Headlines:

ចិន កូរ៉េ ជប៉ុន​ចរចា​ពាណិជ្ជកម្ម​សេរី​



121123_12
ប្រធានាធិបតីកូរ៉េខាងត្បូង លី ម្យុងបាក់ (ឆ្វេង) នាយករដ្ឋមន្ត្រីចិន វេន ជាប៉ាវ (កណ្តាល) និងនាយក​រដ្ឋមន្ត្រីជប៉ុន​​​។ ជីវ័ន​

អាស៊ីៈ ចិន ជប៉ុន និង​កូរ៉េ​ខាង​ត្បូង​បាន​ចាប់​ផ្តើម​កិច្ច​ពិភាក្សា​ស្តី​ពី​កិច្ច​ព្រម​ព្រៀង​ពាណិជ្ជកម្ម​សេរី ដែល​ចាំ​បាច់​ចំពោះ​កិច្ច​ព្រម​ព្រៀង​នៅ​ទូទាំង​តំបន់​អាស៊ី ក្នុង​គោល​បំណង​បង្កើត​ទំនាក់​ទំនង​សេដ្ឋកិច្ច​កាន់​តែ​ជិត​ស្និទ្ធ​ទោះ​បី​ប្រទេស​ទាំង​នេះ​កំពុង​មាន​ជម្លោះ​ជុំ​វិញ​ដី​កោះ​ក៏ដោយ​។

ប្រទេស​ទាំង​បី​ខាង​លើ​ដែល​មាន​សេដ្ឋកិច្ច​ធំ​ជាង​គេ​នៅ​តំបន់​អាស៊ី បាន​ឲ្យ​ដឹង​ក្នុង​សេចក្តី​ថ្លែង​ការណ៍​រួម​គ្នា​មួយ​ថា ខ្លួន​នឹង​រៀប​ចំ​កិច្ច​ប្រជុំ​វគ្គ​ទីមួយ​នៅ​ដើម​ឆ្នាំ​ក្រោយ​នេះ។

ការ​ចរចា​នេះ​ជា​កត្តា​សំខាន់​លើ​ភាព​ជា​ដៃ​គូ​សេដ្ឋកិច្ច​ដ៏​ទូលំ​ទូលាយ​ក្នុង​តំបន់​ជា​កិច្ច​ព្រម​ព្រៀង​រវាង​៦​ប្រទេស និង​ប្រទេស​អាស៊ាន​ទាំង​១០​ដែល​ត្រូវ​បាន​ប្រកាស​កាល​ពី​ថ្ងៃ​ពុធ​នៅ​ភ្នំពេញ​។ គេ​បាន​ចាត់​ទុក​កិច្ច​ព្រម​ព្រៀង​នេះ​ជា​កិច្ច​ព្រម​ព្រៀង​ពាណិជ្ជ​កម្ម​សេរី​ដ៏ធំ​បំផុត​នៅ​ក្នុង​ពិភព​លោក​។

លោក John Ravenhill សាស្ត្រា​ចារ្យ​សាកល​វិទ្យា​ល័យ​ជាតិ​អូស្រ្តាលី​មាន​មូល​ដ្ឋាន​នៅ​ទីក្រុង​កង់​បេ​រ៉ា បាន​ថ្លែង​ថា​៖ «​ការ​បាត់​បង់​ផ្នែក​ណា​មួយ​នៃ​ល្បែង​ផ្គុំ​រូប ដែល​អាស៊ី​កំពុង​ព្រួយ​បារម្ភ​គឺ​កិច្ច​ព្រម​ព្រៀង​រវាង​បណ្តា​ប្រទេស​នៅ​ភាគ​ឦសាន​នៃ​តំបន់​អាស៊ី​។ ការ​ចរចា​ដែល​គួរ​តែ​ចាប់​ផ្តើម​ធ្វើ​ឡើង​រវាង​ប្រទេស​ទាំង​បី​ត្រូវ​បាន​ពន្យារ​ពេល ដោយ​សារ​ជម្លោះ​នៅ​សមុទ្រ​ចិន​ខាង​ត្បូង និង​ជម្លោះ​ដី​កោះ​ផ្សេងៗ​»​។

ទស្សន​វិស័យ​ប្រកួត​ប្រជែង​សម្រាប់​កិច្ច​ព្រម​ព្រៀង​ប្លុក​អាស៊ី​ប៉ាស៊ីហ្វិក ឆ្លុះ​បញ្ចាំង​ពី​ការ​ព្យាយាម​ដណ្តើម​អំណាច​ពី​សំណាក់​ប្រទេស​មហា​អំណាច​សេដ្ឋ​កិច្ច​នៅ​តំបន់​មួយ ដែល​ជា​កត្តា​ជំរុញ​កំណើន​សេដ្ឋកិច្ច​ពិភព​លោក​។

លោក​ប្រធានា​ធិបតី​អាមេរិក បារ៉ាក់​អូបាម៉ា បច្ចុប្បន្ន​នេះ​កំពុង​តែ​ព្យាយាម​ពង្រីក​ទំនាក់​ទំនង​ពាណិជ្ជកម្ម​ជា​មួយ​បណ្តា​ប្រទេស​នៅ​តំបន់​អាស៊ី និង​បង្កើន​ឥទ្ធិពល​ផ្នែក​សេដ្ឋកិច្ច​របស់​ខ្លួន​ឡើង​វិញ​ក្នុង​ចំណោម​ប្រទេស​មួយ​ចំនួន ដែល​កំពុង​ពឹង​ផ្អែក​កាន់​តែ​ខ្លាំង​លើ​ប្រទេស​ចិន​៕​BP