បុរីញូវយ៉ក: អាមេរិកកំពុងស្នើឲ្យអង្គការសហប្រជាជាតិដាក់បម្រាមលើនាវាទាំង ៣៣ គ្រឿងមកពីកំពង់ផែនៅទូទាំងពិភពលោក និងដាក់បញ្ចូលក្នុងបញ្ជីខ្មៅក្រុមហ៊ុនដឹកជញ្ជូនទាំង ២៧ ពីបទជួយកូរ៉េខាងជើងគេចវេះពីទណ្ឌកម្មរបស់អង្គការសហប្រជាជាតិ។
សំណើរបស់អាមេរិកទៅគណៈកម្មាធិការទណ្ឌកម្មរបស់អង្គការសហប្រជាជាតិ (UN) នូវច្បាប់ចម្លងមួយច្បាប់នៃអ្វីដែល AFP បានទទួលធ្វើឡើង ខណៈប្រធានាធិបតី ដូណាល់ ត្រាំ បានប្រកាសកាលពីថ្ងៃសុក្រនូវ «ទណ្ឌកម្មដ៏ធ្ងន់ធ្ងរបំផុតមិនធ្លាប់មានពីមុន» លើកូរ៉េខាងជើង ជុំវិញការបាញ់សាកល្បងអាវុធនុយក្លេអ៊ែរនិងមីស៊ីលបាលីស្ទិករបស់ខ្លួន ដែលប្រព្រឹត្តកន្លងមក។
ជប៉ុនចូលរួមជាមួយអាមេរិកនៅក្នុងការគាំទ្រសំណើពាក់ព័ន្ធនាវា ៣ គ្រឿងក្នុងចំណោមនាវាទាំង ៣៣ គ្រឿងពីការផ្ទេរប្រេងពីនាវាមួយទៅនាវាមួយមានគោលដៅបញ្ជូនទៅកូរ៉េខាងជើង ជាការរំលោភលើសេចក្តីសម្រេចរបស់ អ.ស.ប។ មកទល់ថ្ងៃសុក្រសប្តាហ៍មុន នៅម៉ោង ៣ ល្ងាច សមាជិកក្រុមប្រឹក្សាសន្តិសុខ បានលើកឡើងពីការជំទាស់ទៅនឹងសំណើដាក់ទណ្ឌកម្មទាំងនោះ។
វិធានការទាំងនេះ នឹងចូលជាធរមានដរាបណាគ្មានសមាជិកក្រុមប្រឹក្សាសន្តិសុខណាម្នាក់រួមទាំងសម្ព័ន្ធមិត្តរបស់កូរ៉េខាងជើង គឺចិនមិនបានរារាំងសំណើដាក់ទណ្ឌកម្មនេះទេ។
កន្លងមក មាននាវា ៨ គ្រឿងប៉ុណ្ណោះ ត្រូវបានដាក់បម្រាមមិនឲ្យចូលចតនៅកំពង់ផែនានាទូទាំងពិភពលោកពីបទរំលោភលើទណ្ឌកម្ម និងសំណើអាមេរិក នឹងជួយ ពង្រីកបញ្ជីខ្មៅនេះ ជាកិច្ចខិតខំមួយ ដើម្បីកម្ទេចបណ្តាញផ្លូវសមុទ្ររបស់កូរ៉េខាងជើង។
កាលពីឆ្នាំទៅ ក្រុមប្រឹក្សាសន្តិសុខ អ.ស.ប. បានដាក់ទណ្ឌកម្មលើការនាំចេញទំនិញរបស់កូរ៉េខាងជើង៕