កាលពីថ្ងៃទី ៤ ខែ ឧសភា កន្លងទៅនេះ Smart បានធ្វើការកែលម្អថ្មីលើកម្មវិធីស្ដាប់ចម្រៀងរបស់ខ្លួន ឈ្មោះថា Smart Music ដែលអាចបញ្ចូលបានដោយសេរី និងផ្ដល់ជូនលទ្ធភាពស្ដាប់បទចម្រៀងអន្តរជាតិកំពូលៗជាង ១ លានបទ ព្រមជាមួយបទចម្រៀងខ្មែរនិពន្ធថ្មីៗផងដែរ។
លោក Thomas Hundt អគ្គនាយក Smart មានប្រសាសន៍ថា៖ «Smart Music បានអភិវឌ្ឍលើសពីកម្មវិធីស្ដាប់ចម្រៀងទៅទៀត។ កម្មវិធីនេះបានដើរតួនាទីសំខាន់ក្នុងការលើកកម្ពស់សិល្បករក្នុងស្រុក តាមរយៈការផ្ដល់ជាវេទិកាសម្រាប់ផ្សព្វផ្សាយបទចម្រៀងក្នុងស្រុករបស់ពួកគាត់ ទាក់ទាញអ្នកគាំទ្រថ្មីៗ និងទទួលប្រាក់ចំណូលពីស្នាដៃរបស់ខ្លួន»។
Smart Music អាចប្រើបានតាមរយៈ https://music.smart.com.kh/discover ដែលអនុញ្ញាតឲ្យអ្នកស្រឡាញ់តន្ត្រីស្ដាប់ចម្រៀងដែលខ្លួនចូលចិត្តតាមកុំព្យូទ័រ ដោយអាចភ្ជាប់ជាមួយនឹងកម្មវិធីលើទូរស័ព្ទចល័តយ៉ាងងាយស្រួល ហើយកម្មវិធី Smart Music បន្តផ្ដល់ជូនដោយឥតគិតថ្លៃដល់អ្នកប្រើប្រាស់ប្រព័ន្ធទូរស័ព្ទ Smart និងអាចស្វែងរកបានលើ App Store និង Google Play Store៕