគម្រោង Brexit ដែលបានធ្វើភាពតានតឹងកាន់តែកើនឡើងរវាងចក្រភពអង់គ្លេសនិងក្រុមរដ្ឋសមាជិករបស់ប្លុកនេះទាំង២៧ប្រទេសដទៃទៀត។
នៅលើរបៀបវារៈកិច្ចប្រជុំនោះ ក៏នឹងលើកអំពីកិច្ចខិតខំនានា ដើម្បីប្រយុទ្ធប្រឆាំងបំលាស់ប្តូរអាកាសធាតុ និង គម្រោងសេដ្ឋកិច្ចនិងនវានុវត្តនភាពមួយចំនួនធំទៀត រួមបញ្ចូលទាំងកិច្ចព្រមព្រៀងស្តីអំពីទីក្រុងរណបថ្មីនិងបំលាស់ប្តូរគ្នានៃស្នាដៃវប្បធម៌នានាដែលសំខាន់បំផុតនោះ គឺជាកម្ចីមួយរបស់បារំាងពីចំលាក់បែបប៉ាក់សតវត្សរ៍ទី១១ (11th-century Bayeux Tapestry) ពិពណ៌នាអំពី ការច្បាំងដណ្តើមត្រួតត្រារបស់ចក្រភពអង់គ្លេស ក្នុងឆ្នាំ ១០៦៦។
ប្រភពព័ត៌មានមួយដែលសុំមិនបញ្ចេញឈ្មោះបានឲ្យដឹងថាព័ត៌មានលំអិតអំពីកិច្ចព្រមព្រៀងស្តីពីក្រុមជនចំណាកស្រុកថ្មីមួយនេះកំពុងស្ថិតក្នុងដំណើរកាលឈានទៅរកការអនុម័តសម្រេច។ប៉ុន្តែវានឹងត្រូវរួមបញ្ចូលទាំងវិធានការនានាស្តីអំពីការដោះស្រាយបញ្ហាក្រុមអនីតិជនដែលធ្វើដំណើរដោយឯកឯង ការស្នើសុំសិទ្ធិជ្រកកោន និង ការបង្រួបបង្រួមក្រុមគ្រួសារជាថ្មី។
លោក ម៉ាក្រុង បានថ្លែងនៅក្នុងទីក្រុង Calais នាសប្តាហ៍នេះថា លោកនឹងលើកឡើងអំពីករណីរបស់ ក្រុមអនីតិជន «ពីព្រោះពួកគេកាន់តែមានគ្នាច្រើនឡើងៗ» ដោយក្រុមមន្ត្រីបានព្រមានថានឹងអាចមានក្រុមជនចំណាកស្រុកដែលសុទ្ធតែក្មេង ២៥ ០០០ នាក់នៅក្នុងទឹកដីបារាំងនាបំណាច់ឆ្នាំនេះ។
ក្នុងចំណោមក្រុមអនីតិជនប្រហែល ២០០០ នាក់នៅឯជំរំ «អារញ្ញប្រទេស» ដ៏ធំមួយនៅក្បែរ ទីក្រុង Calais ដែលត្រូវបានបោសសំអាតកាលពី១៥ខែកន្លងទៅដែលក្រុងឡុងដ៍ បានសន្យាទទួលយកក្រុមជនណាដែលមានសមាជិកក្រុមគ្រួសាររួចជាស្រេចនៅក្នុងទឹកដីចក្រភពអង់គ្លេស។
នៅទីបំផុត ក្រុមជនចំណាកស្រុក ត្រឹមតែ ៨៩៣ នាក់ តែប៉ុណ្ណោះ ត្រូវបានអនុញ្ញាតឲ្យចូលទឹកដីអង់គ្លេស ហើយនៅក្នុងមួយឆ្នាំកន្លងទៅ ក្រុមជនចំណាកស្រុក ជាអនីតិជន តែ៨នាក់ប៉ុណ្ណោះ ដែលត្រូវបានទទួលយកមកឲ្យរស់នៅក្នុងប្រទេសនេះ។
ប្រភពព័ត៌មានដដែលនោះ បានឲ្យដឹងថា ប្រទេសទាំងពីរ ក៏នឹងធ្វើសេចក្តីប្រកាសផងដែរអំពី «ការរឹតបន្តឹងនៃកិច្ចសហប្រតិបត្តិការរវាងស្ថាប័នប៉ូលិស បារាំង-អង់គ្លេស ស្តីអំពីការគ្រប់គ្រងសន្តិសុខនៅក្នុងតំបន់ តាមបណ្តោយព្រំដែន»៕ AFP/ ប្រែសម្រួលដោយ សុឹម សានិត