Headlines:

គម្រោង Dawei អាច​ចាប់​ផ្តើម​នៅ​ខែ​មេសា



121109_14
អគ្គនាយកក្រុមហ៊ុន Dawei Development បង្ហាញ​ប្លង់​គម្រោង​ Dawei។ Reuters

ក្រុង​បាងកកៈ ប្រទេស​ថៃ និង​ប្រទេស​មីយ៉ាន់ម៉ា រំពឹង​ថា​នឹង​សិក្សា​បញ្ចប់​ពី​ផែនការ​លម្អិត​នៃ​ផែនការ​អភិវឌ្ឍន៍​រួមគ្នា​សម្រាប់​គម្រោង​វិនិយោគ​ដ៏​ធំ​នៅ​Dawei ក្នុង​រយៈ​ពេល​បី​ឬ​បួន​ខែ​ខាង​មុខ​នេះ ដើម្បី​ឲ្យ​គម្រោង​សាង​សង់​អាច​ចាប់​ផ្តើម​ដំណើរ​ការ​បាន​នៅ​ខែ​មេសា​ឆ្នាំ​ក្រោយ​នេះ។

កាល​ពី​ថ្ងៃ​ពុធ ប្រទេស​ទាំង​ពីរ បាន​បញ្ជាក់​ជា​ថ្មី​នូវ​ការ​ប្តេជ្ញា​ចិត្ត​របស់​ខ្លួន​ចំពោះ​គម្រោង​អភិវឌ្ឍន៍​រួម​គ្នា​នៃ​តំបន់​សេដ្ឋកិច្ច​ពិសេស​ដែល​មាន​តម្លៃ ៥០​ពាន់​លាន​ដុល្លារ និង​កំពង់​ផែ​ទឹក​ជ្រៅ​នៅ​ភាគ​ខាង​កើត​ប្រទេស​មីយ៉ាន់ម៉ា ក្នុង​អំឡុង​ពេល​ទស្សនកិច្ច​របស់​លោក Nyan Tan អនុ​ប្រធានា​ធិបតី​មីយ៉ាន់ម៉ា​មក​កាន់​ទីក្រុង​បាង​កក។

លោក Nyan Tan ដែល​ជា​ប្រធាន​គណៈ​កម្មាធិការ​ចម្រុះ​ជាន់​ខ្ពស់​មីយ៉ាន់ម៉ា​ថៃ​សម្រាប់​គម្រោង​អភិវឌ្ឍន៍​ដ៏​ធំ​នៃ​តំបន់​សេដ្ឋកិច្ច​ពិសេស Dawei និង​តំបន់​គម្រោង​ពាក់​ព័ន្ធ​របស់​គម្រោង​នេះ​ដែរ​នោះ បាន​ជួប​ពិភាក្សា​ជា មួយ​លោក​ស្រី​នាយក​រដ្ឋ​មន្ត្រី​យីងឡាក់ ស៊ីណាវ៉ាត្រា និង​លោក Kittiratt Na-Ranong ឧបនាយករដ្ឋ​មន្ត្រី​ និង​ជា​រដ្ឋ​មន្ត្រី​ហិរញ្ញវត្ថុ​ថៃ ដែល​ជា​សហប្រធាន​ក្នុង​គណៈ​កម្មាធិការ​ចម្រុះ​ជាន់​ខ្ពស់​មីយ៉ាន់ម៉ា-ថៃ​នេះ។

បន្ទាប់​ពី​កិច្ច​ប្រជុំ​នេះ លោក Kittiratt ថ្លែង​ថា គណៈកម្មា​ធិការ​រង​ចំនួន​៦ ត្រូវ​បាន​ចាត់​តាំង​និង​ចាប់​ផ្តើម​ធ្វើ​ការ​ជា​បន្ទាន់។ កិច្ច​ការ​របស់​គណៈ​កម្មាធិការ​រង​ទាំង​នេះ នឹង​ត្រូវ​បញ្ចូន​មក​ពិភាក្សា​នៅ​ក្នុង​កិច្ច​ប្រជុំ​របស់​គណៈ​កម្មាធិការ​សម្រប​សម្រួល​នៅ​ទីក្រុង Nay Pyi Taw នៅ​ខែ​ក្រោយ​នេះ ដែល​មាន​លោក Niwatthamrong Bunsongphaisan ប្រធាន​ខុទ្ទកា​ល័យ​នាយករដ្ឋ​មន្ត្រី​ថៃ និង​រដ្ឋ​មន្ត្រី​ក្រសួង​ឧស្សាហកម្ម​មីយ៉ាន់​ម៉ា​ធ្វើ​ជា​ប្រធាន​ក្នុង​កិច្ច​ប្រជុំ​នេះ។

ដោយ​បដិសេធ​មិន​បញ្ជាក់​ថា​តើ​រដ្ឋាភិបាល​ថៃ​នឹង​ចំណាយ​ថវិកា​សម្រាប់​ការ​អភិវឌ្ឍន៍​រួម​គ្នា​នូវ​គម្រោង​វិនិយោគ​នៅ​មីយ៉ាន់ម៉ា​នេះឬ​អត់​នោះ​លោក​Kittiratt បាន​បន្ត​ថា គណៈ​កម្មាធិការ​ចម្រុះ​ជាន់​ខ្ពស់​មីយ៉ាន់ម៉ា-ថៃ នឹង​ជួប​ប្រជុំ​ម្តង​ទៀត​នៅ​ខែ​មីនា​ខាង​មុខ​នេះ​ដើម្បី​សិក្សា​បញ្ចប់​ពី​ព័ត៌មាន​លម្អិត​នៃ​គម្រោង​Dawei នេះ។

លោក បាន​បន្ត​ថា​៖ «​ភាគី​ទាំង​ពីរ យល់​ស្រប​ថា​គម្រោង​វិនិយោគ​នេះ មិន​ត្រឹម​តែមាន​សារៈ​សំខាន់​សម្រាប់​ប្រទេស​ថៃ និង​មីយ៉ាន់ម៉ា​ប៉ុណ្ណោះ​ទេ ថែម​ទាំង​សម្រាប់​មហា​អនុតំបន់​មេគង្គ​ទាំង​មូល​រួម​ទាំង​ពិភពលោក​ទាំង​មូល​ផង​ដែរ ដោយ​សារ​គម្រោង​នេះ នឹង​តភ្ជាប់​តំបន់​ប៉ាស៊ីហ្វិក​ទៅ​កាន់​សមុទ្រ Andaman»។

លោក​បញ្ជាក់​ថា តែ​ដោយ​សារ​ថា គម្រោង Dawei មាន​ទំហំ​ធំ​ពេក ការ​អភិវឌ្ឍ​នេះ នឹង​ត្រូវ​ធ្វើ​ឡើង​ជា​ជំហានៗ ដោយ​ចាប់​ផ្តើម​ពី​ឧស្សាហកម្ម​ធុន​ស្រាល និង​ប្រើ​ប្រាស់​កម្លាំង​ពលកម្ម​ច្រើន​ជា​មុន​សិន ទើប​គម្រោង​អភិវឌ្ឍន៍​ឧស្សាហកម្ម​ធុន​ធ្ងន់ ចាប់​ផ្តើម​ដំណើរ​ការ​ជា​ក្រោយ៕ BP