Headlines:

សុខ ស្រីល័ក្ខណ៍បង​ស្រី&​ម្តាយ​ជំរុញ​​​ចូល​ហង្សមាស



121109_28b
តារា​ចម្រៀង សុខ ស្រី​ល័ក្ខណ៍​​​។ ស៊ូ វុទ្ធី

ភ្នំពេញៈ ខណៈ​បទ​ចម្រៀង សុខ សីឡាលីន ​ក្នុង​ផលិតកម្ម​រស្មី​ហង្ស​មាស មិន​ទាន់​ចេញ​លក់​បាន​មួយ​បទ​នៅ​ឡើយ​នោះ ស្រាប់​តែ​ម្តាយ​របស់​នាង​ សុខ​ សីឡាលីន បាន​អះអាង​ថា អ្នក​ស្រី​កំពុង​ពិចារណា​អំពី​ការ​ជំរុញ​ សុខ ស្រីល័ក្ខណ៍ ដែល​ជា​ប្អូន​ស្រី ចូល​ផលិតកម្ម​ធំ​នោះ​ម្នាក់​ទៀត​ឬ​យ៉ាង​ណា។

អ្នក​ស្រី មិន មានិត ម្តាយ សុខ សីឡាលីន ​បាន​លើក​ឡើង​ថា៖​«ដ្បិត​ថា ​បទ​ចម្រៀង​ថ្មី​នៅ​ក្នុង​ផលិតកម្ម​ហង្ស​មាស​វ៉ុល​ដំបូង នៅ​មិន​ទាន់​បាន​ចេញ​លក់ ប៉ុន្តែ​ពេល​នេះ​កូន​ស្រី​ខ្ញុំ​ សុខ សីឡា​លីន កំពុង​មមាញឹក​នឹង​ការងារ​នៅ​ក្នុង​ផលិតកម្ម​ហង្សមាស​នោះ ​ថត​បទ​ចម្រៀង និង​កំពុង​ហាត់​បទ​ថ្មី​បន្ត​»។

អ្នក​ស្រី​អះអាង​ថា៖​«នៅ​មិន​យូរ​ ទេបទ​ចម្រៀង​វ៉ុល​ដំបូង​របស់​កូន​ស្រី​ខ្ញុំ​ នឹង​ចេញ​លក់់​លើ​ទីផ្សារ​រួម​ជាមួយ​តារា​ចម្រៀង​ថ្មីៗ​នោះ​ បើ​យូរ​បំផុត​ដំណាច់​ឆ្នាំ​នេះ ព្រោះ​ថា​ពេល​នេះ ​ខាង​ផលិតកម្ម​កំពុង​តែ​សម្រុក​ផលិត​បទ​ចម្រៀង​វ៉ុល​ពិសេស​សម្រាប់​ឆ្នាំ​ ថ្មី​២០១៣​នេះ»​។ អ្នក​ស្រី​និយាយ​ទាំង​មោទនភាព​ថា៖​«នៅ​ផលិតកម្ម​ហង្ស​មាស ក្រៅ​ពី​លោក​ព្រាប សុវតិ្ថ និង​កញ្ញា ឱក សុគន្ធកញ្ញា​ នោះ​ ចុះ​មក​គឺ​កូន ឡាលីន ​ហើយ​ ព្រោះ​ថា​កូន ឡា​លីន​ នាង​មិន​ថា​តែ​បទ​ខ្មែរ​ ឬ​បទ​ជា​ភាសា​បរទេស​ទេ នាង​ច្រៀង​បាន​ទាំង​អស់​មិន​ទាស់​ទេ ​ឲ្យ​តែ​ផលិត​កម្ម​តម្រូវ​នោះ»​។

បន្ថែម​លើ​មោទនភាព​នោះ ​អ្នកស្រី ​ក៏​បាន​លើក​ឡើង​ឲ្យ​ដឹង​ថែម​ទៀត​ថា ក្រោយ​ពី​វត្តមាន​កូន​ស្រី​ខ្លួន បាន​ចូល​ទៅ​ផលិត​កម្ម​រស្មី​ហង្ស​មាស​ មិន​ទាន់​ទាំង​បាន​ចេញ​បទ​ចម្រៀង​ផង​ តែ​ពេល​នេះ​ខាង​ផលិត​កម្ម​គេ​ហាក់​ផ្តល់​ទំនុក​ចិត្ត​មួយ​មក​ឲ្យ​កូន​របស់​ អ្នក​ស្រី​ម្នាក់​ទៀត​។ អ្នក​ស្រី មិន មានិត ប្រាប់​ថា៖​«​ខាង​ផលិតកម្ម​ហង្ស​មាស គេ​បាន​ចាប់​អារម្មណ៍ លើ​កូន​ស្រីខ្ញុំ សុខ ស្រី​លក្ខណ៍​ ​មួយ​ទៀត ខណៈ​ផលិតកម្ម​នេះ​បាន​ផ្តល់​ឱកាស​ឲ្យ​កូន​ខ្ញុំ​សុខ សីឡាលីន​ មួយ​ហើយ​នោះ។ ខាង​ផលិតកម្ម​ហង្សមាស គេ​បាន​សួរ​ខ្ញុំ​ថា ​តើ​ចង់​ឲ្យ​ស្រីលក្ខណ៍​ចូល​ច្រៀង​ឲ្យ​ហង្សមាស​ម្នាក់​ទៀត​ទេ?»។

អ្នក ស្រី​បន្ត​ថា សម្រាប់​អ្នក​ស្រី​ជា​ម្តាយ​ពេល​ឮ​ដំណឹង​នេះ ​អ្នក​ស្រី​ពិត​ជា​ចង់​ឲ្យ​កូន​ស្រី​ម្នាក់​ទៀត​បាន​ចូល​ទៅ​ផលិត​កម្ម​ ហង្សមាស​នេះ​ណាស់ ​ព្រោះ​ថា​នេះ​ជា​ឱកាស​ដែល​រត់​មក​រក​យើង ​ខណៈ​​ដែល​ឱកាស​បែប​នេះ​ស្ទើរ​មួយ​ជីវិត​តារា​មួយ​ចំនួន​ខំ​ស្វែង​យ៉ាង​ណា​ ក៏​នៅ​តែ​មិន​ជួប​នោះ​។

តែ​ពេល​នេះ​អ្វីៗ​នៅ​មិន​ទាន់​ប្រព្រឹត្ត​ទៅ​តាម ​ការ​ចង់បាន​របស់​អ្នក​ស្រី​នោះ​ទេ ​ព្រោះ​ ​សុខ ស្រីលក្ខណ៍ ​មិន​សូវ​ចង់​ចូល​ខ្លួន​​ចុះ​កុង​ត្រាច្រៀ​ង​ឲ្យផលិត​កម្ម​ណា​​នោះទេ​ ខណៈ​នា​ង​តែង​ពោល​ជា​រឿយៗ​ថា ​ចង់មាន​សេរីភាព​។ អ្នក​ស្រី​បន្ត​ថា៖​«ស្រីលក្ខណ៍​កូនខ្ញុំ​សព្វ​ថ្ងៃ​នាង​មមាញឹក​ខ្លាំង​ណាស់ មិន​ចាញ់​បង​ស្រី​គេ ឡាលីន ទេ​ ដ្បិត​ថា​នាង​មិន​ច្រៀង​ឲ្យ​ផលិត​កម្ម​ពិត​ប្រាកដ ប៉ុន្តែ​ការងារ​នាង​មាន​គ្រប់​ច្រក​ល្ហក​ទាំង​អស់​»។

អ្នក ​ស្រី​បញ្ជាក់​ថា៖​«មិន​ថា​ខន​សឺតតាម​ខេត្ត ​កម្មវិធី​ប្រគំ​តន្រ្តី​ចុង​សប្តាហ៍​តាម​ស្ថានីយ​​ទូរទស្សន៍ ​និង​កម្មវិធី​ជាតិ​ធំៗ​ទេ​គឺ​ភាគ​ច្រើន​មាន​មុខ​កូន​ខ្ញុំ​ផង​ដែរ​ ព្រោះ​ថា​នាង​សព្វ​ថ្ងៃ​ជា​បុគ្គលិក​ក្រសួង​ទេសចរណ៍​ និង​ជា​តារា​ចម្រៀង​​ក្នុង​ក្រុម​សិល្បៈ​ក្រសួង​ទេសចរណ៍​នោះ​ផង​ដែរ​»។

ប៉ុន្តែ ​យ៉ាង​ណា​ក៏​ដោយ អ្នក​ស្រី​នៅ​តែ​បង្ហាញ​ពី​ជំហ​រចង់​ឲ្យ​កូន​ម្នាក់​ទៀត​មាន​ទ្រនំ​ត្រឹម​ ត្រូវ​ និង​ចង់់​ឲ្យ​កូន​ស្រី​ទាំង​ពីរ​ជ្រក​ក្រោម​ទ្រនំ​តែ​មួយ​ ដោយ​អ្នក​ស្រី​លើក​ឡើង​​ថា ជា​រឿង​ល្អ​មួយ​​ដែល​តារា​ចម្រៀង​ម្នាក់​ ត្រូវ​តែ​មាន​ទ្រនំ​ពិត​ប្រាកដ ​ហើយ​ក៏​មិន​អន់​ដែរ​សម្រាប់​តារា​ចម្រៀង​​​ចុះ​កុង​ត្រា​ឲ្យ​ផលិតកម្ម​ណា ​នោះ ​ព្រោះ​​អាច​និយាយ​ថា​ជា​ឆ្នាំង​បាយ​ក៏​បាន​ និង​អាច​រុញ​​អ្នក​ចម្រៀង​ឲ្យ​ល្បី​បាន​។

អ្នក​ស្រី​អះអាង​ថា​៖ «​បើ​ខាង​ហង្ស​មាស​ពិត​ជាត្រូវ​ការ​កូន​ខ្ញុំ​ស្រី​លក្ខណ៍​នោះ ​ខ្ញុំនឹង​ពេញ​ចិត្ត​ឲ្យ​កូន​ចូល​ទៅ​ផលិតកម្ម​នោះ​ណាស់​ ហើយ​ខ្ញុំ​ពន្យល់​កូន​ក៏​កាន់​តែ​ច្បាស់​​ក្នុង​ដំណើរ​តារា​ចម្រៀង​ម្នាក់ មាន​ផលិត​កម្ម​ត្រឹម​ត្រូវ​នោះ»​។

កញ្ញា​ សុខ ស្រី​លក្ខណ៍ បាន​ទទួល​ស្គាល់​ដែរ​ថា​ ពិត​ជា​ត្រូវ​បាន​ផលិតកម្ម​រស្មី​ហង្សមាស ទាក់​ទង​នាង​ប្រាកដ​មែន។ នាង​និយាយ​ថា៖​ «​គេ​ទាក់​ទង​តាម​រយៈ​បង​ស្រី​របស់​ខ្ញុំ សុខ ​សីឡា​លីន​ ហើយ​ខាង​ផលិតកម្ម​គេ​ឲ្យ​ខ្ញុំ​ថត​សំឡេង​ឲ្យ​គេ​ស្តាប់​សិន។ ពេល​នេះ​ខ្ញុំ​កំពុង​​ត្រៀម​លក្ខណៈនឹង​ថត​សំឡេង​ខ្ញុំ​យក​ទៅ​ឲ្យ​ផលិតកម្ម ​រស្មី​ហង្ស​មាស​វាយ​តម្លៃ ប៉ុន្តែ​យ៉ាង​ណា ខ្ញុំនៅ​មិន​ទាន់​ដល់​ដំណាក់​កាល​ចុះ​កុង​ត្រា​ជា​មួយ​ទេ»។

យ៉ាងណា​នាង​ហាក់​ដឹង​ពី​ការ​បែង​ចែក​តារា​ចម្រៀង​របស់​ផលិត​កម្ម​នោះ​ដោយ​នាង​និយាយ​ថា៖​«ប្រសិន​បើ​ការ​ចរចា​នេះ​ត្រូវ​រ៉ូវ​គ្នា​ឬ​យ៉ាង​ណា​នោះ ខ្ញុំ​ប្រហែល​ជា​ខាង​ផលិតកម្ម​តម្រូវ​ឲ្យ​ខ្ញុំ​ច្រៀង​ក្នុង​ផលិតកម្ម​ ភ្លេង​រីខដ​ (Phleng Records) ដែល​ជា​សាខា​ថ្មី​របស់​ហង្សមាស​មិន​មែន​ជា​ផលិត​កម្ម​រស្មី​ហង្សមាស​តែ​ ម្ដង​នោះ​ទេ ព្រោះ​វា​ជា​ក្រុម​ហ៊ុន​តែ​មួយ​»។

តារា​ចម្រៀង​វ័យ​ក្មេង​ ប្រចាំ​ក្រសួង​ទេសចរណ៍​រូប​នេះ​ក៏​លើក​ឡើង​​ឲ្យ​ដឹង​ដែ​រថា៖​«មុន​នេះ ​ខ្ញុំ​មិន​សូវ​ជា​ចង់​ចូល​ច្រៀង​ឬ​ចុះ​កុង​ត្រា​ឲ្យ​ផលិត​កម្ម​ណា​មួយ​ទេ​ ព្រោះ​នៅខាង​ក្រៅផ​លិត​កម្ម​ ខ្ញុំ​មាន​ការងារ​មមាញឹក​ណាស់់​ទៅ​ហើយ ទាំង​ការងារ​រដ្ឋ​ក្នុង​ក្រសួង​នោះ ​ដូច្នេះ​ខ្ញុំ​ក៏​មាន​ការ​ស្ទាក់់​ស្ទើរ​ដែរ តែ​ពេល​នេះ​ទទួល​បាន​ការ​ណែនាំ​​ពី​បង​ស្រី ​និង​ម្តាយ ខ្ញុំ​ក៏​គិត​ថា​ តារា​ចម្រៀង​ម្នាក់​មាន​ទ្រនំ​ច្រៀង​រាំ​ច្បាស់​លាស់​នោះ​ក៏​ល្អ​ដែរ​»។

ជាមួយ នឹង​ការ​ត្រៀម​ចូល​ផលិតកម្ម​ថ្មី​នេះ សុខ ស្រី​លក្ខណ៍​ បាន​សម្ដែង​សុទិដ្ឋិនិយម​ថា៖​«ប្រសិន​បើ​​រស្មី​ហង្ស​មាស សម្រេច​ជ្រើស​រើស​យក​ខ្ញុំ​មែន​នោះ ខ្ញុំ​នឹង​ខិតខំ​ប្រឹងប្រែង​ឲ្យ​អស់​ពី​សមត្ថ​ភាព ធ្វើ​យ៉ាង​ណា​ឲ្យ​ល្បី​ដូច​ជា​បង​ស្រី​របស់​ខ្ញុំ មិន​ឲ្យ​ផលិតកម្ម​មួយ​នេះ​ខក​បំណង​នោះ​ទេ»៕

This content has been locked. You can no longer post any comments.
Show/hide comments
busy