Headlines:

សន្ទស្សន៍​តម្លៃ​ម្ហូប​អាហារ​​លើ​ទីផ្សារ​​ខែ​តុលា​​​ធ្លាក់ចុះ​



121109_12b
អង្ករដែលអាជីវករ​លក់​ដោយដាក់​​បង្ហាញ​ពី​តម្លៃ​​តាម​ប្រភេទ​នីមួយៗ។ ម៉េង ស្រ៊ុន

ភ្នំពេញៈ សន្ទស្សន៍​ថ្លៃ​ទំនិញ​ប្រើ​ប្រាស់​ដែល​ចេញ​ផ្សាយ​ម្សិល​មិញ​ដោយ​អង្គ​ការ​ស្បៀង និង​កសិ​កម្ម (FAO)​បង្ហាញ​ថា តម្លៃ​ម្ហូប​អាហារ​នៅ​លើ​ពិភព​លោក​បាន​ធ្លាក់​ចុះ១​ភាគ​រយ​ឬ​២​ចំណុច​នៅ​ខែ​តុលា ២០១២​។

សន្ទស្សន៍​ប្រចាំ​ខែ មាន​អត្រា​ជា​មធ្យម ២១៣​ចំណុច បើ​ធៀប​អត្រា​កាល​ពី​ខែ​កញ្ញា ដែល​មាន ២១៥​ចំណុច​។

យោង​តាម FAO ការ​ធ្លាក់​ចុះ​នេះ ភាគ​ច្រើន​បណ្តាល​មក​ពី​ថ្លៃ​ម្ហូប​អាហារ​នៅ​លើ​ទី​ផ្សារ​អន្តរជាតិ ធ្លាក់​ចុះ ដូច​ជា​គ្រាប់​ធញ្ញ​ជាតិ ប្រេង និង​ខ្លាញ់ ប៉ុន្តែ​ថ្លៃ​អាហារ​ដែល​រួម​មាន​ទឹក​ដោះ​គោ និង​ស្ករ បែរ​ជា​ឡើង​ថ្លៃ​ទៅ​វិញ។

ក្នុង​រយៈ​ពេល​១០​ខែ​ឆ្នាំ​នេះ តម្លៃ​ម្ហូប​ជា​មធ្យម​គឺ​៨​ចំណុច ទាប​ជាង​រយៈ​ពេល​ដូច​គ្នា កាល​ពី​ឆ្នាំ​មុន។​នេះ​បើ​តាម FAO​ដែល​មាន​មូល​ដ្ឋាន​នៅ​ទីក្រុង​រ៉ូម។

សន្ទស្សន៍​នោះ​បាន​បង្ហាញ​ថា​តម្លៃ​ស្រូវ​សាលី និង​ពោត បាន​ធ្លាក់​ថ្លៃ​តិច​តួច ខណៈ​ដែល​តម្លៃ​អង្ករ ស្ថិត​នៅ​ថេរ។

លោក យ៉ង សាំង​កុមារ ប្រធាន​មជ្ឈ​មណ្ឌល​កម្ពុជា​សម្រាប់​ការ​សិក្សា និង​អភិវឌ្ឍន៍​កសិកម្ម (សេដាក)​បាន​ឲ្យ​ដឹង​ថា ការ​ប្រែ​ប្រួល​តម្លៃ​អង្ករ​នៅ​លើ​ពិភព​លោក ប៉ះ​ពាល់​ដល់​ទី​ផ្សារ​កម្ពុជា។ លោក​បន្ត​ថា តម្លៃ​អង្ករ​ធម្មតា​នៅ​កម្ពុជា​នៅ​ថេរ បើ​ធៀប​នឹង​ខែ​មុន និង​ឆ្នាំ​មុន ដោយ​សារ​តម្លៃ​អង្ករ​នៅ​លើ​ទី​ផ្សារ​អន្តរជាតិ ស្ថិត​នៅ​ថេរ​។

លោក យ៉ង សាំង​កុមារ បាន​លើក​ឡើង​ថា កសិករ​បាន​លក់​ស្រូវ​របស់​ខ្លួន​ស្ទើរ​តែ​ទាំង​អស់​ក្នុង​អំឡុង​រដូវ​ច្រូត​កាត់ ដូច្នេះ​តម្លៃ​នឹង​មិន​ប៉ះ​ពាល់​ច្រើន​ដល់​កសិករ​ឡើយ ពេល​រដូវ​ច្រូត​កាត់​ថ្មី​ចូល​មក​ដល់​នៅ​ចុង​ខែ​វិច្ឆិកា​នេះ។

សន្ទស្សន៍​តម្លៃ​ម្ហូប​អាហារ​របស់ FAO ទាប​ជាង​សន្ទស្សន៍​កាល​ពី​ខែ​កុម្ភៈ ឆ្នាំ​២០១១ ដែល​មាន ២៣៨​ចំណុច និង​ធ្លាក់​ចុះ​៣​ចំណុច បើ​ធៀប​នឹង​សន្ទស្សន៍​កាល​ពី​ខែ​តុលា ឆ្នាំ​២០១១ ដែល​មាន​២១៦។ សន្ទស្សន៍​តម្លៃ​ម្ហូប​អាហារ​របស់ FAO ជា​ការ​វាស់​វែង​ការ​ប្រែ​ប្រួល​តម្លៃ​ម្ហូប​អាហារ​ប្រចាំ​ខែ​លើ​មុខ​ទំនិញ​មួយ​ចំនួន​នៅ​ទី​ផ្សារ​អន្តរ​ជាតិ៕CS

This content has been locked. You can no longer post any comments.
Show/hide comments
busy