កាលពីថ្ងៃទី២១ ខែតុលា កន្លងទៅនេះ ក្រុមហ៊ុនធានារ៉ាប់រងជីវិត អេ អាយ អេ (ខេមបូឌា) ឡាយហ្វ៍ អ៊ិនសួរេន ម.ក (“អេ អាយ អេ ខេមបូឌា”) បានរៀបចំព្រឹត្តិការណ៍ “Fit for Hope” ដើម្បីជួយគាំទ្រមន្ទីរពេទ្យព្រះសីហនុមណ្ឌលនៃក្តីសង្ឃឹម (“SHCH”)ក្នុងកិច្ចខំប្រឹងប្រែងរបស់ខ្លួនលើការលើកកម្ពស់ការយល់ដឹង និងព្យាបាលជំងឺមហារីកសុដន់។ SHCH ជាមន្ទីរពេទ្យសប្បុរសធម៌មួយ មានកម្មវិធីព្យាបាលជំងឺមហារីកសុដន់យូរជាងគេបំផុតនៅកម្ពុជា។ ព្រឹត្តិការណ៍នេះបានធ្វើឡើងនៅ Central Park Sports Complex បឹងកក់ បើកឲ្យចូលរួមដោយសេរី ដោយមានផ្តល់ជូននូវការពិនិត្យ និងការអប់រំអំពីជំងឺមហារីកសុដន់ ពីអ្នកជំនាញមកពីមន្ទីរពេទ្យព្រះសីហនុមណ្ឌលនៃក្តីសង្ឃឹម។ ព្រឹត្តិការណ៍ “Fit for Hope” នេះមានការចូលរួមពីសាធារណជនប្រមាណ១៥០០នាក់ ដែលបានចូលរួមរីករាយហាត់យោគៈ និងរាំហ្សូមបា សកម្មភាពកម្សាន្តបែបក្រុមគ្រួសារ និងម្ហូបអាហារសុខភាពជាច្រើន។ នៅល្ងាចនោះផងដែរក៏មានការប្រគំតន្ត្រីសប្បុរសធម៌ ដែលមានការសម្តែងដោយតារាចម្រៀង ពេជ្រ សោភា, ទេព បូព្រឹក្ស, ចិត្ត កញ្ចនា និងក្រុម SmallWorld SmallBand។ ព្រឹត្តិការណ៍ “Fit for Hope” បានទទួលការឧបត្ថម្ភគាំទ្រចំនួន ១០០០០ ដុល្លារអាមេរិកសម្រាប់មន្ទីរពេទ្យព្រះសីហនុ មណ្ឌលនៃក្តីសង្ឃឹមដែលថវិកាទាំងនេះនឹងប្រើប្រាស់សម្រាប់កម្មវិធីអប់រំ និងព្យាបាលជំងឺមហារីកសុដន់៕ រូបថតដោយ អេ អាយ អេ ខេមបូឌា