Headlines:

អត្រាអតិ​ផរណា​កម្ពុជា​​​នៅ​ខែ​តុលា​ធ្លាក់​ចុះ​តិច​តួច​



ភ្នំពេញៈ សន្ទស្សន៍​ថ្លៃ​ទំនិញ​ប្រើ​ប្រាស់​នៅ​កម្ពុជា​បាន​ធ្លាក់​ចុះ​០,១​ភាគ​រយ នៅ​ខែ​តុលា ហើយ​នេះ​ជា​ការ​ធ្លាក់​ចុះ​លើក​ដំបូង នៅ​ឆ្នាំ​២០១២។

ការ​ធ្លាក់​ចុះ​នេះ​គឺ​បណ្តាល​មក​ពី​ប្រេង​សាំង និង​អាហារ ធ្លាក់​ចុះ ហើយ​អត្រា​ប្តូរ​ប្រាក់​ដុល្លារ មាន​ស្ថិរភាព។ នេះ​បើ​យោង​តាម​ទិន្ន​ន័យ​ជា​ផ្លូវ​ការ​ដែល​ទទួល​បាន​ពី​វិទ្យា​ស្ថាន​ជាតិ​ស្ថិតិ​(NIS)។

មន្ត្រី​ពាក់​ព័ន្ធ​បាន​ឲ្យ​ដឹង​ថា អត្រា​នេះ ឆ្លុះ​បញ្ចាំង​ឲ្យ​ឃើញ​ពី​តម្លៃ​ទំនិញ​នៅ​ក្នុង​តំបន់​ធ្លាក់​ចុះ និង​ស្ថិរភាព​រូបិយវត្ថុ​ក្នុង​តំបន់ ធៀប​នឹង​ដុល្លារ​អាមេរិក។

លោក ឃិន សុង អគ្គ​នាយក​រង NIS​បាន​លើក​ឡើង​ថា៖ «យើង​បាន​កត់​សម្គាល់​ឃើញ​ថា អត្រា​អតិផរណា​របស់​យើង ស្ថិត​ក្នុង​ស្ថាន​ភាព​ល្អ​ក្នុង​ប៉ុន្មាន​ខែ​ចុង​ក្រោយ​នេះ​។ តម្លៃ​សាច់ និង​បន្លែ​បាន​ធ្លាក់​ចុះ ធ្វើ​ឲ្យ​ថ្លៃ​ម្ហូប​អាហារ ស្ថិត​ក្នុង​អត្រា​ថេរ។ ម្យ៉ាង​វិញ​ទៀត​អត្រា​ប្តូរ​ប្រាក់​ក៏​មាន​ស្ថិរភាព ហើយ​មិន​អាច​ធ្វើ​ឲ្យ​CPI របស់​យើង កើន​ឡើង​បាន​ឡើយ។ ការណ៍​នេះ​ឆ្លុះ​បញ្ចាំង​ឲ្យ​ឃើញ​ថា យើង​មាន​ម៉ាក្រូ​សេដ្ឋកិច្ច​ល្អ»។

លោក ឃិន សុង បាន​ឲ្យ​ដឹង​ថា​ទឹក​ជំនន់​នៅ​ឆ្នាំ​នេះ មិន​ធ្ងន់​ធ្ងរ ជា​កត្តា​រួម​ចំណែក​ធ្វើ​ឲ្យ​CPI នៅ​កម្ពុជា ថយ​ចុះ​ផង​ដែរ។

លោក​បាន​ថ្លែង​ថា៖ «នៅ​ក្នុង​ឆ្នាំ​២០១២​នេះ យើង​មិន​បាន​ទទួល​រង​ផល​ប៉ះ​ពាល់​ពី​ទឹក​ជំនន់​ឡើយ វា​ជា​ហេតុ​ធ្វើ​ឲ្យ​តម្លៃ​ទំនិញ​បាន​ថយ​ចុះ»។

ទិន្ន​ន័យ​របស់ NIS បាន​បង្ហាញ​ថា នៅ​ចន្លោះ​ខែ​កញ្ញា និង​ខែ​តុលា ម្ហូប​អាហារ មាន​តម្លៃ​ថេរ ដោយ​ក្នុង​នោះ សាច់​ធ្លាក់​ថ្លៃ​០,៦​ភាគ​រយ ដោយ​តម្លៃ​សាច់​ជ្រូក​ចុះ​ថ្លៃ ១,៨​ភាគ​រយ បន្លែ១,៣​ភាគ​រយ និង​ប្រេង​សាំង​ចុះ​១,៨​ភាគ​រយ។

ទិន្ន​ន័យ​ដដែល​បង្ហាញ​ថា ទំនិញ​មួយ​ចំនួន​ឡើង​ថ្លៃ​ដូច​ជា ម្ហូប​អាហារ ភេសជ្ជៈ​មិន​មែន​អាល់​កុល សម្លៀក​បំពាក់ និង​ស្បែក​ជើង កន្លែង​ស្នាក់​នៅ ទឹក អគ្គិសនី ឧស្ម័ន និង​ប្រេង​ឥន្ធនៈ​ផ្សេង​ៗ​ទៀតនៅ​ក្នុង​រយៈ​ពេល​១២​ខែ ចុង​ក្រោយ​នេះ ដែល​ធ្វើ​ឲ្យ​អតិផរណា​នៅ​កម្ពុជា កើន​ឡើង១,២​ភាគ​រយ។

មន្ត្រី​មូល​និធិ​រូបិយវត្ថុ​អន្តរជាតិ (IMF​)​បាន​ព្យាករ​ថា អតិផរណា​នៅ​កម្ពុជា មាន​អត្រា​ពី ២ ទៅ ៤​ភាគ​រយ​នៅ​ឆ្នាំ​២០១២​នេះ។

IMF បាន​ឲ្យ​ដឹង​ថា ទោះ​បី​ជា​មាន​កំណើន​ថ្លៃ​ម្ហូប​អាហារ​នៅ​លើ​ទី​ផ្សារ​ពិភព​លោក​ក៏​ដោយ ប៉ុន្តែ​កម្ពុជា​នឹង​នៅ​តែ​មាន​អតិផរណា​ទាប​ដដែល។

យោង​តាម​វិទ្យាស្ថាន​ជាតិ​ស្ថិតិ​បាន​ព្យាករ​ថា ប្រទេស​កម្ពុជា នឹង​មាន​អតិផរណា​ជា​មធ្យម​ពី២ ទៅ​៣​ភាគ​រយ​គិត​ត្រឹម​ចុង​ឆ្នាំ​នេះ​។

លោក Naoyuki Shinohara អគ្គ​នាយក​រង IMF បាន​លើក​ឡើង​ថា អតិផរណា​នៅ​កម្ពុជា ស្ថិត​ក្នុង​អត្រា​មធ្យម ហើយ​ថ្លៃ​ម្ហូប​អាហារ​ស្ថិត​នៅ​ថេរ ដោយ​សារ​ផលិត​កម្ម​អង្ករ​មាន​ភាព​ប្រសើរ។

លោក​ថ្លែង​ថា៖ «ប្រសិន​បើ​លោក​ក្រឡេក​មើល​ទៅ​អត្រា​អតិផរណា វា​មាន​ភាព​មធ្យម។ ម្យ៉ាង​វិញ​ទៀត​កម្ពុជា មិន​ទទួល​រង​ផល​ប៉ះ​ពាល់​ពី​កំណើន​ថ្លៃ​ម្ហូប​អាហារ​ឡើយ ដោយ​សារ​តែ​ផលិតកម្ម​អង្ករ​។ ផល​ប៉ះ​ពាល់​នៃ​កំណើន​ថ្លៃ​ម្ហូប​អាហារ នៅ​មាន​កម្រិត ហើយ​នៅ​ឆ្នាំ​នេះ​ផល​ដំណាំ ហាក់​ដូច​ជា​ផ្តល់​ផល​ល្អ។ ដូច្នេះ​យើង​មិន​ចាំ​បាច់​ព្រួយ​បារម្ភ​ឡើយ»។

IMF ក៏​បាន​ព្យាករ​ផង​ដែរ​ថា​សេដ្ឋកិច្ច​កម្ពុជា មាន​កំណើន ៦,៥​ភាគ​រយ ស្រដៀង​នឹង​ការ​ព្យាករ​របស់​រដ្ឋាភិបាល​ដែរ។

លោក Shinohara បាន​លើក​ឡើង​ថា៖ «សេដ្ឋកិច្ច​កម្ពុជា​ទទួល​បាន​លទ្ធផល​ល្អ ទោះ​បី​ជា​មាន​ការ​ធ្លាក់​ចុះ​នៃ​សេដ្ឋកិច្ច និង​វិបត្តិ​នៅ​ក្នុង​ទីផ្សារ​មួយ​ចំនួន​ក៏​ដោយ។ កំណើន​នៅ​កម្ពុជា​មាន​ស្ថិរភាព ហើយ​ខ្ពស់។ យើង​រំពឹង​ថា កម្ពុជា​នឹង​មាន​កំណើន​ដ៏​ល្អ​នេះ ដោយ​សារ​ការ​នាំ​ចេញ វិស័យ​ទេសចរណ៍ និង​សំណង់»។

កម្ពុជា​នាំ​ចូល​ទំនិញ​ភាគ​ច្រើន​ដែល​ងាយ​ទទួល​ផល​ប៉ះ​ពាល់​ដល់​តម្លៃ​ទំនិញ​ក្នុង​ស្រុក​៕​CS

 

This content has been locked. You can no longer post any comments.
Show/hide comments
busy