Headlines:

ចិន វិនិយោគ​ជាង $១ ពាន់​លាន​លើ​ដែន​កោះ​ជម្លោះ



ខេត្ត​ហៃណានៈ សារព័ត៌មាន 21st Century Business Herald របស់​ចិន បាន​រាយការណ៍​ថា​ចិន​គ្រោង​នឹង​ចំណាយ​ថវិកា​ជាង ១​ពាន់​លាន​ដុល្លារ ដើម្បី​សាង​សង់​អាកាស​យាន្តដ្ឋាន​កំពង់ផែ និង​ហេដ្ឋារចនា​សម្ព័ន្ធ​ផ្សេង​ទៀត​នៅ​លើ​ដី​កោះ ដែល​កំពុង​មាន​ជម្លោះ​ជាមួយ​ប្រទេស​វៀតណាម និង​ហ្វីលីពីន។

តាម​ការ​ដក​ស្រង់​សម្តី​របស់​លោក Jiang Dingzhi អភិបាល​ខេត្ត​ហៃណាន សារ​ព័ត៌មាន​ដដែល បាន​បន្ត​ឲ្យ​ដឹង​ថា​រដ្ឋាភិបាល​ថ្នាក់​កណ្តាល បាន​អនុម័ត​គម្រោង​វិនិយោគ​ដែល​មាន​តម្លៃ ១០​ពាន់​លាន​យន់ (១,៦​ពាន់​លាន​ដុល្លារ) ក្នុង​វិស័យ​ហេដ្ឋា​រចនា​សម្ព័ន្ធ​សម្រាប់​តំបន់​មួយ​ចំនួន ដែល​ស្ថិត​ក្រោយ​ការ​គ្រប់​គ្រង​របស់​ទីក្រុង Sansha នៃ​ខេត្ត​ហៃណាន។ ចិន​បាន​បង្កើត​ទីក្រុង Sansha កាល​ពី​ខែ​មិថុនា ដើម្បី​គ្រប់​គ្រង​កោះ Paracel និង​កោះ Spratly ដែល​ទឹក​ដី​មួយ​នៃ​កោះ​ទាំង​នេះ ត្រូវ​បាន​គ្រប់​គ្រង ឬ​អះ​អាង​ថា​ជា​ដែន​ដី​របស់​ខ្លួន​ពី​សំណាក់​វៀតណាម និង​ហ្វីលីពីន​កោះ​តៃវ៉ាន់ ម៉ាឡេស៊ី និង​ប្រទេស​ប៊្រុយណេ​ផង​ដែរ។

ភាព​តាន​តឹង​រវាង​ប្រទេស​ចិន និង​ប្រទេស​ជិត​ខាង​របស់​ខ្លួន​នៅ​ក្នុង​សមុទ្រ​ចិន​ខាង​ត្បូង បាន​បង្ក​ឲ្យ​មាន​ក្តី​បារម្ភ​ថា ការ​ប្រកួត​ប្រជែង​ដណ្តើម​ទឹក​ដី​នេះ នឹង​ប៉ះពាល់​ដល់​ទំនាក់​ទំនង​សេដ្ឋកិច្ច​រវាង​សមាគម​នៃ​ប្រជា​ជាតិ​អាស៊ី​អាគ្នេយ៍ និង​ដៃ​គូ​ពាណិជ្ជកម្ម​ធំ​ជាង​គេ​របស់​សមាគម​នេះ​។ ជម្លោះ​ជុំវិញ​ការ​គ្រប់​គ្រង​ដីកោះ Diaoyu ឬ​កោះ Senkaku នៅ​សមុទ្រ​ចិន​ខាង​កើត ក៏​កំពុង​ប៉ះ​ពាល់​ដល់​ទំនាក់​ទំនង​ពាណិជ្ជកម្ម​រវាង​ចិន និង​ជប៉ុន​ផង​ដែរ។

មូលនិធិ​វិនិយោគ​សម្រាប់​កសាង​ទីក្រុង Sansha នឹង​ត្រូវ​ចំណាយ​លើ​ការ​អនុវត្ត​ច្បាប់​ដែន​ទឹក និង​ជលផល​សមុទ្រ​ផង​ដែរ នេះ​បើ​យោង​សារព័ត៌មាន 21st Century Herald​។ ដោយ​ពុំ​ផ្តល់​ព័ត៌មាន​លម្អិត សារ​ព័ត៌មាន​ដដែល​នេះ បាន​បន្ត​រាយការណ៍​ថា ការ​សាង​សង់​ផ្នែក​រូបវន្ត​មួយ​ចំនួន បាន​ចាប់​ផ្តើម​រួច​ហើយ៕ BP