Headlines:

ប្រាក់​អឺរ៉ូ​ធ្លាក់​ខណៈ​បរាជ័យ​លើ​បញ្ហា​ក្រិក



121122_13
ក្រដាស​ប្រាក់១០០​ដុល្លារ អាមេរិក ១០០០០យ៉េន របស់​ជប៉ុន និង​១០០អឺរ៉ូ ។ រូបថត Bloomberg

ប្រ៊ុច​សែលៈ ប្រាក់​អឺរ៉ូ​បាន​ធ្លាក់​ថ្លៃ​ធៀប​នឹង​ប្រាក់​ដុល្លារ​បន្ទាប់​ពី​រដ្ឋ​មន្ត្រី​ហិរញ្ញ​វត្ថុ​សហ​ភាព​អឺរ៉ុប​បាន​បរា​ជ័យ​ក្នុង​ការ​ឯក​ភាព​គ្នា​លើ​ការ​កាត់​បន្ថយ​កញ្ចប់​ថវិកា​បំណុល​សម្រាប់​ប្រទេស​ក្រិក​ក្នុង​អំឡុង​កិច្ច​ពិភាក្សា​ជាង​១១​ម៉ោង​នៅ​ប្រ៊ុច​សែល​។

តម្លៃ​ប្រាក់​អឺរ៉ូ​បាន​ធ្លាក់​ចុះ​ធៀប​នឹង​រូបិយប័ណ្ណ​ចំនួន​១៣​ផ្សេង​ទៀត​ក្នុង​ចំណោម​រូបិយ​ប័ណ្ណ​សំខាន់​ទាំង​១៦​បន្ទាប់​ពី​លោក​LucFrieden​រដ្ឋ​មន្ត្រី​ហិរញ្ញ​វត្ថុ​លុច​សំបួរ​និយាយ​ថា​រដ្ឋ​មន្ត្រី​ហិរញ្ញ​វត្ថុ​សហភាព​អឺរ៉ុប​ទាំង​អស់​នឹង​ចាប់​ផ្តើម​ពិភាក្សា​គ្នា​សប្តាហ៍​ក្រោយ​។

តម្លៃ​ប្រាក់​យ៉េន​បាន​ធ្លាក់​ចុះ​មក​ដល់​៨២​យ៉េន​ក្នុង​មួយ​ដុល្លារ​សម្រាប់​រយៈ​ពេល​ដំបូង​គិត​ចាប់​តាំង​ពី​ខែ​មេសា​បន្ទាប់​ពី​ការ​នំាំ​ចេញ​របស់​ជប៉ុន​បាន​ធ្លាក់​ចុះ​៥​ខែ​ជាប់​ៗគ្នា​។​ដុល្លារ​នូវែល​សេឡង់​បាន​ធ្លាក់​ចុះ​បន្ទាប់​ពី​តម្លៃ​លក់​ដុំ​ម្សៅ​ទឹក​ដោះ​គោ​បាន​ធ្លាក់​ចុះ​ដែល​បាន​កាត់​បន្ថយ​ចំណូល​ដែល​បាន​មក​ពី​ការ​នាំ​ចេញ​។

លោក​Ned​Rumpeltin​ប្រធាន​ក្រុម​យុទ្ធ​សាស្ត្រ​រូបិយ​វត្ថុ​ចំនួន​១០​នៅ​ក្រុម​ហ៊ុន​Standard Chartered Group​Plc​ក្នុង​ទី​ក្រុង​ឡុងដ៍​បាន​និយាយ​ថា៖​«​អ្នក​ធ្វើ​គោល​នយោ​បាយ​អឺរ៉ុប​បាន​បង្កើន​ក្តី​រំពឹង​ថា​អ្វី​មួយ​អាច​នឹង​កើត​ឡើង​ចំពោះ​ប្រទេស​ក្រិក​ហើយ​បន្ទាប់​មក​គេ​នឹង​មិន​គេច​ផុត​ឡើយ។​អ្វី​ដែល​យើង​កំពុង​មើល​ឃើញ​គឺ​ថា​ហានិភ័យ​អឺរ៉ុប​នឹង​លើក​យក​មក​ធ្វើ​ជា​របៀប​វារៈ​ម្តង​ទៀត​។​ទាំង​នេះ​បាន​ដាក់​សម្ពាធ​ដល់​ប្រាក់​អឺរ៉ូ​»​។

តម្លៃ​ប្រាក់​អឺរ៉ូ​បាន​ធ្លាក់​ចុះ​០,៤​ភាគ​រយ​ទៅ​ដល់​១,​២៧៦៥​ដុល្លារ​អាមេរិក​ក្នុង​មួយ​អឺរ៉ូ​នៅ​ទី​ក្រុង​ឡុងដ៍​កាល​ពី​ថ្ងៃ​ម្សិល​មិញ​បន្ទាប់​ពី​កើន​ឡើង​០,៦​ភាគ​រយ​អំឡុង​ពេល​ពីរ​ឆ្នាំ​មុន​។​អឺរ៉ូ​មាន​ការ​ប្រែ​ប្រួល​តិច​តួច​ធៀប​នឹង​ប្រាក់​យ៉េន​ជប៉ុន​គឺ​១០៤,​៧១​យ៉េន​ក្នុង​មួយ​អឺរ៉ូ​។​តម្លៃ​ប្រាក់​យ៉េន​ធ្លាក់​ចុះ​០,៤​ភាគ​រយ​មក​នៅ​៨២,០៣​យ៉េន​ក្នុង​មួយ​ដុល្លារ​អាមេរិក​បន្ទាប់​ពី​បាន​ធ្លាក់​ចុះ​នៅ​ត្រឹម​៨២,១១​យ៉េន​ក្នុង​មួយ​ដុល្លារ​ដែល​នេះ​ជា​ការ​ធ្លាក់​ចុះ​ខ្លាំង​បំផុត​ចាប់​តាំង​ពី​ថ្ងៃ​ទី​៦​មេសា​មក​។

លោក​Wolfgang​Schaeuble​រដ្ឋ​មន្ត្រី​ហិរញ្ញ​វត្ថុ​អាល្លឺ​ម៉ង់​បាន​ប្រាប់​អ្នក​សារ​ព័ត៌​មាន​នៅ​ទី​ក្រុង​ប្រ៊ុច​សែល​ថា​៖​ «​យើង​មាន​ជម្រើស​មួយ​ចំនួន​នៅ​លើ​តុ​អំពី​របៀប​បិទ​ចន្លោះ​ហិរញ្ញវត្ថុ​។​យើង​ពិភា​ក្សា​ពី​បញ្ហា​នេះ​យ៉ាង​ល្អិត​ល្អន់​ប៉ុន្តែ​ដោយ​សារ​តែ​មាន​សំណួរ​ជា​ច្រើន​មាន​ភាព​ស្មុគ​ស្មាញ​យើង​មិន​បាន​ឈាន​ដល់​កិច្ច​ព្រម​ព្រៀង​ចុង​ក្រោយ​នោះ​ទេ​»។

កិច្ច​ប្រជុំ​បន្ទាប់​នឹង​ធ្វើ​នៅ​ថ្ងៃទី​២៦​វិច្ឆិកា​ហើយ​ជំនួយ​សម្រាប់​ក្រិក​ដែល​ស្នើ​ឡើង​តាំង​ពី​ខែ​មិថុនា​នៅ​តែ​ត្រូវ​បង្កក​ទុក៕ SS