Headlines:

ធនាគារ​អភិវឌ្ឍន៍​អាស៊ី​គ្រោង​ផ្តល់​ហិរញ្ញប្បទាន​$៦៧៣​លាន​



121122_11b
លោក Haruhiko Kuroda ប្រធានADB។ ជីវ័ន​

ភ្នំពេញៈ ធនាគារ​អភិវឌ្ឍន៍​អាស៊ី​(ADB)​គ្រោង​នឹង​ផ្តល់​ហិរញ្ញប្ប​ទាន​ជិត​៧០០​លាន​ដុល្លារ​ដល់​កម្ពុជា​។ នេះ​បើ​តាម​មន្ត្រី​រដ្ឋាភិ​បាល​កម្ពុជា​។

ថ្លែង​ក្នុង​ខួប​២០​ឆ្នាំ​របស់​ADB​នៅ​ភ្នំពេញ​កាល​ពី​ថ្ងៃ​ម្សិល​មិញ​លោក​គាត​ឈន់​រដ្ឋ​មន្ត្រី​ក្រសួង​សេដ្ឋ​កិច្ច​និង​ហិរញ្ញ​វត្ថុ​ឲ្យ​ដឹង​ថា​កម្ចី​ហិរញ្ញប្ប​ទាន​សហ​ប្រតិ​បត្តិ​ការ​នោះ​នឹង​ត្រូវ​ប្រើ​ប្រាស់​សម្រាប់​វិនិ​យោគ​លើ​វិស័យ​អាទិ​ភាព​ដូច​ជា​ហេដ្ឋា​រចនា​សម្ព័ន្ធ​ផ្លូវ​ស្ពាន​ធារាសាស្រ្ត​កសិកម្ម​ធនធាន​ធម្ម​ជាតិ​អប់រំ​បណ្តុះ​បណ្តាល​បច្ចេក​ទេស​វិជ្ជា​ជីវៈ​ហិរញ្ញ​វត្ថុ​ផ្គត់​ផ្គង់​ទឹក​ស្អាត​និង​អនា​ម័យ​ឧស្សាហ​កម្ម​ពាណិជ្ជ​កម្ម​និង​ការ​គ្រប់​គ្រង់​សាធារណៈ​។

លោក​បន្ត​ថា​៖​«​នៅ​ក្នុង​ក្រប​ខ័ណ្ឌ​កិច្ច​សហ​ប្រតិ​បត្តិ​ការ​ឆ្នាំ​២០១៣-​២០១៥​ធនាគារ​អភិវឌ្ឍន៍​អាស៊ី​គ្រោង​នឹង​ផ្តល់​ហិរញ្ញ​ប្បទាន​សហ​ប្រតិ​បត្តិ​ការ​សរុប​៦៧៣​លាន​ដុល្លារ​សហ​រដ្ឋ​អាមេរិក​»។

លោក​បាន​បន្ថែម​ថា​ក្នុង​ចំនួន​ទឹក​ប្រាក់​ខាង​លើ​នេះ​ឥណ​ទាន​សម្បទាន​មាន​ទឹក​ប្រាក់​៦៥៤​លាន​ដុល្លារ​និង ហិរញ្ញប្ប​ទាន​សហ​ប្រតិ​បត្តិ​ការ​បច្ចេក​ទេស​១៩​លាន​ដុល្លារ​។​លោក​ថ្លែង​ថា៖​«នេះ​បង្ហាញ​អំពី​ការ​ប្តេជ្ញា​បន្ត​ពង្រឹង​ភាព​ជា​ដៃ​គូ​របស់​ធនាគារ​អភិវឌ្ឍន៍​អាស៊ី​ចំពោះ​កម្ពុជា​។​ហិរញ្ញ​ប្បទាន​របស់​ធនាគារ​អភិវឌ្ឍន៍​អាស៊ី​ពិត​ជា​បាន​រួម​ចំណែក​យ៉ាង​សំខាន់​ក្នុង​កិច្ច​អភិវឌ្ឍ​កម្ពុជា​ក្នុង​គោល​បំណង​ជំរុញ​ចីរភាព​នៃ​កំណើន​សេដ្ឋ​កិច្ច​ក្នុង​ការ​កាត់​បន្ថយ​ភាព​ក្រី​ក្រ​របស់​ប្រជាជន​»​។

លោក​នាយក​រដ្ឋ​មន្ត្រី​ហ៊ុន​សែន បាន​ថ្លែង​នៅ​ក្នុង​ខួប​២០​ឆ្នាំ​របស់​ADB កាល​ពី​ថ្ងៃ​ម្សិល​មិញ​ថា​សមិទ្ធ​ផល​ដែល​កម្ពុជា​សម្រេច​បាន​មិន​អាច​កាត់​ផ្តាច់​ចេញ​ពី​ការ​ជួយ​ជ្រោម​ជ្រែង​យ៉ាង​សកម្ម​ពី​ធនាគារ​អភិ​វឌ្ឍន៍​អាស៊ី​និង​ពី​បណ្តា​ដៃ​គូ​អភិវឌ្ឍន៍​ផ្សេង​ទៀត​នោះ​ទេ​។ លោក​បាន​បន្ត​ថា​៖​«​ឆ្លង​តាម​បទ​ពិសោធ​នៃ​កិច្ច​សហ​ប្រតិបត្តិ​ការ​កន្លង​មក​យើង​នៅ​តែ​ចាត់​ទុក​ធនាគារ​អភិវឌ្ឍន៍​អាស៊ី​គឺ​ជា​ដៃ​គូ​ដែល​មាន​បទ​ពិសោធ​រយៈ​ពេល​យូរ​និង​ទទួល​បាន​ជោគ​ជ័យ​នៅ​ក្នុង​ប្រទេស​កម្ពុជា​»​។

លោក​Haruhiko​Kuroda​ប្រធាន​ធនាគារ​អភិវឌ្ឍន៍​អាស៊ី​និយាយ​ថា​បច្ចុប្បន្ន​ប្រតិ​បត្តិ​ការ​របស់​ធនាគារ​អភិវឌ្ឍន៍​អាស៊ី​បាន​គ្រប​ដណ្តប់​លើ​វិស័យ​ជា​ច្រើន​ដែល​រួម​មាន​វិស័យ​ដឹក​ជញ្ជូន​ថាមពល​អភិ​វឌ្ឍន៍​ជន​បទ​អភិវឌ្ឍន៍​ទី​ក្រុង​អប់រំ​បណ្តុះ​បណ្តាល​វិជ្ជា​ជីវៈ​ហិរញ្ញ​វត្ថុ​និង​អភិវឌ្ឍន៍​វិស័យ​ឯក​ជន​ហើយ​ធនាគារ​នេះ​ក៏​បាន​ជំរុញ​កិច្ច​សហ​ប្រតិ​បត្តិ​ការ​ក្នុង​តំបន់​តាម​រយៈ​កម្ម​វិធី​មហា​អនុតំបន់​ទន្លេ​មេគង្គ​។

លោក​បាន​ថ្លែង​ថា​៖​ «​ធនាគារ​អភិវឌ្ឍន៍​អាស៊ី​មាន​មោទនភាព​ណាស់​ដែល​បាន​ក្លាយ​ជា​ដៃ​គូជា​មួយ​ប្រទេស​កម្ពុជា​ក្នុង​រយៈ​ពេល​ពីរ​ទសវត្សរ៍​ចុង​ក្រោយ​នេះ​។​ទៅ​អនាគត​ប្រទេស​កម្ពុជា​នឹង​ត្រូវ​ការ​ការ​ដាក់​ទុន​វិនិយោគ​ជា​ច្រើន​ដើម្បី​ពង្រឹង​ការ​អភិវឌ្ឍ​វិស័យ​សេដ្ឋ​កិច្ច​សង្គម​ថែម​ទៀត​»​។

ធនាគារ​អភិវឌ្ឍន៍​អាស៊ី​បាន​ជួយ​ពង្រឹង​ធនាគារ និង​មីក្រូ​ហិរញ្ញវត្ថុ ជាមួយ​នឹង​ការ​ជួយ​លើក​កម្ពស់​បទ​ប្បញ្ញត្តិ​នានា និង​ជួយ​ផ្តល់​លទ្ធភាព​ឲ្យ​ប្រជា​ពលរដ្ឋ​ខ្មែរ​ជាង ៣៦ ០០០នាក់​បើក​គណនី​មីក្រូ​ហិរញ្ញវត្ថុ និង​ខ្ចី​ប្រាក់។

ចាប់​តាំង​ពីឆ្នាំ​១៩៩២​មក​ADB​បាន​ផ្តល់​ហិរញ្ញ​ប្បទាន​ជិត​២​ពាន់​លាន​ដុល្លារ​ដល់​កម្ពុជា​។នេះ​បើ​តាម​សេចក្តី​ប្រកាស​ព័ត៌មាន​។

យោង​តាម​សេចក្តី​ប្រកាស​ព័ត៌មាន​របស់​ធនាគារ​អភិវឌ្ឍន៍​អាស៊ី​បាន​ឲ្យ​ដឹង​ថា ជាមួយ​នឹង​ជំនួយ​នេះ​រដ្ឋាភិ​បាល​កម្ពុជា​បាន​ស្តារ​ឡើង​វិញ​ឬ​កសាង​ផ្លូវ​ជាតិ ផ្លូវ​ខេត្ត និង​ផ្លូវ​ជន​បទ​ប្រវែង​៤​ពាន់​គីឡូម៉ែត្រ សាលា​បឋម​សិក្សា​ចំនួន​៣៥០ នៅ​តំបន់​ដាច់​ស្រយាល​សាលា​មធ្យម​សិក្សា​៣៥៥​នៅ​ទូទាំង​ប្រទេស​និង​អគារ​ក្រុម​ប្រឹក្សា​ឃុំ​ចំនួន​៧០០៕

This content has been locked. You can no longer post any comments.
Show/hide comments
busy