.jpg)
កាលពីថ្ងៃទី២១ ខែតុលា កន្លងទៅនេះ ក្រុមហ៊ុនតូយ៉ូតា (ខេមបូឌា)បានសហការជាមួយក្រុមតន្ត្រី Royal Philharmonic concert Orchestra រៀបចំកម្មវិធីប្រគំតន្ត្រីសប្បុរសធម៌ តូយ៉ូតា ក្លាស៊ិក ឆ្នាំ២០១៧ ជាលើកទី៥ នៅប្រទេសកម្ពុជា នៅសាលមហោស្រពចតុមុខ ដោយមានការយាងចូលរួមក្រោមព្រះរាជាធិបតីភាពដ៏ខ្ពង់ខ្ពស់ ពីព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ការប្រគំតន្ត្រីសប្បុរសធម៌តូយ៉ូតា ក្លាស៊ិក នោះក៏មានការចូលរួមសម្ដែងពីសិល្បករខ្មែរលោក អៀង ស៊ីធុល ផងដែរ ដោយលោកបានលើកយកបទចម្រៀង រាត្រីជួបភក្ត្រ ដែលជាស្នាដៃនិពន្ធរបស់ អតីតព្រះមហាវីរក្សត្រ ព្រះបាទនរោត្តម សីហនុ ព្រះបរមរតនកោដ្ឋ ជាទីគោរពសក្ការៈ ដ៏ខ្ពង់ខ្ពស់បំផុតនៃព្រះរាជាណាចក្រកម្ពុជា និងបទចម្រៀង ចំប៉ីសៀមរាបផងដែរ។ លោកឧកញ៉ា គង់ នួន ប្រធានក្រុមហ៊ុន តូយ៉ូតាបានមានប្រសាសន៍ថា ថវិកាទាំងអស់ដែលប្រមូលបានពីការលក់សំបុត្រ នឹងត្រូវប្រគល់ជូនមន្ទីរពេទ្យគន្ធបុប្ផាដោយផ្ទាល់នាខែវិច្ឆិកាខាងមុខ។ដោយទឹកប្រាក់ដែលបានពីការលក់សំបុត្រចូលទស្សនាការប្រគំតន្ត្រីល្ងាចនោះ បានចំនួន ២២ ៤៧០ដុល្លារ (ពីរម៉ឺនពីរពាន់ បួនរយចិតសិបដុល្លារអាមេរិក)។ ដោយឡែកក្រុមហ៊ុន តូយ៉ូតា ក៏បានបរិច្ចាគថវិកាផ្ទាល់ខ្លួន ដល់មន្ទីរពេទ្យ គន្ធបុប្ផា ចំនួន២៣ ០០០ដុល្លារអាមេរិក ដោយមិនបូកបញ្ចូលថវិកាលក់សំបុត្រឡើយ៕
រូបថតដោយ ក្រុមហ៊ុនតូយ៉ូតា (ខេមបូឌា)
