.jpg)
យុទ្ធជនប្រឆាំងស៊ីរីគាំទ្រដោយតួកគី ជិះរថយន្តល្បាតក្នុងភូមិ al Bayyah។ AFP
បុរីញូវយ៉កៈ ក្រុមអ្នកការទូតបាននិយាយថា កាលពីថ្ងៃព្រហស្បតិ៍ក្រុមប្រឹក្សាសន្តិសុខអង្គការសហប្រជាជាតិ បានធ្វើការបោះឆ្នោតទៅលើសេចក្តីព្រាងនៃសេចក្តីសម្រេចមួយដែលទាមទារឲ្យមានបទឈប់បាញ់រយៈពេល ៣០ ថ្ងៃនៅស៊ីរីដើម្បីអនុញ្ញាតឲ្យមានការផ្តល់ជំនួយមនុស្ស និងសម្ភារសុខាភិបាល។
ស៊ុយអែត និងកូវ៉ែតដែលបានព្រាងសេចក្តីសម្រេចនោះ បានស្នើឲ្យមានការបោះឆ្នោតនេះឲ្យបានឆាប់តាមដែល អាចធ្វើបានដោយបានបន្ថែមថា វាទំនងជា ត្រូវបានគ្រោងសម្រាប់ថ្ងៃព្រហស្បតិ៍ម្សិលមិញនេះ។
វានៅតែមិនច្បាស់ថាតើរុស្ស៊ីនឹង បោះឆ្នោតវេតូដើម្បីរាំងខ្ទប់សេចក្តីព្រាងនៃសេចក្តីសម្រេចនោះដែរ ឬ យ៉ាងណា?
ការជំរុញឲ្យមានការបោះឆ្នោតមួយ បានកើតឡើង ក្រោយពីលោកអគ្គលេខាធិការអ.ស.ប. Antonio Guterres បានអំពាវនាវឲ្យបញ្ឈប់សកម្មភាពសង្គ្រាមនៅតំបន់ Ghouta ភាគខាងកើត ជាបរិពន្ធភូមិឧទ្ទាមនៅស៊ីរី ដែលស្ថិតនៅក្រោមយុទ្ធនាការវាយប្រហារយ៉ាងខ្លាំងក្លារបស់កម្លាំងរដ្ឋាភិបាល។
ដោយសារចំនួនអ្នកស្លាប់បណ្តាលមកពីការវាយប្រហារផ្លូវអាកាស បានកើនឡើងយ៉ាងខ្លាំងនោះ លោក Guterres ថ្លែងថា ជីវិតសម្រាប់ជនស៊ីវិល ៤ សែននាក់នៃតំបន់ Ghouta ភាគខាងកើតស្ថិតនៅក្នុងស្ថានភាពអាប់អួ។
រុស្ស៊ីបានអំពាវនាវឲ្យមានជំនួបក្រុមប្រឹក្សាជាបន្ទាន់កាលពីថ្ងៃព្រហស្បតិ៍ ដើម្បីពិភាក្សាអំពីវិបត្តិនៅក្នុងតំបន់ Ghouta ភាគខាងកើត ដែលឯកអគ្គរដ្ឋទូតលោក Vassily Nebenzia បានពិពណ៌នាថា ជាស្ថានភាពស្មុគស្មាញមួយ។
លោក Nebenzia បានថ្លែងថា៖ «មានភេរវករជាច្រើននៅទីនោះ ដែលកងទ័ពស៊ីរី កំពុងប្រយុទ្ធប្រឆាំងនឹងក្រុមភេរវករទាំងនោះ កំពុងវាយប្រហារទៅលើក្រុងដាម៉ាស»។
បុរសម្នាក់បីជនរងគ្រោះ ដែលរបួសធ្ងន់ធ្ងរចូលមន្ទីរពេទ្យបណ្តោះអាសន្នមួយ។ AFP
យោងតាមការអធិប្បាយដែលចេញដោយស្ថានបេសកកម្មរុស្ស៊ីនោះ លោកបានថ្លែងថា៖ «វាគឺជាស្ថានភាពដ៏ស្មុគស្មាញ ហើយវាមិនមែនគ្រាន់តែជាមធ្យោបាយមួយទេ» សេចក្តីព្រាងនោះ អំពាវនាវឲ្យមានបទឈប់បាញ់ចូលជាធរមានរយៈពេល ២៤ ម៉ោង ក្រោយពីការអនុម័តសេចក្តីសម្រេចនោះរួច ដើម្បីឲ្យមានការផ្តល់ជំនួយមនុស្សធម៌ និងបរិក្ខារសុខាភិបាល។
សេចក្តីសម្រេចនោះ ទាមទារឲ្យមានការដកការឡោមព័ទ្ធជាច្រើននៅក្នុងនោះមានតំបន់ Ghouta ភាគខាងកើតតំបន់ Yarmouk តំបន់ Kefraya និងសេចក្តីសម្រេចជាច្រើនទៀត ដើម្បីកាត់បន្ថយការដកស្បៀងអាហារ និងថ្នាំពេទ្យដែលមិនចាំបាច់ចំណាយលុយសម្រាប់ការរស់នៅរបស់ពួកគេទាំងនោះ។
នៅក្នុងការផ្តល់ឲ្យរុស្ស៊ីនោះសេចក្តីព្រាងនោះ ត្រូវបានធ្វើវិសោធនកម្មនៅក្នុងអំឡុងការចរចាយ៉ាងស្វិតស្វាញកាលពីសប្តាហ៍មុន ដើម្បីបញ្ជាក់ថាបទឈប់បាញ់នោះ មិនអនុវត្តចំពោះក្រុមរដ្ឋអ៊ិស្លាម ឬ ក្រុមអាល់កៃដាទេ។
សេចក្តីព្រាងដដែលនោះ នឹងអនុញ្ញាតឲ្យរដ្ឋាភិបាលស៊ីរីបន្តការវាយប្រហារប្រឆាំងនឹងក្រុមជីហាដ ដែលមានទំនាក់ទំនងជាមួយក្រុមអាល់កៃដានៅក្នុងខេត្តអ៊ីដលីប ជាខេត្តចុងក្រោយនៅស៊ីរី។
ដោយត្រូវបានសួរថា តើមានការព្រមព្រៀងជាឯកច្ឆន្ទនៅក្នុងអត្ថបទនៃសេចក្តីព្រាងនោះដែរឬទេ ឯកអគ្គរដ្ឋទូតស៊ុយអែតលោក Olof Skoog បានថ្លែងថា៖ «បញ្ហានោះ ខ្ញុំមិនទាន់ដឹងទេ»។
ស៊ុយអែត និងកូវ៉ែត បានដាក់សេចក្តីព្រាងនោះជូនទៅក្រុមប្រឹក្សាសន្តិសុខកាលពីថ្ងៃទី ៩ ខែកុម្ភៈ ប៉ុន្តែការចរចាជាច្រើនត្រូវបានធ្វើឡើង ខណៈកម្លាំងស៊ីរីគាំទ្រដោយរុស្ស៊ីបង្កើនការវាយប្រហាររបស់ ពួកគេយ៉ាងខ្លាំងកា្ល។
ក្រុមឃ្លាំមើលសិទ្ធិមនុស្សស៊ីរីបានឲ្យដឹងថា ជនស៊ីវិលជិត ៣០០ នាក់ បានស្លាប់ ចាប់តាំងពីថ្ងៃអាទិត្យនៅក្នុងតំបន់ Ghouta ភាគខាងកើតនៅក្នុងនោះមានស៊ីរី ២៤ នាក់ ដែលបានស្លាប់ នៅពេលយន្តហោះរដ្ឋាភិបាលទម្លាក់គ្រាប់បែកធុងជាច្រើនទៅលើទីប្រជុំជន Kafr Batna កាលពីថ្ងៃពុធ៕
