.jpg)
គណៈប្រតិភូនៃអគ្គនាយកដ្ឋានពន្ធដារកម្ពុជា បានចូលរួមសន្និសីទពន្ធដារកម្រិតខ្ពស់លើកទី១៣ នៃមូលនិធិរូបិយវត្ថុអន្តរជាតិ-ជប៉ុន កាលពីថ្ងៃទី២៥-២៦ ខែមេសា ឆ្នាំ២០២៤។ Lamy Mong
គណៈប្រតិភូនៃអគ្គនាយកដ្ឋានពន្ធដារកម្ពុជា បានចូលរួមសន្និសីទពន្ធដារកម្រិតខ្ពស់លើកទី១៣ នៃមូលនិធិរូបិយវត្ថុអន្តរជាតិ-ជប៉ុន សម្រាប់ ប្រទេសក្នុងតំបន់អាស៊ី សហរៀបចំដោយរដ្ឋាភិបាលជប៉ុន និងមូលនិធិរូបិយវត្ថុអន្តរជាតិ (IMF) កាលពីថ្ងៃទី២៥-២៦ ខែមេសា ឆ្នាំ២០២៤។
សន្និសីទនេះប្រព្រឹត្តទៅដោយមានការចូលរួមពីថ្នាក់ដឹកនាំ និងជំនាញការនៃរដ្ឋបាលសារពើពន្ធ និងក្រសួងហិរញ្ញវត្ថុ នៃ២១ ប្រទេស-តំបន់រដ្ឋបាលពិសេស នៅទ្វីបអាស៊ី និងមូលនិធិរូបិយវត្ថុអន្តរជាតិ (IMF) ធនាគារអភិវឌ្ឍន៍អាស៊ី (ADB) និងអង្គការសម្រាប់កិច្ចសហប្រតិបត្ដិការសេដ្ឋកិច្ច និងអភិវឌ្ឍន៍ (OECD) ព្រមទាំងសាស្ដ្រាចារ្យនៃសាកលវិទ្យាល័យ ដោយផ្ដោតលើការពិភាក្សាដោះស្រាយបញ្ហាប្រឈមពន្ធសកលដែលកំពុងកើតមាន។
លោក Kenji Okamura អនុប្រធានគ្រប់គ្រង IMF និងលោក Shuichi Hosoda ឧបការីរដ្ឋមន្ត្រីនៃ ក្រសួងហិរញ្ញវត្ថុនៃប្រទេសជប៉ុន បានមានមតិស្វាមគមន៍និងបើកសន្និសីទ ដោយបានវាយតម្លៃខ្ពស់ចំពោះការចូលរួមរបស់ គ្រប់ភាគីពាក់ព័ន្ធទាំងអស់។
សន្និសីទរយៈពេល ២ថ្ងៃនេះ បានចាប់ផ្តើមដោយពិភាក្សាលើខ្លឹមសារសំខាន់ៗនៃបញ្ហាប្រឈមផ្នែកពន្ធកំពុងកើនឡើងជាសកល ដូចជា និន្នាការពន្ធដារនៅតំបន់អាស៊ី ដោយផ្តោតលើបញ្ហាប្រឈមក្នុងការប្រមូលចំណូល ស្របពេលដែលការចំណាយ មានការកើនឡើង រួមទាំងបញ្ហាពន្ធអន្តរជាតិ ដែលផ្តោតលើផលប៉ះពាល់និងគោលនយោបាយសារពើពន្ធក្នុងស្រុក ឆ្លើយតបទៅនឹងការអនុវត្ត និងសសរស្តម្ភទី២ នៃក្របខ័ណ្ឌប្រកបដោយបរិយាបន្ន និងបញ្ហាប្រឈមចំពោះរដ្ឋបាលសារពើពន្ធអន្តរជាតិ។
យោងតាមនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា៖ «ប្រធានបទសំខាន់ៗដទៃទៀត រួមមាន ការប្រមូលពន្ធលើរូបវន្តបុគ្គលដែលមានចំណូលខ្ពស់ ដែលជាការឆ្លើយតបទៅនឹងការកើនឡើងនៃគម្លាតប្រាក់ចំណូល របស់បុគ្គល, ការកំណត់តម្លៃកាបូនឆ្លើយតបទៅនឹងផលប៉ះពាល់ពីបម្រែបម្រួលអាកាសធាតុ អភិវឌ្ឍជាសកល មកលើកំណើនសេដ្ឋកិច្ចនិងការកសាងសមត្ថភាពជំនាញពន្ធដារ តាមរយៈអភិបាលកិច្ចនិងគណនេយ្យភាព ដែលផ្តោតលើបញ្ហាប្រឈមក្នុង ការអនុវត្តគោលនយោបាយសារពើពន្ធ និងរដ្ឋបាលសារពើពន្ធ និងបច្ច័យនៃឌីជីថលូបនីយកម្មនិងបញ្ញាសិប្បនិម្មិត (AI)»។
លោក សេង ជាសិទ្ធ ប្រធាននាយកដ្ឋាននីតិកម្ម គោលនយោបាយ សារពើពន្ធ និងសហប្រតិបត្តិការពន្ធដារអន្តរជាតិ (ន.ន.គ.ស.អ) ត្រូវបានដកស្រង់សម្ដីដោយបានថ្លែងថា៖ «ការអនុវត្តយុទ្ធសាស្ត្រកៀរគរចំណូល និងការកសាងសមត្ថភាពជំនាញពន្ធដារ តាមរយៈអភិបាលកិច្ច និងគណនេយ្យភាព»។
ចំពោះប្រធានបទទី២ លោក ម៉ុង ឡាមី ប្រធានការិយាល័យគោលនយោបាយសារពើពន្ធ នៃ ន.ន.គ.ស.អ បានលើកឡើង អំពីការអនុវត្តការងារជាក់ស្តែងរបស់ អគ្គនាយកដ្ឋានពន្ធដារ អនុលោមតាម ទិសដៅ គោលនយោបាយ របស់រាជរដ្ឋាភិបាល ដែលមានចែងក្នុងយុទ្ធសាស្ត្រ ចតុកោណ ទាំង ៤ ដំណាក់កាល យុទ្ធសាស្ត្របញ្ចកោណ ដំណាក់កាលទី ១ កម្មវិធីកំណែទម្រង់ការគ្រប់គ្រងហិរញ្ញវត្ថុ សាធារណៈ ដំណាក់កាល ទី ១ ដល់ទី ៤ និង យុទ្ធសាស្ត្រកៀរគរចំណូល ២០១៤-២០១៨ និង ២០១៩-២០២៣ ។
វាបានគូសបញ្ជាក់ពីការអនុវត្តប្រកបដោយជោគជ័យនៃផែនការយុទ្ធសាស្រ្តឆ្នាំ ២០១៩-២០២៣ និងការខិតខំប្រឹងប្រែងបន្តក្រោមផែនការយុទ្ធសាស្រ្តឆ្នាំ ២០២៤-២០២៨ ដែលមានគោលបំណងបង្កើតការគ្រប់គ្រងពន្ធដារប្រកបដោយការគោរព និងជឿទុកចិត្ត។
សន្និសីទនេះបានសង្កត់ធ្ងន់លើសារៈសំខាន់នៃអភិបាលកិច្ច និងគណនេយ្យភាពក្នុងការកសាងជំនាញពន្ធដារ ដែលមានសារៈសំខាន់សម្រាប់គោលនយោបាយសារពើពន្ធ និង ការគ្រប់គ្រងពន្ធដារប្រកបដោយប្រសិទ្ធភាព៕
