ភ្នំពេញ ប៉ុស្តិ៍
- Prev
- 1 of 2
- Next
កំពង់ចាម : តើមាននរណាអាចហូបបាញ់ចានឿកទំហំប៉ុនគ្រាប់អង្គញ់បានរហូតទៅ ដល់១០គ្រាប់ទេ? កសិករវ័យ៣៣ គឺលោក ធីម ចាន់ធី រស់នៅភូមិពោធិ៍ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម មិនត្រឹមតែហូបនំបាញ់ចានឿកចំនួន១០គ្រាប់ប៉ុណ្ណោះទេ គឺគាត់អាចបរិភោគរហូតដល់ទៅ៤៥គ្រាប់ឯណោះ ក្នុងរយ:ពេលតែប៉ុន្មាននាទី។
ការពូកែបរិភោគនេះ មិនមែនដោយសារគាត់មានមាឌធំ ឬមានក្បាលពោះធំ ដែលអាចផ្ទុកអាហារបានច្រើននោះទេ ប៉ុន្តែវាជាជំនាញផ្ទាល់ខ្លួនពិតៗរបស់គាត់មួយកម្រមានអ្នក អាចធ្វើដូច។
លោកថ្លែងថា៖ «ខ្ញុំជាកសិករតែងតែត្រូវការកម្លាំងកំហែងខ្លាំងក្លាទៅ ភ្ជួររាស់លីសែង។ ដើម្បីបានកម្លាំងមាំមួន ខ្ញុំត្រូវហូបឲ្យបានច្រើនដែរ។ ដូច្នេះទម្លាប់បរិភោគច្រើនបែបនេះគឺមានតាំងពីក្មេងមកម្ល៉េះ»។
ជាធម្មតា នំបាញ់ចានឿក ធ្វើអំពីម្សៅកិនចេញពីអង្ករ និងមានស្នូលនៅពីខាងក្នុង។ ប៉ុន្តែកម្រមានអ្នកណាអាចបរិភោគបានច្រើនដូចលោក ចាន់ធី ណាស់ ពីព្រោះភាពស្អិតល្មួតនៃបង្អែមនេះ អាចធ្វើឲ្យអួលនៅនឹងបំពង់ក។ ម្យ៉ាងទឹកនំបាញ់ចានឿកមានរសជាតិផ្អែមខ្លាំង ធ្វើឲ្យអ្នកបរិភោគឆាប់ណាយ បន្ទាប់ពីបរិភោគប្រមាណ៥ទៅ៦គ្រាប់។
ប៉ុន្តែលោក ចាន់ធី បានអះអាងថា កន្លងមកគាត់ធ្លាប់ហូបបាញ់ចានឿកនេះរហូតដល់ទៅ៤០គ្រាប់ទៅហើយ ដូច្នេះការហូបនៅពេលថ្មីៗរហូតដល់ទៅ៤៥នំ គឺជាការអភិវឌ្ឍថែមមួយកម្រិតទៀត។ ប៉ុន្តែរាល់ពេលដែលយុវជនរូបនេះបានដួសយកនំបាញ់ចានឿកមកបរិភោគ ម្តងៗ ពីក្នុងចានដែលដាក់នៅត្រៀបត្រាពីមុខគាត់ អ្នកដែលឈរមើលហាក់បានឃ្លានមួយរំពេច បើទោះបីជាគេពុំទាន់បានហូបក្តី។ លោក ចាន់ធី បានបរិភោគម្តងមួយៗដោយមិនបង្ខំឡើយ។ លុះអស់មួយចាន គាត់ក៏បន្តមួយចាន់ទៀត ក្នុងល្បឿនដូចធម្មតា។
មិនដល់៣នាទីផង គាត់ហូបអស់ជិត៣០នំទៅហើយ។ ដោយផ្អាកបន្តិច គាត់បានលាត់ក្បាលពោះដ៏រាបស្មើរបស់ខ្លួនឲ្យអ្នកដទៃឃើញ។ គាត់ក៏បន្តហូបនំដែលនៅសេសសល់រហូតដល់អស់៤៥គ្រាប់។
លោកបន្ថែមថា៖ «កាលពិត ពេលកំពុងហូប ខ្ញុំមានអារម្មណ៍អួលតឹងបំពង់កបន្តិចដែរ ប៉ុន្តែបើរឿងឲ្យហល់គឺឥតមានទេ។ ខ្ញុំគិតថា ដូចជាមានអារម្មណ៍ធម្មតា ពីព្រោះខ្ញុំធ្លាប់ហូបចំនួនច្រើនអ៊ីចឹងពីមុនមកដែរ រហូតដល់ទៅ៤០នំ។ នេះគ្រាន់តែលើសប្រាំគ្រាប់ប៉ុណ្ណោះ ដូច្នេះមិនមានអ្វីប៉ះពាល់ធ្ងន់ធ្ងរនោះទេ»។
លោក ចាន់ធី ថ្លែងថា ការបរិភោគច្រើនអ៊ីចឹងមិនមែនឥតប្រយោជន៍នោះទេ គឺវាធ្វើឲ្យរាងកាយរបស់គាត់ប្លែកខុសមនុស្សធម្មតា ពោលគឺគាត់អាចផ្អាកហូបអាហារបានដល់ទៅ៣ថ្ងៃ ដោយមិនមានការហេវហត់អ្វីទេ។ ម្យ៉ាងគាត់មានកម្លាំងដ៏សម្បើម ដែលអាចឲ្យគាត់លីស៊ីម៉ងត៍ឬវត្ថុអ្វីៗមានទម្ងន់ដល់ទៅ១០០គីឡូដោយគ្មានបញ្ហាឡើយ។
ក្រៅពីនំបាញ់ចានឿក គាត់អាចបរិភោគបាយបានមិនតិចជាង៥ចានធំៗ ឬនំបញ្ចុកមិនតិចជាង៣គីឡូទេ។ គាត់រំពឹងថា គាត់នឹងអាចបរិភោគនំបាញ់ចានឿកបាន៥០គ្រាប់នៅថ្ងៃណាមួយ។ ទន្ទឹមនឹងនោះ គាត់ក៏រង់ចាំស្វាគមន៍អ្នកផ្សេងមកបំបែកឯតទគ្គកម្មរបស់គាត់ដែរ៕
ប្រសិនលោកអ្នកចេះមន្តអាគម ឬ សមត្ថភាពពិសេសអ្វីមួយចង់បង្ហាញដល់អ្នកដទៃ កាសែតភ្នំពេញ ប៉ុស្តិ៍នឹងជួយផ្សព្វផ្សាយពីទេពកោសល្យអស់លោកអ្នក។ សូមទំនាក់ទំនងមកតាមទូរស័ព្ទ ០១២ ៥២៥ ៦៩៤ ឬ ០៩២ ៨៩៩ ០២៤។ សូមបញ្ជាក់ថា ទេពកោសល្យរបស់អ្នកមិនត្រឹមតែជ្រួតជ្រាបដល់ប្រជាជនខ្មែរនៅក្នុង ប្រទេសកម្ពុជាទេ ប៉ុន្តែនៅប្រទេសណា ក៏នឹងឮពីទេពកោសល្យរបស់អ្នក ពីព្រោះកាសែតភ្នំពេញ ប៉ុស្តិ៍ផ្សាយទាំងភាសាខ្មែរ និងអង់គ្លេស ព្រមទាំងបង្ហោះលើបណ្តាញអ៊ីនធឺណិតទូទាំងពិភពលោកទៀតផង។
