Headlines:

ចិន អាច​ផ្អាក​ទម្លាក់​ទុន​បម្រុង​កាតព្វកិច្ច



121121_14
បុគ្គលិក​ធនាគារ​ កំពុង​រាប់​ប្រាក់ដុល្លារ​ក្នុង​ខេត្ត Liaoning។ Reuters

ក្រុង​ប៉េកាំងៈ ប្រទេស​ចិន អាច​នឹង​ផ្អាក​ទម្លាក់​អនុបាត​ប្រាក់​បម្រុង​កាតព្វកិច្ច​របស់​ធនាគារ​ក្នុង​រយៈ​ពេល​ប៉ុន្មាន​ខែ​ចុង​ក្រោយ​ក្នុង​ឆ្នាំ​នេះ បន្ទាប់​ពី​ការ​ធ្លាក់​ចុះ​នៃ​សេដ្ឋកិច្ច មាន​សភាព​ធូរ​ស្រាល​ហើយ​ធនាគារ​កណ្តាល​ចិន បាន​បង្កើន​ការ​ប្រើ​ប្រាស់​ឧបករណ៍​ផ្សេង​មួយ​ទៀត​របស់​ខ្លួន​ដើម្បី​សម្រប​សម្រួល​មូលនិធិ​នៅ​ក្នុង​ប្រព័ន្ធ​ហិរញ្ញវត្ថុ​។

យោង​តាម​ការ​ព្យាករ​ជា​មធ្យម​របស់​ក្រុម​សេដ្ឋ​វិទូ​ដែល​បាន​ធ្វើ​ឡើង​កាល​ពី​ថ្ងៃ​ទី​១៤ ដល់​ទី​១៩​ខែ​វិច្ឆិកា​និង​អង្កេត​ដោយ​ទីភ្នាក់​ងារ​ព័ត៌មាន Bloomberg បាន​ឲ្យ​ដឹង​ថា ធនាគារ​កណ្តាល​ចិន អាច​នឹង​រក្សា​អនុបាត​ប្រាក់​បម្រុង​កាតព្វកិច្ច​ក្នុង​អត្រា​២០​ភាគ​រយ​ដដែល​សម្រាប់​ធនាគារ​ធំៗ​ធៀប​នឹង​ការ​ព្យាករ​ដែល​ថា ធនាគារ​នេះ អាច​នឹង​ទម្លាក់​អនុបាត​ប្រាក់​បម្រុង​កាតព្វកិច្ច​០,៥​ភាគ​រយ​កាល​ពី​ខែ​មុន និង​១​ភាគ​រយ​ដែល​បាន​ព្យាករ​កាល​ពី​ខែ​កញ្ញា​។

ការ​ផ្លាស់​ប្តូរ​ការ​ព្យាករ​នេះ ឆ្លុះ​បញ្ចាំង​ពី​កំណើន​ទិន្នផល​ឧស្សាហកម្ម និង​ការ​លក់​រាយ​ក្នុង​រយៈ​ពេល​ពីរ​ខែ​ជាប់​គ្នា ព្រម​ទាំង​ភាព​ស្ទាក់​ស្ទើរ​របស់​រដ្ឋាភិបាល​ចិន ក្នុង​ការ​បង្កើន​វិធាន​ការ​ជំរុញ​សេដ្ឋកិច្ច​កាន់​តែ​ខ្លាំង ខណៈ​មេដឹក​នាំ​ថ្មី​របស់​ចិន គឺ​លោក ស៊ី ជីនពីង​ឡើង​កាន់​អំណាច​។​ធនាគារ​កណ្តាល​ចិន កំពុង​ប្រើ​ប្រាស់​កិច្ច​ព្រម​ព្រៀង​ទិញ​មូល​បត្រ​បំណុល (reverse-repurchase agreements) ដើម្បី​ស្រូប​យក​សាច់​ប្រាក់​ចូល​និង​ចេញ​ជា​បណ្តោះ​អាសន្ន​នៅ​ក្នុង​ប្រព័ន្ធ​ធនាគារ​ជា​ជាង​ការ​ប្រើ​ប្រាស់​វិធានការ​រយៈ​ពេល​វែង​ក្នុង​ការ​កែ​ប្រែ​អនុបាត​ប្រាក់​បម្រុង​កាតព្វកិច្ច​។

លោក Stephen Green ប្រធាន​ផ្នែក​ស្រាវ​ជ្រាវ​នៅ​ប្រទេស​ចិន​ប្រចាំ​ក្រុម​ហ៊ុន Standard Chartered Plc នៅ​ទីក្រុង​ហុង​កុង ដែល​បាន​ព្យាករ​កាល​ពី​ខែ​តុលា​ថា នឹង​មាន​ការ​ទម្លាក់​អនុបាត​ប្រាក់​បម្រុង​កាតព្វកិច្ច​០,៥​ភាគ​រយ​នោះ មាន​ប្រសាសន៍​ថា​៖ «​ការ​ផ្លាស់​ប្តូរ​អនុបាត​ប្រាក់​បម្រុង​កាតព្វកិច្ច​នឹង​មិន​មាន​ទៀត​ទេ​។ អ្នក​អាច​ផ្តល់​សាច់​ប្រាក់​ងាយ​ស្រួល​តាម​រយៈ​ប្រតិបត្តិការ​ទីផ្សារ​បើក​ចំហ»។

រដ្ឋាភិបាល​ចិន អាច​នឹង​ទម្លាក់​អនុបាត​ប្រាក់​បម្រុង​កាតព្វកិច្ច​នៅ​ត្រីមាស​ទីមួយ​ឆ្នាំ​២០១៣ ខណៈ​ក្រុម​អ្នក​វិភាគ​បាន​ព្យាករ​ថា នឹង​មិន​មាន​ការ​ផ្លាស់​ប្តូរ​អត្រា​ការ​ប្រាក់​ទេ​ចាប់​ពី​ពេល​នេះ រហូត​ដល់​ចុង​ឆមាស​ទីមួយ​ឆ្នាំ​២០១៤​នេះ​បើ​ផ្អែក​លើ​ការ​ព្យាករ​ជា​មធ្យម។ ធនាគារ​កណ្តាល​បាន​ទម្លាក់​អត្រា​ការ​ប្រាក់​ចុង​ក្រោយ​នៅ​ខែ​មិថុនា និង​ខែ​កក្កដា ព្រម​ទាំង​បាន​កាត់​បន្ថយ​អនុបាត​ប្រាក់​បម្រុង​កាតព្វកិច្ច​បី​ដង​ចាប់​ពី​ខែ​វិច្ឆិកា​ឆ្នាំ​២០១១ រហូត​ដល់​ខែ​ឧសភា​ឆ្នាំ​នេះ។

សេដ្ឋវិទូ​ចំនួន​១២​នាក់​ក្នុង​ចំណោម ២០​នាក់ នៅ​ក្នុង​ការ​អង្កេត​នៅ​ខែ​នេះ បាន​ឲ្យ​ដឹង​ថា គ្មាន​ការ​ប្រែ​ប្រួល​អនុបាត​ទុន​បម្រុង​កាតព្វកិច្ច​នេះ​ទេ​រហូត​ដល់​ឆ្នាំ​២០១២៕ BP