បុរីញូវយ៉ក: ក្រុមអ្នកការទូតបានឲ្យដឹងកាលពីថ្ងៃពុធថា អគ្គលេខាធិការអង្គការសហប្រជាជាតិ លោក Antonio Guterres បានតែងតាំងអ្នកសម្របសម្រួល និងជាអតីតមន្ត្រីផ្តល់ជំនួយសង្គ្រោះបន្ទាន់ លោក Martin Griffiths មកពីអង់គ្លេសឲ្យឡើងជាអ្នកសម្របសម្រួល ដើម្បីស្វែងរកសន្តិភាពប្រចាំនៅយេម៉ែន ដោយបន្តបំពេញបេសកកម្មមួយ ដែលប្រេសិតពិសេសរបស់អង្គការសហប្រជាជាតិ ២ រូបបានលាលែងពីតំណែងដោយក្តីស្រងាកចិត្ត។
លោក Griffiths នឹងឡើងកាន់តំណែងជំនួសលោក Ismail Ould Cheikh Ahmed មកពីប្រទេស ម៉ូរីតានីញ៉ា ដែលមិនបានធ្វើឲ្យមានការរីកលូតលាស់ដំណើរការទៅមុខក្នុងកិច្ចខិតខំនានារបស់អ.ស.បដើម្បីបញ្ចប់សង្គ្រាមរវាងក្រុមចម្រុះដឹកនាំដោយអារ៉ាប៊ី សាអ៊ូឌីត ដែលគាំទ្ររដ្ឋាភិបាលយេម៉ែននិងក្រុមឧទ្ទាមហ៊ូធីគាំទ្រដោយអ៊ីរ៉ង់។
នៅសប្តាហ៍នេះ លោក Cheikh Ahmed បានថ្លែងប្រាប់ អង្គការសហប្រជាជាតិថា លោកមិនចង់បន្តដំណើរជាប្រេសិតពិសេសទៀតឡើយ ខណៈកិច្ចសន្យារបស់លោក បានចប់នៅក្នុងខែក្រោយ។
អ្នកកាន់តំណែងមុនលោក គឺលោក Jamal Benomar ក៏បានចុះចេញពីតំណែងនៅក្នុងខែមេសាឆ្នាំ ២០១៥ បន្ទាប់ពីកិច្ចប្រឹងប្រែងអស់រយៈពេលពេល ៤ ឆ្នាំ ដើម្បីបង្កើតឡើងនូវកំណែទម្រង់នយោបាយមួយ នៅយេម៉ែនបានដួលរលំ។ មួយខែមុននេះ ក្រុមចម្រុះ បានចាប់ផ្តើមការវាយប្រហារផ្លូវអាកាសយេម៉ែន។
ក្រុមអ្នកការទូត បានឲ្យដឹងថា លោក Guterres បានថ្លែងប្រាប់សមាជិកអចិន្រៃ្តយ៍របស់ក្រុមប្រឹក្សាសន្តិសុខ អ.ស.ប មានដូចជា អង់គ្លេស បារាំង ចិន អាមេរិក និង រុស្ស៊ី ថា លោក Griffiths គឺជាជម្រើសមួយរបស់លោក ហើយក៏កំពុងពិគ្រោះគ្នាជាមួយក្រុមប្រទេសនៅក្នុងតំបន់ឈូងសមុទ្រ និងក្រុមរដ្ឋដទៃទៀត។
ប្រមុខ អ.ស.ប មិនបានផ្តល់ការប្រឹក្សាយោបល់ជាផ្លូវការនៅឡើយដល់ក្រុមប្រឹក្សាទាំងមូលអំពីការតែងតាំងប្រេសិតថ្មីនេះទេ។
លោក Griffiths គឺជានាយកប្រតិបត្តិរបស់វិទ្យាស្ថានអឺរ៉ុប ដើម្បីសន្តិភាព (EIP) មានមូលដ្ឋាននៅក្នុងទីក្រុងប្រ៊ុចសែល ហើយក៏បានជួយបង្កើតមជ្ឈមណ្ឌល ដើម្បីកិច្ចសន្ទនាអំពីបញ្ហាមនុស្សធម៌ (CHD) នៅក្នុងទីក្រុងហ្សឺណែវ ដែលមានឯកទេសផ្នែកកិច្ចសន្ទនាបញ្ហានយោបាយ។
អតីតអ្នកការទូតអង់គ្លេសម្នាក់ លោក Griffiths គឺជាទីប្រឹក្សាសម្របសម្រួលរបស់លោក កូហ្វី អាណាន់ អំឡុងបេសកកម្មរបស់លោក នៅស៊ីរី ហើយបានធ្វើជាអ្នកសម្របសម្រួលផ្នែកមនុស្សធម៌ប្រចាំតំបន់នៅ Great Lakes អំឡុងទសវត្សរ៍ឆ្នាំ ១៩៩០។
នៅក្នុងឆ្នាំ ១៩៩៤ លោកត្រូវបានតែងតាំងជានាយកផ្នែកកិច្ចការ មនុស្សធម៌របស់ អ.ស.ប.នៅក្នុងក្រុងហ្សឺណែវ៕