.jpg)
អគ្គនាយកនៃអគ្គនាយកដ្ឋានពន្ធដារ លោក គង់ វិបុល ថ្លែងនាពេលកន្លងទៅ។ រូបថត GDT
ភ្នំពេញៈ ស្របពេលដែលបដិវត្តន៍ឧស្សាហកម្ម ៤.០ កំពុងបោះជំហានទៅមុខកាន់តែលឿន នៅក្នុងប្រទេសកម្ពុជា ពេលបច្ចុប្បន្នគឺមានអ្នកជាប់កាតព្វកិច្ចពន្ធប្រមាណ ៩០ ភាគរយ កំពុងប្រើប្រាស់ប្រព័ន្ធកម្មវិធីអេឡិចត្រូនិកសម្រាប់បង់ពន្ធនៅអគ្គនាយកដ្ឋានពន្ធដារ។ នេះបើតាមថ្នាក់ដឹកនាំនៃអគ្គនាយកដ្ឋានពន្ធដារ (GDT)។
អគ្គនាយកនៃអគ្គនាយកដ្ឋានពន្ធដារ លោក គង់ វិបុល នៅក្នុងកិច្ចពិភាក្សាលើប្រធានបទ «ការចាប់យកសេវាសាធារណៈឌីជីថល» នៃវេទិការដ្ឋាភិបាលឌីជីថលនិងពិព័រណ៍បច្ចេកវិទ្យាឌីជីថល កាលពីសប្តាហ៍មុន បានលើកឡើងថា គិតចាប់ពីអំឡុងឆ្នាំ ២០១៣ រហូតដល់បច្ចុប្បន្ន អគ្គនាយកដ្ឋានពន្ធដារ បានកំពុងខិតខំធ្វើការកែទម្រង់មុតស្រួច ព្រមទាំងបានដកស្រង់បទពិសោធន៍ និងបច្ចេកទេសពីរដ្ឋបាលសារពើពន្ធនៃប្រទេសមួយចំនួន ដើម្បីធ្វើបរិវត្តកម្មរដ្ឋបាលសារពើពន្ធនៅកម្ពុជា ឱ្យក្លាយទៅជារដ្ឋបាលសារពើពន្ធទំនើប។ បច្ចុប្បន្នរដ្ឋបាលសារពើពន្ធកម្ពុជា អាចនិយាយថាដើរទាន់យុគសម័យឌីជីថល និងប្រកបទៅដោយសមត្ថភាព កម្រិតវិជ្ជាជីវៈខ្ពស់ ដែលផ្តល់លទ្ធភាព និងមធ្យោបាយល្អប្រសើរសម្រាប់អ្នកជាប់ពន្ធក្នុងការបំពេញកាតព្វកិច្ចសារពើពន្ធ។
លោកថ្លែងថា៖ «ជាលទ្ធផលបច្ចុប្បន្នមានអ្នកជាប់ពន្ធប្រមាណ ៩០ ភាគរយដែលកំពុងប្រើប្រាស់ប្រព័ន្ធកម្មវិធីអេឡិចត្រូនិករបស់អគ្គនាយកដ្ឋានពន្ធដារក្នុងការបំពេញកាតព្វកិច្ចសារពើពន្ធរបស់ខ្លួនប្រកបដោយភាពត្រឹមត្រូវ ងាយស្រួល និងចំណេញពេលវេលា»។
លោកបន្ថែមទៀតថា ការចាប់យកប្រព័ន្ធបច្ចេកវិទ្យាព័ត៌មានសម្រាប់ជាមធ្យោបាយក្នុងការផ្តល់សេវាអ្នកជាប់ពន្ធនេះ គឺមិនត្រឹមតែសម្រួលដល់ការបំពេញកាតព្វកិច្ចសារពើពន្ធរបស់អ្នកជាប់ពន្ធប៉ុណ្ណោះទេ ប៉ុន្តែថែមទាំងជួយបញ្ចៀសហានិភ័យកើតឡើងដោយឥតព្រាងទុកមួយចំនួនទៀត ជាក់ស្តែងស្ថិតក្នុងដំណាក់កាលនៃវិបត្តិជំងឺកូវីដ ១៩ ទោះបីជាមានការបិទខ្ទប់ និងបម្រាមក្នុងការធ្វើដំណើរ ក៏ការប្រមូលចំណូលពន្ធនៅតែរក្សាបានស្ថិរភាព។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែមីនា ថា បច្ចុប្បន្នរដ្ឋាភិបាលកម្ពុជាកំពុងសម្រួចយុទ្ធសាស្ត្រឌីជីថលរបស់ខ្លួនតាមរយៈការជំរុញអ្នកជាប់កាតព្វកិច្ចបង់ពន្ធទាំងអស់ឱ្យប្រើប្រាស់ប្រព័ន្ធឌីជីថល។ ប្រព័ន្ធនេះជួយឱ្យអ្នកជាប់កាតព្វកិច្ចពន្ធទទួលបានផលចំណេញទាំងថវិកា ពេលវេលា និងមិនមាននីតិវិធីស្មុគស្មាញ។
លោកបន្តថា យន្តការរបស់អគ្គនាយកដ្ឋានពន្ធដារនៅពេលនេះគឺការប្រើប្រាស់ e-filing System ដែលអនុញ្ញាតឱ្យម្ចាស់អាជីវកម្មអាចធ្វើការប្រកាសពន្ធប្រចាំខែតាមប្រព័ន្ធបច្ចេកវិទ្យា ដោយធ្វើបានពីគ្រប់ទីតាំង និងគ្រប់ពេលវេលា។
លោកថ្លែងថា៖ «នេះជាយន្តការល្អដែលជួយសម្រួលដល់ម្ចាស់អាជីវកម្ម និងអ្នកជាប់កាតព្វកិច្ចពន្ធទាំងអស់។ វាមានភាពខុសប្លែកពីមុនច្រើនដែលតម្រូវឱ្យត្រូវរង់ចាំ និងមិនមានចំណាយក្រៅផ្លូវការផងដែរ»។
លោកបន្តថា៖ «ក្នុងបរិបទនេះការប្រើប្រាស់ប្រព័ន្ធបច្ចេកវិទ្យា គឺមានភាពចាំបាច់នៅស្ទើរគ្រប់ដំណើរការអាជីវកម្ម។ ក្នុងនាមសមាគមបច្ចេកវិទ្យាឌីជីថលនៃកម្ពុជា យើងពិតជាចង់ចូលរួមជំរុញការប្រើប្រាស់ប្រព័ន្ធបច្ចេកវិទ្យាឱ្យបាន ១០០ ភាគរយ»។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការមកដល់នៃបដិវត្តន៍ឧស្សាហកម្ម ៤.០ ព្រមទាំងវត្តមានជំងឺកូវីដ ១៩ កាលពីដើមឆ្នាំ ២០២០ បានជំរុញឱ្យការប្រើប្រាស់បច្ចេកវិទ្យានៅកម្ពុជាបោះជំហានទៅមុខយ៉ាងលឿន។ សម្រាប់កំណើននៃការប្រើប្រាស់ប្រព័ន្ធបច្ចេកវិទ្យាក្នុងវិស័យពន្ធដារ គឺដោយសារប្រព័ន្ធនេះមានភាពងាយស្រួល និងជួយឱ្យអ្នកជាប់កាតព្វកិច្ចបង់ពន្ធមានភាពងាយស្រួល និងមិនមានការចំណាយក្រៅផ្លូវការ។
លោកបានបញ្ជាក់ទៀតថា៖«នេះជាដំណើរស្របទៅនឹងបរិបទនៃបដិវត្តន៍ឧស្សាហកម្មដែលកំពុងកើតមានក្នុងពេលនេះ។ ចំនួននៃអ្នកជ្រើសរើសយកការបង់ពន្ធយាមប្រព័ន្ធបច្ចេកវិទ្យានឹងបោះជំហានទៅមុខលឿនបន្ថែមទៀតនាពេលខាងមុខ»៕
