.jpg)
ការចូលចតនៃយន្តហោះរបស់ក្រុមហ៊ុនអាកាសចរណ៍កម្ពុជា អង្គរអ៊ែរ។ សហការី
ភ្នំពេញៈ ដើម្បីឆ្លើយតបនឹងការកើនឡើងតម្រូវការអ្នកដំណើរពេលបច្ចុប្បន្ន និងការប្តេជ្ញាចិត្តរបស់រដ្ឋាភិបាលកម្ពុជា និងឥណ្ឌា លើការលើកកម្ពស់វិស័យទេសចរណ៍ ពាណិជ្ជកម្ម និងការវិនិយោគ ក្រុមហ៊ុនអាកាសចរណ៍កម្ពុជា អង្គរអ៊ែរ (Cambodia Angkor Air) បានប្រកាសពីការចាប់ផ្តើមបើកការហោះហើរត្រង់ចាប់ពីថ្ងៃទី ១៦ ខែមិថុនា តទៅរវាងរាជធានីភ្នំពេញទៅទីក្រុងញូវដែលី។យោងតាមសេចក្តីប្រកាសរបស់ក្រុមហ៊ុន កម្ពុជា អង្គរអ៊ែរ កាលពីថ្ងៃទី ២៤ ខែមីនា ជើងហោះហើរត្រង់នឹងចាប់ផ្តើមពីថ្ងៃទី ១៦ ខែមិថុនា ដោយហោះហើរ ៤ ជើង ក្នុង ១ សប្តាហ៍។
ក្រុមហ៊ុនបានបញ្ជាក់ថា៖ «ការដាក់ឱ្យដំណើរការជើងហោះហើរថ្មីប្រកបដោយមោទនភាពរបស់យើងទៅកាន់ប្រទេសឥណ្ឌា នឹងចាប់ផ្តើមពីថ្ងៃទី ១៦ ខែមិថុនា ឆ្នាំ ២០២៤។ ក្រុមហ៊ុនកម្ពុជាអង្គរអ៊ែរនឹងចាប់ផ្តើមការធ្វើដំណើរដ៏អស្ចារ្យមួយនៅពេលយើងចាប់ផ្ដើមដំណើរការជើងហោះហើរត្រង់ដំបូងបំផុតពីភ្នំពេញទៅកាន់ទីក្រុងញូវដែលី ដោយហោះហើរចំនួន ៤ ជើង ក្នុង ១ សប្តាហ៍ ដើម្បីបម្រើដល់វិស័យទេសចរណ៍កម្ពុជា និងឥណ្ឌា នៅឆ្នាំ ២០២៤»។
បើតាមក្រុមហ៊ុន ផ្លូវហោះហើរថ្មីរវាងទីក្រុងភ្នំពេញ-ញូវដែលី គឺជាផ្នែកបន្ថែមនៃការប្តេជ្ញាចិត្តរបស់ក្រុមហ៊ុនក្នុងការបម្រើអ្នកដំណើរ ដោយផ្តល់ការតភ្ជាប់ដ៏ងាយស្រួលទៅគោលដៅដ៏អស្ចារ្យក្នុងរយៈពេលដ៏ខ្លីខាងមុខ។
ក្រុមហ៊ុនបន្ថែមថា៖ «ដំណើរទៅកាន់តំបន់អច្ឆរិយៈជាប្រវត្តិសាស្ត្រនៃប្រទេសទាំង ២ គឺជាសុបិនមួយក្លាយជាការពិតសម្រាប់អ្នកផ្សងព្រេងដែលស្វែងរកប្រាសាទជាច្រើន កន្លែងប្រវត្តិសាស្ត្រ និងតំបន់ព័ទ្ធជុំវិញដោយធម្មជាតិដ៏គួរឱ្យភ្ញាក់ផ្អើល។ ផ្លូវហោះហើរថ្មីនេះនឹងទាក់ទាញភ្ញៀវទេសចរ និងអ្នកធ្វើដំណើរធុរកិច្ចកាន់តែច្រើន ដែលរួមចំណែកដល់ការអភិវឌ្ឍវិស័យទេសចរណ៍ និងសេដ្ឋកិច្ចនៃប្រទេសទាំងពីរ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានប្រាប់ ភ្នំពេញ ប៉ុស្តិ៍ កាលពីថ្ងៃទី ៧ ខែមីនាថា ផែនការរបស់ក្រុមហ៊ុនអាកាសចរណ៍នេះក្នុងការចាប់ផ្ដើមដំណើរការហោះហើរត្រង់ទៅកាន់ប្រទេសឥណ្ឌានឹងនាំមកនូវអត្ថប្រយោជន៍យ៉ាងច្រើនដល់វិស័យទេសចរណ៍ និងពាណិជ្ជកម្មរវាងប្រទេសទាំង ២។ ទោះយ៉ាងណាលោកអះអាងថា ភាពជោគជ័យនៃប្រតិបត្តិការនេះ ក៏អាស្រ័យលើការកំណត់តម្លៃផងដែរ។
លោកនិយាយថា៖ «នេះជាដំណឹងល្អដែលយើងបានរង់ចាំអស់រយៈពេលជាច្រើនឆ្នាំមកហើយ។ ខ្ញុំបាននិយាយជាច្រើនដងហើយថា ទីផ្សារប្រទេសឥណ្ឌាមានសារៈសំខាន់ខ្លាំងណាស់ ពីព្រោះឥណ្ឌាជាប្រទេសដ៏អស្ចារ្យ បើនិយាយពីចំនួនអ្នកធ្វើដំណើរជុំវិញពិភពលោក។ បន្ទាប់ពីប្រទេសចិន ឥណ្ឌាគឺជាប្រទេសធំជាងគេ ហើយមានទាំងវប្បធម៌ និងប្រពៃណីដ៏យូរអង្វែង»។
បើតាមលោក ស៊ីណាន ទីផ្សារទេសចរណ៍ឥណ្ឌាត្រូវបានចែកជាបីប្រភេទគឺវប្បធម៌ និងប្រវត្តិសាស្ត្រការដើរទិញទំនិញ និងការកម្សាន្តពេលរាត្រី (ភាគច្រើនទៅប្រទេសថៃ) និងសាសនា។លោកបន្ថែមថា ភ្ញៀវឥណ្ឌាចូលចិត្តធ្វើដំណើរទៅភ្នំពេញ និងប្រាសាទបុរាណក្នុងខេត្តសៀមរាប និងបាត់ដំបង។
ក្រសួងទេសចរណ៍ឱ្យដឹងថា ភ្ញៀវទេសចរបរទេសចំនួន ៥,៤៥ លាននាក់ បានចូលមកប្រទេសកម្ពុជា កាលពីឆ្នាំ ២០២៣ កើនឡើង ១៣៩,៥ ភាគរយបើធៀបនឹងឆ្នាំ ២០២២ ដែលក្នុងនោះជនជាតិឥណ្ឌា មានចំនួន ៦៨,៨៣៦ នាក់ កើនឡើង ១០២,៤ ភាគរយ។ ភ្ញៀវឥណ្ឌាស្ថិតនៅលេខ ១៤ បន្ទាប់ពីជនជាតិថៃ វៀតណាម ចិន ឡាវ អាមេរិក កូរ៉េ ឥណ្ឌូនេស៊ី បារាំង អង់គ្លេស ម៉ាឡេស៊ី អូស្ត្រាលី ជប៉ុន និងរុស្ស៊ី។
កាលពីឆ្នាំ ២០១៩ កម្ពុជាស្វាគមន៍ភ្ញៀវទេសចរអន្តរជាតិច្រើនបំផុត ដែលមានចំនួនសរុប ៦,៦១ លាននាក់ កើនឡើង ៦,៦ ភាគរយធៀបនឹងឆ្នាំ ២០១៨ ដែលក្នុងនោះ ជនជាតិឥណ្ឌាមានចំនួន ៧៥ ២៨៦ នាក់ កើន ១៤,៣ ភាគរយ។
កាលពីឆ្នាំ ២០២៣ ទំហំពាណិជ្ជកម្មរវាងប្រទេសទាំង ២ មានចំនួន ៤៨៥,៧ លានដុល្លារ កើនឡើង ១០,៤ ភាគរយ បើធៀបនឹងឆ្នាំ ២០២២។ កម្ពុជាបាននាំចេញទំនិញទៅឥណ្ឌាតម្លៃ ២៩៣,០៦ លានដុល្លារ កើនឡើង ៤៩ ភាគរយ និងទំនិញនាំចូលពីឥណ្ឌា ១៩២,៦៤ លានដុល្លារ ធ្លាក់ចុះ ២០,៨ ភាគរយ។ ឥណ្ឌាគឺជាដៃគូពាណិជ្ជកម្មធំទី ១៧ របស់កម្ពុជា។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
