Headlines:

កម្ពុជា​​រក​កម្ចី​​ចិន​ទិញ​ស្រូវ​រដូវ​ថ្មី



121123_11
កម្មករ​រោងម៉ាស៊ីនកិនស្រូវក្នុង​ស្រុក​មួយកំពុង​ពិនិត្យអង្ករ។ កម្ពុជា​កំពុង​ស្វែងរក​កម្ចីពីចិន​ដើម្បី​ប្រមូល​ទិញ​ស្រូវ​កែច្នៃអង្ករ​សម្រាប់​នាំចេញ។ ផាលីណា​

ភ្នំពេញៈ​កម្ពុជា​កំពុង​ស្វះ​ស្វែង​រក​កម្ចី​ពី​ចិន​ប្រមាណ​៥០​លាន​ដុល្លារ​ជា​បន្ទាន់​សម្រាប់​ប្រមូល​ទិញ​ស្រូវ​រដូវ​ប្រមូល​ផល​ថ្មី​នេះ​។

មន្ត្រី​ធនាគារ​អភិវឌ្ឍន៍​ជន​បទ​ឲ្យ​ដឹង​ថា គេ​បាន​ដាក់​សំណើ​ខ្ចី​ប្រាក់​ពី​ធនាគារ​នីហរ័ណ​អាហរ័ណ​ចិន​ចន្លោះ​ពី​២០​លាន​ទៅ​៥០​លាន​ដុល្លារ​សម្រាប់​ផ្តល់​កម្ចី​បន្ត​ដល់​វិស័យ​ឯក​ជន​ដើម្បី​ទិញ​ស្រូវ​នៅ​រដូវ​ប្រមូល​ផល​ឆ្នាំ​នេះ​។

លោក​សុន​គន្ធរ​ប្រធាន​ធនាគារ​អភិវឌ្ឍន៍​ជនបទ​បាន​ប្រាប់​ភ្នំពេញ​ប៉ុស្តិ៍​កាល​ពីថ្ងៃ​ម្សិល​មិញ​ថា​ការ​ចរចា​លើ​កម្ចី​ចំនួន​២០០​លាន​ដុល្លារ​អាមេរិក​កាល​ពី​លើក​មុន​ត្រូវ​ជាប់​គាំង​ដោយ​សារ​ភាគី​ធនាគារ​ចិន​ចង់​ឲ្យ​យក​កម្ចី​នោះ​មក​វិនិ​យោគ​លើ​រោង​ម៉ាស៊ីន​កិន​ស្រូវ​ដោយ​តម្រូវ​ឲ្យ​ក្រុម​ហ៊ុន​ចិន​យក​មក​វិនិ​យោគ​ចំណែក​ភាគី​ខាង​កម្ពុជា​ចង់​បាន​កម្ចី​នោះ​ជា​សាច់​ប្រាក់​ដើម្បី​ផ្តល់​ដល់​ក្រុម​ហ៊ុន​ឯក​ជន​យក​ទៅ​ទិញ​ស្រូវ​។

លោក​បាន​បន្ត​ទៀត​ថា​៖​«យើង​អត់​សង្ឃឹម​ទេ​ចំពោះ​២០០​លាន​ដុល្លារ​អាមេរិក​នោះ​ព្រោះ​វា​មាន​លក្ខ​ខណ្ឌ​ផ្សេង​គ្នា​។​យើង​សង្ឃឹម​ថា​ប្រហែល​ជា​ទទួល​បាន​ឥណទាន​សាក​ល្បង​ទិញ​ស្រូវ​សិន​។​យើង​បាន​ស្នើ​សុំ​ខ្ចី​សាក​ល្បង​ពី​២០​លាន​ទៅ​៥០​លាន​ដុល្លារ​។ នេះ​ជា​ការ​ខ្ចី​លក្ខណៈ​ឯក​ជន​ពី​ព្រោះ​រាល់​ថ្ងៃ​នេះ​ទុន​ទិញ​ស្រូវ​មាន​តិច​»។

លោក​តូច​តែ​ពេជ្រ​ប្រធាន​សមាគម​ម៉ាស៊ីន​ស្រូវ​ខេត្ត​ស្វាយរៀង​និយាយ​ថា​លោក​ធ្លាប់​ទទួល​បាន​កម្ចី​មួយ​ចំនួន​ពី​ធនា​គារ​អភិវឌ្ឍន៍​ជនបទ​យក​មក​ធ្វើ​អភិវឌ្ឍ​សមត្ថភាព​កែ​ច្នៃ​អង្ករ​សម្រាប់​នាំ​ចេញ​ប៉ុន្តែ​វា​នៅ​មាន​ទំ​ហំ​តូច​មិន​សម​ស្រប​ទៅ​នឹង​តម្រូវ​ការ​ជាក់​ស្តែង​ឡើយ​។

លោក​នាយក​រដ្ឋ​មន្ត្រី​ហ៊ុន​សែន​ធ្លាប់​ប្រកាស​ថា​រដ្ឋ​នឹង​ចេញ​ថ្លៃ​ខាត​ចំនួន​៥០​ភាគ​រយ​នៃ​ប្រាក់​កម្ចី​ដែល​ធនា​គារ​ផ្តល់​ដល់​វិស័យ​ឯក​ជន​យក​ទៅ​កែ​ច្នៃ​អង្ករ ។

លោក​តែ​ពេជ្រ​បញ្ជាក់​ថា​ភាគី​ធនាគារ​ក្នុង​ស្រុក​នៅ​មិន​ទាន់​អនុ​វត្ត​បាន​ទេ​។​លោក​បន្ត​ថា៖​«​ការ​រក​ស៊ី​មាន​ពេល​វេលា​របស់​វា​។​អ្វី​ដែល​ខ្ញុំ​ខ្វះ​គឺ​ទុន​សម្រាប់​ទិញ​ស្រូវ​ភ្លាម​ៗ​នេះ​។​ពេល​ស្រូវ​កំពុង​ធ្លាក់​ថ្លៃ​វា​ជា​ឱកាស​ល្អ ដែល​យើង​អាច​ប្រមូល​ទិញ​បាន​»​។

តួ​លេខ​នាំ​ចេញ​អង្ករ​របស់​កម្ពុជា​គិត​ត្រឹម​ដំណាច់​ខែ​តុលា​បាន​កើន​ឡើង​តែ​០,៥១​ភាគ​រយ​ប៉ុណ្ណោះ​បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​ទៅ។​ទិន្នន័យ​នាំ​ចេញ​១០​ខែ​ឆ្នាំ​២០១២​មាន​១៤៨​២០០​តោន​បើ​ធៀប​រយៈ​ពេល​ដូច​គ្នា​កាល​ពី​ឆ្នាំ​២០១១​ដែល​មាន​១៤៧​៤៣៥​តោន​។

ប្រទេស​កម្ពុជា​រំពឹង​ទុក​ថា​នៅ​២០១២​នេះ​ការ​នាំ​ចេញ​អង្ករ​របស់​កម្ពុជា​នឹង​មាន​ចំនួន​២៥​ម៉ឺន​តោន​ដែល​ស្មើ​នឹង​២៥​ភាគ​រយ​នៃ​ផែន​ការ​សរុប​១​លាន​តោន​ត្រឹម​២០១៥​។​នេះ​បើ​តាម​ឯកសារ​គោល​នយោ​បាយ​។

លោក តែ​ពេជ្រ​បាន​ឲ្យ​ដឹង​ថា​ការ​ប្រមូល​ទិញ​ស្រូវ​បាន​ច្រើន​ចំ​ពេល​ស្រូវ​កំពុង​តែ​ធ្លាក់​ថ្លៃ​គឺ​មិន​ត្រឹម​តែ​ធ្វើ​ឲ្យ​ការ​នាំ​ចេញ​ទទួល​បាន​ចំណេញ​ច្រើន​ទេ​តែ​វា​ក៏​បង្កើត​ការ​ងារ​ក្នុង​ស្រុក​និង​ទប់​ស្កាត់​ការ​ហូរ​ចេញ​ស្រូវ​ទៅ​ប្រទេស​ជិត​ខាង​បាន​ច្រើន​។

លោក​បាន​បន្ត​ថា​៖ ​«បើ​ពេល​នេះ​យើង​មាន​លុយ​ភ្លាម​យើង​ទិញ​ភ្លាម​វា​គឺ​ជា​ឱកាស​ល្អ​របស់​កម្ពុជា​យើង​។​ពេល​នេះ​យើង​មាន​លទ្ធ​ភាព​កែ​ច្នៃ​នាំ​ចេញ​យើង​មាន​ទីផ្សារ​ពិភព​លោក​ទទួល​ស្គាល់​ហើយ​តែ​យើង​បែរ​ជា​អត់​ទុន​ទិញ​ស្រូវ​ចូល​សួរ​ថា​តើ​យើង​ឈឺ​ចាប់​ប៉ុនណា?​»​៕

This content has been locked. You can no longer post any comments.
Show/hide comments
busy