ព្រឹត្តិការណ៍ភាពយន្តដ៏ធំប្រចាំឆ្នាំឈ្មោះថា មហោស្រពភាពយន្តអន្តរជាតិកម្ពុជា នឹងប្រារព្ធធ្វើជាលើកទី៧ នាដើមខែមីនា ឆ្នាំ២០១៧ ខាងមុខនេះហើយ ខណៈអ្នកស្រី អេនជេលីណា ជោលី បន្តវត្តមានធ្វើជាប្រធានកិត្តិយសនៃព្រឹត្តិការណ៍ឆ្នាំនេះទៀតផងដែរ។ ព្រឹត្តិការណ៍នេះធ្វើឡើង ដើម្បីជួយដល់ការរីកចម្រើនវិស័យភាពយន្ត ពេលអនាគតនៅកម្ពុជា និងភាពស្ថិតស្ថេរយូរអង្វែង។ សម្រាប់ខ្សែភាពយន្តខ្មែរ ដែលចាក់បញ្ចាំងក្នុងមហោស្រពភាពយន្តអន្តរជាតិកម្ពុជាលើកទី៧ នេះរួមមានរឿង «ភៀសខ្លួន» របស់លោក ប៉ាន់ រិទ្ធី រឿង «ការពារឧក្រិដ្ឋជន» របស់ ជីមមី ហ៊ិនដឺសុន រឿង «ប៉ុបពីទៅលេងហូលីវូដ» របស់លោក សុខ វិសាល រឿង «វិកលចរិត» របស់លោក ហ៊ុយ យ៉ាឡេង រឿង «កោះពេជ្រ» របស់ ដាវី ជូ និងរឿងខ្លី «សតិជាប់ទ្រុង» របស់លោក អាមីត ឌុយបៃ និយាយភាសាខ្មែរ និងផលិតនៅកម្ពុជា៕ រូបថត ហុង មិនា