.jpg)
ក្រុមជនភៀសខ្លួនកាមេរូនអង្គុយបង្ហាញពីបទពិសោធទុក្ខលំបាករបស់ពួកគេនៅក្នុងជំរំ ដែលពលរដ្ឋរាប់រយនាក់ស្វែងរកជម្រកនៅតំបន់ Bashu នីហ្សេរីយ៉ាភាគអាគ្នេយ៍។ AFP
ក្រុងនីញ៉ាម៉ី: ទីភ្នាក់ងារទទួលជនភៀសខ្លួនរបស់អង្គការសហប្រជាជាតិកាលពីថ្ងៃពុធ បានធ្វើសេចក្តីអំពាវនាវរកជំនួយមនុស្សធម៌ ១៥៧ លានដុល្លារ ដើម្បីជួយសង្គ្រោះដល់ក្រុមជនភៀសខ្លួនជាង ២០ ម៉ឺននាក់ ដែលរងគ្រោះដោយសារការបះបោរបង្កឡើងដោយក្រុមឧទ្ទាមបូកូហារ៉ាម។
ទីភ្នាក់ងារ UNHCR បំពេញបេសកកម្មរួមគ្នាជាមួយនឹង ទីភ្នាក់ងារជាង ៤០ បានឲ្យដឹងថា ខ្លួនត្រូវការជំនួយមនុស្សធម៌ជាចាំបាច់ ដើម្បីជួយដល់ក្រុមជនភៀសខ្លួននីហ្សេរីយ៉ា ២០ ម៉ឺន ៩ ពាន់នាក់ និងក្រុមជនភៀសខ្លួនគោលដៅ ៧៥០០០ នាក់ទៀតនៅក្នុងនីហ្សេ កាមេរូន និងឆាត ជាទីកន្លែងហេដ្ឋារចនាសម្ព័ន្ធ ដែលបានរងផលប៉ះពាល់ដោយការហូរចូលនៃក្រុមជនភៀសខ្លួនទាំងនេះ។
ទីភ្នាក់ងារនេះ បានលើកឡើងថា ចាប់តាំងពីឆ្នាំ ២០១៣ មក ជម្លោះបង្កឡើងដោយក្រុមឧទ្ទាមបូកូហារ៉ាម បានបង្កឲ្យក្រុមពលរដ្ឋនៅក្នុងប្រទេសនីហ្សេរីយ៉ា ភាគឦសាន កាមេរូន ឆាត និង នីហ្សេ ២,៤ លាននាក់ទៀត បានបាត់បង់លំនៅឋាន។
លោកស្រី Kelly Clements ឧត្តមស្នងការរងរបស់ UNHCR បានថ្លែង ខណៈធ្វើសេចក្តីអំពាវនាវនោះថា៖ «វិបត្តិពាក់ព័ន្ធក្រុមបូកូហារ៉ាម កាន់តែបង្កគ្រោះថ្នាក់ ហើយវាបានកើតឡើងហួសពីការគិតរបស់យើងទៅទៀត»។ «ពិភពលោកមិនគួរបំភ្លេចក្រុមជនរងគ្រោះពីសង្គ្រាមដ៏សាហាវនេះឡើយ ជាពិសេស ខណៈវាហាក់មានក្តីសង្ឃឹមបន្តិចបន្តួចនោះចំពោះការស្តារសន្តិភាព និងស្ថិរភាព ឡើងវិញនៅក្នុងអនាគតដ៏ខ្លីខាងមុខនេះ»។
ទីភ្នាក់ងារនោះ បានឲ្យដឹងទៀតថា ឥទ្ធិពលនៃសង្គ្រាម «ប្រកបដោយវិនាសកម្ម» រួមទាំងការកើនឡើងនៃអសន្តិសុខស្បៀងអាហារ និងកង្វះអាហារូបត្ថម្ភដ៏ខ្លាំងក្លា។
ទីភ្នាក់ងារ UNHCR បានបន្ថែមថា ក្រុមពលរដ្ឋជាង ៧ លាននាក់នៅក្នុងតំបន់អាងទន្លេ Lake Chad ជាតំបន់វិបត្តិសន្តិសុខស្បៀងអាហារ និងសុខភាពកុមារ គិតត្រឹមខែកញ្ញា ឆ្នាំ ២០១៧៕
