Headlines:

ស្ថាបនា​បង្កើន​ទំហំ​កម្ចី​រហូត​ដល់​២០​ម៉ឺន​ដុល្លារ



ភ្នំពេញៈ​គ្រឹះ​ស្ថាន​មីក្រូ​ហិរញ្ញវត្ថុ​ស្ថាបនា​បាន​បង្កើន​ទំហំ​ផ្តល់​ប្រាក់​កម្ចី​រហូត​ដល់​២០​ម៉ឺន​ដុល្លារ​សម្រាប់​អតិថិជន​ម្នាក់​ពោល​គឺ​កើន​ឡើង​ពី​៥​ម៉ឺន​ដុល្លារ​។

ការ​ដំឡើង​ទំហំ​ប្រាក់​កម្ចី​ខ្ពស់​បែប​នេះ​បណ្តាល​មក​ពី​កត្តា​សេដ្ឋកិច្ច​ជាតិ​អំណោយ​ផល​និង​តម្រូវ​ការ​របស់​អតិថិជន​កាន់​តែ​កើន​ឡើង​សម្រាប់​ពង្រីក​អាជីវ​កម្ម​។

លោក​ប៊ុន​មុនី​អគ្គ​នាយក​គ្រឹះស្ថាន​មីក្រូ​ហិរញ្ញវត្តុ​ស្ថាបនា​បាន​ប្រាប់​ភ្នំ​ពេញ​ប៉ុស្តិ៍​កាល​ពី​ថ្ងៃ​ម្សិល​មិញ​ថា​គណៈ​គ្រប់គ្រង​បាន​អនុម័ត​ឲ្យ​ដំឡើង​ទំហំ​ប្រាក់​កម្ចី​ដោយ​ចាប់​អនុវត្ត​ពី​ដើម​ខែ​វិច្ឆិកា​ឆ្នាំ​នេះ​។ លោក​បន្ត​ថា​៖​«​តាម​យើង​ធ្វើ​ការ​សិក្សា​ទីផ្សារ​អតិថិជន​ដែល​មាន​តម្រូវ​ការ​លើស​ពី​៥​ម៉ឺន​ដុល្លារ​គឺ​មាន​ច្រើន​។​តែ​ទោះ​ជា​យ៉ាង​ណា​ខ្ញុំ​មិន​សង្ឃឹម​ថា​យើង​ទទួល​បាន​អតិថិ​ជន​ដែល​មក​ទទួល​កម្ចី​រហូត​២០​ម៉ឺន​ទេ​។​យើង​អាច​មាន​អតិថិជន​មក​រក​កម្ចី​នេះ​លើស​ពី១០​ម៉ឺន​ដុល្លារ​នៅ​ឆ្នាំ​ក្រោយ​»​។

ទំហំ​ប្រាក់​កម្ចី​ប្រែ​ប្រួល​អត្រា​ការ​ប្រាក់​ក៏​ប្រែ​ប្រួល​ដែរ​។​លោក​មុនី​បញ្ជាក់​ថា​អត្រា​ការ​ប្រាក់​សម្រាប់​កម្ចី​៥​ម៉ឺន​ដុល្លារ​ដែល​ធ្លាប់​អនុ​វត្ត​គឺ​១៨​ភាគ​រយ​ក្នុង​មួយ​ឆ្នាំ​ហើយ​រយៈ​ពេល​កម្ចី​គឺ​៣៦​ខែ​ចំណែក​កម្ចី​២០​ម៉ឺន​ដុល្លារ​វិញ​អត្រា​ការ​ប្រាក់​នឹង​ធ្លាក់​មក​នៅ​ត្រឹម​១៤​ទៅ​១៥​ភាគ​រយ​ក្នុង​មួយ​ឆ្នាំ​ហើយ​រយៈ​ពេល​ខ្ចី​គឺ​អាច​យូរ​ដល់​៤៨​ខែ​។

លោក​បាន​បន្ត​ថា៖​«​ស្ថាន​ភាព​សេដ្ឋ​កិច្ច​របស់​យើង​កំពុង​តែ​រីក​ចម្រើន​ហើយ​អតិថិ​ជន​របស់​យើង​ដែល​ធ្វើ​ការ​ជា​មួយ​យើង​ជា​យូរ​មក​ហើយ​មាន​លទ្ធ​ភាព​ពង្រីក​ដើម​ទុន​និង​អាជីវ​កម្ម​របស់​គាត់​បន្ថែម​ទៀត​។​ដូច​នេះ​វា​ជា​មូលហេតុ​ដែល​យើង​ត្រូវ​ឆ្លើយ​តប​ដល់​គាត់​ដើម្បី​ឲ្យ​មាន​ជំនឿ​ចិត្ត​និង​បន្ត​សហការ​ជា​មួយ​យើង​ត​ទៅ​ទៀត​»។

ការ​ផ្តល់​កម្ចី​របស់​ស្ថាបនា​ផ្តោត​ទៅ​លើ​វិស័យ​កសិកម្ម​ដែល​មាន​២០​ភាគរយ ហើយ​ទំហំ​កម្ចី​ថ្មី​នេះ​នឹង​បង្កើន​ដល់​៣០​ភាគរយ។​នេះ​បើ​តាម​លោក ប៊ុន​មុនី។ លោក​បន្ត​ថា កម្ចី​សម្រាប់​អាជីវកម្ម​ខ្នាត​តូច​បាន​ធ្លាក់​ចុះពី​៤០​ភាគ​រយ មក​នៅ​៣០​ភាគរយ​។

មក​ទល់​ពេល​នេះ​ស្ថាបនា​បាន​ផ្តល់​កម្ចី​ជាង​១១៤​លាន​ដុល្លារ​ឲ្យ​អតិថិជន​ជាង​៦៧​០០០​នាក់​នៅ​ដំណាច់​ខែ​តុលា​ចំណែក​ប្រាក់​បញ្ញើ​វិញ​មាន​ជិត​៦០​លាន​ដុល្លារ​ដែល​មាន​អតិ​ថិជន​ជាង៤៥ ០០០​នាក់​។

លោក​បន្ត​ថា៖​«វិស័យ​ហិរញ្ញវត្ថុ​បម្រើ​ឲ្យ​ខឿន​សេដ្ឋ​កិច្ច​របស់​ប្រទេស​នី​មួយ​ៗ​ហើយ​ប្រជាជន​មិន​សូវ​ប្រើ​ទូលំ​ទូលាយ​ទេ​តែ​ដល់​ពេល​នេះ​យើង​ឃើញ​ថា​គាត់​ជឿ​ជាក់​កាន់​តែ​ច្រើន​ដឹង​កាន់​តែ​ច្រើន​ស្គាល់​កាន់​តែ​ច្រើន​និង​ប្រើ​ប្រាស់​កាន់​តែ​ច្រើន​»។

លោក​ជា​ផល្លារិន​ប្រធាន​គ្រឹះសា្ថន​មីក្រូ​ហិរញ្ញ​វត្ថុ​អម្រឹត​ឲ្យ​ដឹង​ថា​ស្ថាប័ន​មួយ​នេះ​នៅ​មិន​ទាន់​ដាក់​ទំហំ​កម្ចី​ខ្ពស់​ដូច​នេះ​ទេ ព្រោះ​តម្រូវ​ការ​របស់​អតិថិ​ជន​ភាគ​ច្រើន​នៅ​មាន​ទំហំ​តូច​តាច​ច្រើន​។

ទំហំ​កម្ចី​ធំ​បំផុត​របស់​អម្រឹត​៣​ម៉ឺន​ដុល្លារ​ហើយ​វាស្ថិត​នៅ​ដំណាក់​កាល​សាក​ល្បង​។​ទំហំ​ប្រាក់​កម្ចី​ដែល​ផ្តល់​ដល់​អតិ​ថិជន​គឺ ៦០០​ដុល្លារ​សម្រាប់​អតិថិ​ជន​ម្នាក់​។​លោក​ជា​ផល្លារិន​ថ្លែង​ថា​ស្ថានភាព​ទីផ្សារ​ហិរញ្ញ​វត្ថុ​បច្ចុប្បន្ន​មាន​ការ​ប្រកួត​ប្រជែង​ខ្លាំង។

លោក​បន្ត​ថា៖​«យើង​អាច​ថា​ចង្អៀត​ក៏​បាន​ដែរ​ព្រោះ​វា​មាន​ការ​ប្រកួត​ប្រជែង​ច្រើន​តែ​វា​ក៏​បន្ត​ការ​រីក​ចម្រើន​ដែរ​។​យើង​នៅ​ផ្តល់​កម្ចី​កម្រិត​តូច​ៗ​នៅ​ឡើយ​ទេ​រហូត​មក​ដល់​បច្ចុប្បន្ន​»​។​រហូត​មក​ទល់​ពេល​នេះ​អម្រឹត​បាន​ផ្តល់​ប្រាក់​កម្ចី​១៣៥​លាន​ដុល្លារ​ដល់​អតិថិជន​ជិត​២៨​ម៉ឺន​នាក់​ទទួល​បាន​ប្រាក់​បញ្ញើ​៨២​លាន​ដុល្លារ​។

លោក​ស្រី​ងួន​សុខា​អគ្គនាយក​ធនាគារ​ជាតិ​នៃ​កម្ពុជា​បាន​ឲ្យ​ដឹង​ថា​មាន​គ្រឹះ​ស្ថាន​មីក្រូ​ហិរញ្ញ​វត្ថុ​ចំនួន​៧ ក្នុង​ចំណោម​៣០​ដែល​ធនា​គារ​ជាតិ​បាន​ផ្តល់​អាជ្ញា​ប័ណ្ណ​ឲ្យ​ទទួល​ប្រាក់​បញ្ញើ​។

លោក​ស្រី​បន្ត​ថា​ប្រភេទ​អតិថិជន​គឺ​មាន​ច្រើន​ខុស​ៗ​គ្នា​ហើយ​អតិ​ថិ​ជន​មួយ​ចំនួន​ក៏​មាន​តម្រូវ​ការ​ខ្ពស់​ដែរ​។​ធនាគារ​ពាណិជ្ជ​ខ្លះ​ផ្តល់​កម្ចី​ដល់​រាប់​លាន​ដុល្លារ​។

លោក​ស្រី​បន្ថែម​ថា​៖​«​គេ​យក​ទៅ​ប្រើ​ប្រាស់​ផ្សេង​ៗ​ពី​គ្នា។​សហ​គ្រាស​ធុន​តូច​និង​មធ្យម​គេ​ត្រូវ​ការ​តាម​កម្រិត​របស់​គេ​ទៅ​តាម​ប្រភេទ​មុខ​របរ​របស់​គេ​»​៕

This content has been locked. You can no longer post any comments.
Show/hide comments
busy