Headlines:

អឹម​ហ្វូន​នឹង​ត្រូវ​លក់​ចោល​ក្នុង​តម្លៃ​$១០០



121122_11
ការិយាល័យ​របស់ក្រុមហ៊ុន​អឹមហ្វូន​នៅភ្នំពេញ។ ក្រុម​ហ៊ុន Thaicom នឹងលក់​ អឹមហ្វូន​ចោល​ដោយសារខាត​បង់​ច្រើន​ពេក​។ រូបថត ភ្នំពេញ​

ភ្នំពេញៈ Thaicom ដែល​ជា​ក្រុម​ហ៊ុន​មេ​របស់​ក្រុម​ហ៊ុន​ទូរស័ព្ទ​ចល័ត អឹមហ្វូន​ដែល​កំពុង​មាន​បញ្ហា​នៅ​ក្នុង​ប្រទេស​កម្ពុជា​នឹង​លក់​ក្រុមហ៊ុន​អឹមហ្វូន ចោល ក្នុង​រយៈ​ពេល​ប៉ុន្មាន​សប្តាហ៍​ខាង​មុខ​ទៀត​នេះ​ទៅ​ឲ្យ​ក្រុម​ហ៊ុន​INT Management Service Company Limited (INT) ក្នុង​តម្លៃ តែ​១០០​ដុល្លារ​អាមេរិក។ នេះ​បើ​យោង​តាម​ឯក​សារ​ដែល​បាន​ដាក់​ទៅ​ផ្សារ​ហ៊ុន​ថៃ (SET)។

ក្រុមហ៊ុន Shenington Investment ជា​ក្រុម​ហ៊ុន​បុត្រ​សម្ព័ន្ធ​របស់ Thaicom និង​ជា​ម្ចាស់​ភាគ​ហ៊ុន​១០០​ភាគ​រយ​នៅ​ក្នុង​ក្រុម​ហ៊ុន អឹមហ្វូន បាន​ទទួល​ការ​អនុញ្ញាត​ពី Thaicom ដើម្បី​ដក​ភាគ​ហ៊ុន ២៤​លាន​ហ៊ុន របស់​ខ្លួន នៅ​ក្នុង​កិច្ច​ប្រជុំ​ក្រុម​ប្រឹក្សា កាល​ពី​ថ្ងៃ​ទី​១២ ខែ​វិច្ឆិកា។

លោក Atip Rittaporn អគ្គ​នាយក​Shenington Investment និង​ជា​ប្រធាន​នាយក​ប្រតិបត្តិ​ស្តី​ទី​របស់ អឹម​ហ្វូន​បាន​ឲ្យ​ដឹង​ថា លោក​មិន​អាច​ផ្តល់​ព័ត៌​មាន​លម្អិត​ទាក់​ទង​នឹង​ប្រតិបត្តិការ​ទិញ​លក់​នៅ​តំណាក់​កាល​នេះ​បាន​ឡើយ ដោយ​សារ​ព័ត៌មាន​ចុង​ក្រោយ​មិន​ទាន់​ត្រូវ​បាន​គេ​សម្រេច​នៅ​ឡើយ។

លោក​ក៏​បាន​ប្រាប់​ភ្នំពេញ​ប៉ុស្តិ៍​ថា លោក​ភ្ញាក់​ផ្អើល​ដែល​បាន​ដឹង​ថា ក្រុម​ហ៊ុន​របស់​លោក នឹង​លក់​តែ​ក្នុង​តម្លៃ​១០០​ដុល្លារ​អាមេរិក​ប៉ុណ្ណោះ​នោះ​។ លោក Rittaporn ព្យាករ​ថា ការ​លក់​នេះ​នឹង​ត្រូវ​សម្រេច​នៅ​ប៉ុន្មាន​សប្តាហ៍​ទៀត។ ឯក​សារ​របស់​ក្រុម​ហ៊ុន Thaicom នៅ​ផ្សារ​ភាគ​ហ៊ុន​ថៃ (SET​) បញ្ជាក់​ថា ប្រតិបត្តិ​ការ​លក់​នេះ នឹង​ចូល​ជា​ធរមាន​មិន​ហួស​ពី​ខែ​មករា ឆ្នាំ​២០១៣​ឡើយ។

លោក Ken Streutker ជំនួយ​ការ​អគ្គ​នាយក​រង​ផ្នែក​ទំនាក់​ទំនង​វិនិយោគិន​ប្រចាំ​Thaicom​បដិសេធ​មិន​ផ្តល់​ព័ត៌​មាន​លម្អិត​ទាក់​ទង​នឹង​ឯក​សារ​ដែល​បាន​បញ្ជូន​ទៅ​ផ្សារ​ភាគ​ហ៊ុន​ថៃ​ឡើយ​។

មិន​អាច​ទាក់​ទង​ក្រុម​ហ៊ុន INT បាន​ទេ​កាល​ពីថ្ងៃ​ម្សិលមិញ។

ឯក​សារ​ដដែល​បាន​បង្ហាញ​ថា ហេតុ​ផល​ដែល​នាំ​ដល់​ការ​លក់​ភាគ​ហ៊ុន​នេះ គឺ​ដោយ​សារ​តែ​អឹម​ហ្វូន​បាន​ខាត​បង់​ជា​ច្រើន កាល​ពី៣​ឆ្នាំ​មុន ដោយ​សារ​ការ​ប្រកួត​ប្រជែង​យ៉ាង​ខ្លាំង​ក្លា​នៅ​ក្នុង​ទី​ផ្សារ​ទូរស័ព្ទ​ចល័ត​នៅ​កម្ពុជា។

របាយ​ការណ៍​របស់​អ្នក​វិភាគ​មួយ​រូប​មក​ពី​ក្រុម​ហ៊ុន​DBS Vickers Security នៅ​សិង្ហ​បុរី ស្តី​ពី​លទ្ធផល​របស់​ភាគ​ហ៊ុន ក្រុមហ៊ុន​Thaicom​ព្យាករ​ថា INT នឹង​ចំណាយ​ប្រាក់​តិច​តួច​ក្នុង​ការ​ទិញ​ភាគ​ហ៊ុន​ទាំង​១០០​ភាគ​រយ នៅ​ក្នុង​ក្រុម​ហ៊ុន​អឹម​ហ្វូន។

លោក​បាន​លើក​ឡើង​ថា៖

«​តាម​សេច​ក្តី​ប្រកាស​ជា​ផ្លូវ​ការ ប្រតិ​បត្តិការ​ទិញលក់​នេះ មាន​តម្លៃ​៩៨,៤​លាន​ដុល្លារ​អាមេរិក ដែល​អាច​ស្មើ​នឹង​តម្លៃ​សហគ្រាស (EV)​របស់ អឹម​ហ្វូន​»។ របាយ​ការណ៍​នោះ​បង្ហាញ​ថា អ្នក​ទិញ​នឹង​ចាប់​ផ្តើម​សង​បំណុល​របស់​ក្រុម​ហ៊ុន ហើយ​យើង​ជឿ​ជាក់​ថា EV ភាគ​ច្រើន ជា​បំណុល​។ ការណ៍​នេះ​មាន​ន័យ​ថា INT អាច​នឹង​បង់​ប្រាក់​តិច​តួច​ដល់ Shenington សម្រាប់​ភាគ​ហ៊ុន​ក្រុម​ហ៊ុន​នេះ​។

ឯក​សារ​របស់Thaicom ដែល​ដាក់​ទៅ​ផ្សារ​ហ៊ុន​ថៃ បាន​បញ្ជាក់​ថា ក្រុម​ហ៊ុន​អឹមហ្វូន​មាន​ទុន​អវិជ្ជ​មាន(negative equity) ចំនួន ៣៨,១៥​លាន​ដុល្លារ​។

របាយ​ការណ៍​DBS បាន​សន្និដ្ឋាន​ថា ការ​ដក​ភាគ​ហ៊ុន​នៅ​ក្នុង​ក្រុម​ហ៊ុន​អឹម​ហ្វូន​គួរ​តែ​ជួយ​ស្តារ​ស្ថាន​ភាព​របស់ Thaicom បាន ៥០០​លាន​បាត (១៦,២​លាន​ដុល្លារ​) ក្នុង​មួយ​ឆ្នាំ​៕​CS

This content has been locked. You can no longer post any comments.
Show/hide comments
busy