Headlines:

ទីផ្សារ​នាំ​ចេញ​របស់​កម្ពុជា​នឹង​រីក​កាន់​តែ​ធំ​



121122_12
មេដឹកនាំប្រទេស​អាស៊ានទាំង​១០ និង​មេដឹកនាំប្រទេស​ជាដៃគូ៦ផ្សេងទៀត​។ រូបថត ហេង ជីវ័ន​

ភ្នំពេញៈ រដ្ឋ​មន្ត្រី​សេដ្ឋកិច្ច​អាស៊ាន​របស់​កម្ពុជា​បាន​ឲ្យ​ដឹង​ថា ការ​ចាប់​ផ្តើម​ចរចា​ជា​ផ្លូវ​ការ​អំពី​ការ​បង្កើត​ភាព​ជា​ដៃ​គូ​សេដ្ឋកិច្ច​ទូលំ​ទូលាយ​តំបន់ (RCEP) នឹង​ក្លាយ​ទៅ​ជា​ទី​ផ្សារ​រួម​ដ៏​មាន​សក្តានុពល ក្នុង​តំបន់​ជា​ទីផ្សារ​ធំ​ជាង​ទី​ផ្សារ​កាល​ពី​មុន​គឺ​អាមេរិក និង​អឺរ៉ុប។

សេដ្ឋ​វិទូ​បាន​ឲ្យ​ដឹង​ថា កម្ពុជា​នឹង​ទទួល​បាន​អត្ថ​ប្រយោជន៍​ជា​ច្រើន​ពី​ការ​ពង្រីក​ទីផ្សារ​នាំ​ចេញ​របស់​ខ្លួន។

RCEP ត្រូវ​បាន​បង្កើត​ឡើង​ជា​ផ្លូវ​ការ កាល​ពី​ថ្ងៃ​ទី​២០ ខែ​នេះ នៅ​ក្នុង​ជំនួប​កំពូល​អាស៊ាន​លើក​ទី​២១ នៅ​រាជ​ធានី​ភ្នំពេញ ដែល​ថ្នាក់​ដឹក​នាំ​អាស៊ាន និង​ថ្នាក់​ដឹក​នាំ​ប្រទេស​ដៃ​គូ​៦​ផ្សេង​ទៀត​មាន​ជប៉ុន ឥណ្ឌា ចិន កូរ៉េ អូស្ត្រាលី និងនូវែលសេឡង់ បាន​ចេញ​សេច​ក្តី​ថ្លែង​ការណ៍​រួម​មួយ ស្តី​ពី RCEP ដើម្បី​ត្រួស​ត្រាយ​ផ្លូវ​បង្កើត​ការ​ធ្វើ​ពាណិជ្ជកម្ម និង​វិនិយោគ​ក្រោម​កិច្ច​ព្រម​ព្រៀង​ពាណិជ្ជកម្ម​សេរី (FTA)។

លោក ចម ប្រសិទ្ធ​រដ្ឋ​មន្ត្រី​ក្រសួង​ពាណិជ្ជកម្ម បាន​ថ្លែង​ទៅ​កាន់​ក្រុម​អ្នក​យក​ព័ត៌​មាន កាល​ពី​ថ្ងៃ​ពុធ​ម្សិលមិញ​ថា ការ​ចរចា​អំពី​RCEP​ឆ្លុះ​បញ្ចាំង​ពី​កិច្ច​ខិត​ខំ​របស់​ថ្នាក់​ដឹក​នាំ​ដើម្បី​ពន្លឿន​ការ​ងារ​របស់​ខ្លួន។

លោក​ថ្លែង​ថា៖ «នេះ​ជា​ការ​ខិត​ខំ​ដ៏​ខ្លាំង​ក្លា ដើម្បី​កសាង​តំបន់​នេះ ឲ្យ​កាន់​តែ​ធំ និង​មាន​មូល​ដ្ឋាន​ដ៏​មាន​សក្តា​នុ​ពល​ធំ​ជាង​សហរដ្ឋ​អាមេរិក និង​អឺរ៉ុប​នា​អនាគត​ដោយ​សារ​តែ​យើង​សង្កេត​ឃើញ​ចំនួន​ប្រជាជន​ចិន ឥណ្ឌា និង​អាស៊ាន​ច្រើន​ជាង​ចំនួន​ពាក់​កណ្តាល​នៃ​ប្រជាជន​សរុប​នៅ​លើ​ពិភព​លោក ហើយ​សេដ្ឋកិច្ច​នៅ​តំបន់​នេះ ក៏​មាន​ឥទ្ធិពល​ខ្លាំង​ក្លា​ផង​ដែរ»។

លោក​បន្ថែម​ថា ក្នុង​ក្រប​ខ័ណ្ឌ​អាស៊ាន​ទាំង​អស់​គ្នា​នឹង​ព្យាយាម​ចាប់​ផ្តើម​ការ​ចរ​ចា​អំពី​ការ​បើក​ទី​ផ្សារ​ថ្មី​មួយ​ដែល​អាច​នាំ​ចេញ​ទំនិញ​ដោយ​មិន​គិត​ពន្ធ និង​កូតា​។ លោក​បន្ត​ថា៖ «យើង​នឹង​ព្យាយាម​បើក​ច្រក​ថ្មី ដើម្បី​ធានា​ដល់​ការ​នាំ​ចេញ​របស់​យើង​នា​ពេល​អនាគត»។

លោក Hiroshi SUZUKI សេដ្ឋ​វិទូ និង​ជា​ប្រធាន​នាយក​ប្រតិបត្តិ​ប្រចាំ​វិទ្យា​ស្ថាន​ស្រាវ​ជ្រាវ​ពាណិជ្ជកម្ម​កម្ពុជា​បាន​ឲ្យ​ដឹង​ថា RCEP នឹង​ជំនួស​ឲ្យ​FTA រវាង​អាស៊ាន»។

លោក​បាន​លើក​ឡើង​ថា៖ «RCEP នឹង​បង្ក​លក្ខណៈ​ងាយ​ស្រួល និង​កាន់​តែ​រលូន​សម្រាប់ FTA ក្នុង​ចំណោម​ប្រទេស​១៦។ ខ្ញុំ​ពិត​ជា​ស្ងើច​សរសើរ​ដល់​ការ​សម្រេច​ចិត្ត​ចាប់​ផ្តើម​ការ​ចរចា​នេះ​ខ្លាំង​ណាស់។​RCEP នឹង​មិន​បើក​ចំហ​ដោយ​សេរី​ពេក​នេះ​បើ​ធៀប​នឹង TPP។ ថ្វី​បើ​យ៉ាង​នេះ​ក្តី កិច្ច​ប្រឹង​ប្រែង​បង្កើត RCEP ពិត​ជា​ធំ​ធេង និង​ផ្តល់​ផល​វិជ្ជមាន​ដល់​ការ​ពង្រឹង AEC និង​ជា​ទី​ផ្សារ​តែ​មួយ​ក្នុង​ចំណោម​១៦​ប្រទេស»។

TPP (Trans-Pacific Partnership)ជាកិច្ច​ព្រម​ព្រៀង​ភាព​ជា​ដៃគូ​រវាង​អាមេរិក និង​ប្រទេស​អាស៊ី​ផ្សេង​ទៀត​។

លោក​Hiroshi SUZUKI បន្ត​ថា បច្ចុប្បន្ន​កម្ពុជា​កំពុង​ក្លាយ​ទៅ​ជា​មូល​ដ្ឋាន​ផលិតកម្ម​មួយ នៅ​អាស៊ាន ដោយ​មាន​តម្លៃ​ពលកម្ម​ថោក និង​ជា​ទី​តាំង​ដ៏​ល្អ​នៅ​ច្រក​របៀង​សេដ្ឋកិច្ច​ខាង​ត្បូង ក្នុង​ចំណោម​ប្រទេស​អាស៊ាន ដែល​និន្នាការ​នេះ​នឹង​ត្រូវ​ពង្រឹង​ដោយ RCEP បន្ថែម​ទៀត។

RCEP នឹង​ត្រូ​ចាប់​ផ្តើម​ការ​ងារ​នៅ​ដើម​ឆ្នាំ​២០១៣ ហើយ​ត្រូវ​បាន​គេ​រំពឹង​ថា​នឹង​បញ្ចប់​នៅ​ចុង​ឆ្នាំ​២០១៥ ចំ​ពេល​នឹង​ការ​បង្កើត​សហគមន៍​សេដ្ឋកិច្ច​អាស៊ាន។

RCEP អាច​ផ្លាស់​ប្តូរ​តំបន់​នេះ ឲ្យ​ទៅ​ជា​ទី​ផ្សារ​រួម​មួយ ដែល​មាន​ប្រជាជន​៣ពាន់​លាន​នាក់ និង​មាន​GDP ប្រហែល ១៩,៧៨​ពាន់​ពាន់​លាន​ដុល្លារ​។ នេះ​បើ​យោង​តាម​តួ​លេខ​ឆ្នាំ​២០១១។

លោក ចម ប្រសិទ្ធ រដ្ឋមន្ត្រី​ក្រសួង​ពាណិជ្ជ​កម្ម​កម្ពុជា បាន​បញ្ជាក់​ថា លោក​នឹង​បង្កើត​ក្រុម​ការ​ងារ និង​ទាក់​ទង​រដ្ឋ​ជា​សមាជិក​ទាំង​អស់ឲ្យ​រៀប​ចំ​ការ​ងារ​នេះ។

លោក​បាន​លើក​ឡើង​ថា៖ «យើង​ជឿ​ជាក់​ថា RCEP នឹង​សម្រេច​បាន​ដោយ​សារ​យើង​ចាប់​ផ្តើម​ជំរុញ​វា ដោយ​ផ្អែក​លើ​អ្វី​ដែល​យើង​បាន​ព្រម​ព្រៀង​ជា​គោល​កាណ៍ ដែល​បាន​បង្ហាញ​របៀប​ចរចា និង​ពិភាក្សា​ជាមួយ​គ្នា»៕ CS

This content has been locked. You can no longer post any comments.
Show/hide comments
busy