កាលពីថ្ងៃទី៤ ខែកញ្ញា ស្រាបៀរអង្គរ បានរៀបចំពិធីអបអរសាទរ លើកទឹកចិត្តជយលាភី ដែលដណ្តើមបានមេដាយមកកាន់មាតុប្រទេសវិញ ក្នុងព្រឹត្តិការណ៍ស៊ីហ្គេមលើកទី២៩ ឆ្នាំ២០១៧ ដែលបានរៀបចំឡើងនៅទីក្រុងគូឡាឡំាពួ ប្រទេសម៉ាឡេស៊ីកន្លងទៅនេះ។ នៅក្នុងការប្រកួតលើកនេះ អត្តពលិកខ្មែរ ទទួលបានលទ្ធផលគាប់ប្រសើរជាងមុន ដោយដណ្តើមបានមេដាយសរុបចំនួន១៧គ្រឿង ក្នុងនោះមានមេដាយមាស៣គ្រឿង មេដាយប្រាក់២គ្រឿង និងមេដាយសំរឹទ្ធ១២គ្រឿង បើប្រៀបធៀបកាលពីឆ្នាំ២០១៥ យើងទទួលបានត្រឹមតែមេដាយមាស១គ្រឿង និងមេដាយប្រាក់៥គ្រឿង និងមេដាយសំរឹទ្ធ ៩គ្រឿងប៉ុណ្ណោះ។ នៅក្នុងពិធីនោះលោក អ៊ុង គីកុង នាយកគ្រប់គ្រងផ្នែកលក់ក្រុមហ៊ុនស្រាបៀរកម្ពុជាខេមប្រ៊ូវ បានសម្តែងការស្ងើចសរសើរ និងគោរពចំពោះអត្តពលិកកម្ពុជាដែលបានចូលរួមប្រកួតនៅក្នុងព្រឹត្តិការណ៍កីឡាស៊ីហ្គេមលើកទី២៩នេះ។ ជាផ្នែកមួយនៃកិច្ចសហការគ្នាជាមួយគណៈកម្មាធិការជាតិអូឡាំពិកកម្ពុជា (NOCC) ស្រាបៀរអង្គរនឹងជូនរង្វាន់លើកទឹកចិត្តជាទឹកប្រាក់៦ពាន់ដុល្លារ ៣ពាន់ដុល្លារ និង១ពាន់ដុល្លារអាមេរិក ចំពោះអត្តពលិកវិញ្ញាសាឯកត្តជនដែលឈ្នះមេដាយមាស ប្រាក់ និងសំរឹទ្ធ។ ចំណែកអត្តពលិកដែលប្រកួតវិញ្ញាសាជាក្រុមនឹងទទួលបានរង្វាន់លើកទឹកចិត្តជាទឹកប្រាក់៨ពាន់ដុល្លារ ៥ពាន់ដុល្លារ និង៣ពាន់ដុល្លារសម្រាប់ជយលាភីមេដាយ មាស ប្រាក់ និងសំរឹទ្ធ៕ រូបថត ហេង ជីវ័ន