Headlines:

កុល ដាវី ដឹក​ដៃ សុខ រក្សា​ ទៅ​ទឹក​ដី​កាណាដា ឆៃ លីដាឡែន ទៅ​បារាំង



121122_20a
តារា​ចម្រៀង ឆៃលី ដាឡែន ពេល​ចូលរួម​កម្មវិធី​កាលពី​ថ្មីៗ​កន្លង​ទៅ​នេះ។ រូបថត ស៊ូ វុទ្ធី

ភ្នំពេញ : ការ​អូស​បន្លាយ​កាល​កំណត់​ទៅ​សម្តែង​នៅ​ប្រទេស​កាណាដា​របស់​នាង​ កុល ដាវី ដោយ​សារ​ដៃគូ​នាង​ឆៃលី ដាឡែន​ ជួបនូវ​បញ្ហា​ជា​មួយ​នឹង​ស្ថាន​ទូត​កាណាដា​នោះ ពេល​នេះ​ខាង​ស្ពនស័រ​បាន​សម្រេច​ប្តូរ​ដៃគូ​ដោយ​យក​តារា​ចម្រៀង​លោក​ សុខ រក្សា ​ជំនួស​វិញ។ នាង​កុល ដាវី បាន​ប្រាប់​ថា នាង​ និង លោក សុខ រក្សា នឹង​ឡើង​យន្ត​ហោះ​ទៅ​សម្តែង​ប្រទេស​កាណាដា ​នៅ​ថ្ងៃ​ទី២៧ ​ខែ​វិច្ឆិកា​នេះ​ហើយ​។

មុន​នេះ​មិន​ត្រឹម​តែ កុល ដាវី និង ឆៃលី ដាឡែន ទេ​ដែល​ប្រកាស​ពី​វត្តមាន ថា​ខ្លួន​នឹង​លេច​វត្តមាន​នៅ​លើ​ទឹកដី​កាណាដា នៅ​ចុង​ខែ​តុលា​មុន​នោះ​។ ​សូម្បី​តែ​អ្នក​ស្ពនស័រ​លោក ឃុន ដេវីដ ក៏បាន​ផ្សព្វផ្សាយ​ពី​វត្ត​មាន និង​បាន​បោះ​ក្រដាស​ផ្សព្វផ្សាយ​ចែក​ជូន​បង​ប្អូន​ខ្មែរ​នៅ​កាណាដា​ រហូត​មាន​ទាំង​អ្នក​កក់​សំបុត្រ​ចូល​ទស្សនា​ទៀត​ផង ឯបុរសៗ​មួយ​ចំនួន​នៅ​ទីនោះ​ក៏​ត្រៀម​ធ្វើ​ខួប​កំណើត ​និង​រំពឹង​ក្រេម​រសជាតិ​ស្រា​ក្រហម​ជាមួយ​ស្រី​ស្រស់​សិច​ស៊ី​ទាំង​ពីរ​ ដួង​នេះ​ទៀត​ផង។​ ប៉ុន្តែ​ពួក​នាង​មិន​បាន​បង្ហាញ​វត្ត​មាន​ខ្លួន​តាម​ការ​គ្រោង​ទុក​ឡើយ​។

លោក ​ ឃុន ដេវីដ ដែល​ជា​អ្នក​នាំ​តារា​ពី​ដួង​ទៅ​សម្តែង​នៅ​ប្រទេស​កាណាដា​នោះ បាន​ឲ្យ​ដឹង​ថា៖ «បើ​តាម​កាល​កំណត់​ពី​មុន​នោះ​ កុល​ ដាវី និង​ឆៃលី ដាឡែន ត្រូវ​ទៅ​សម្តែង​នៅ​កាណាដា តាំង​ពី​ចុង​ខែ​តុលា ប៉ុន្តែ​រង​​ការ​ខកខាន​មិន​បាន​ទៅ​តាម​គម្រោង ដោយ​សារ​តែ​តារា​ខ្លះ​គាត់​មិន​អាច​បំពេញ​សំណុំ​បែប​បទ​តាម​សំណើរ​តម្រូវ​ដោយ ស្ថាន​ទូត​កាណាដា​​ប្រចាំ​ក្រុង​បាងកក​បាន»។

លោក​ថ្លែង​ក្នុង​សារ អេឡិច​ត្រូនិក​ថា៖ «នៅ​ខាង​ស្ថានទូត​កាណាដា គេ​បាន​ទាក់់ទង​មក​កញ្ញា ឆៃលី ដាឡែន ដើម្បី​សួរ​នាំ​ពី​ដំណើរ​ទៅ​សម្តែង​នៅ​ប្រទេស​កាណាដា​ មាន​រយៈ​ពេល​ប៉ុន្មាន​ថ្ងៃ​ នឹង​ចង់​ឲ្យ​នាង​យក​ឯសារ​មួយ​ចំនួន​ទៅ​បំពេញ​បន្ថែម​ តែ​ខល​មក​នាង​មិន​លើក​ទូរស័ព្ទ ទើប​ដំណើរ​ទៅ​សម្តែង​នេះ​ត្រូវ​បាន​ពន្យារ​ពេល»។

ដ្បិត​ថា​អវត្តមាន ឆៃលី ដាឡែន ប៉ុន្តែ​គម្រោង​នោះ ​មិន​បាន​លុប​ចោទ​នោះ​ទេ ដោយ​ខាង​សមាគម​ខ្មែរ​នៅ​កាណាដា បាន​រៀបចំ​សំណុំ​ឯកសារ​រួច​រាល់​អស់​ហើយ​ឲ្យ​លោក លោក​ សុខ រក្សា ទៅ​សម្ដែង​ជាមួយ​នាង កុល ដាវី វិញ។

តារា​ស្រី​ល្បីខាង​សិចស៊ី​ កុល ដាវី បាន​ថ្លែង​ថា​៖ «ពេល​នេះ​អ្វីៗ​ដំណើរ​ការ​រលូន​ហើយ​ មិន​មាន​ការ​ខក​ខាន​ទៀត​ទេ ហើយ​ខ្ញុំ​នឹង​ឡើង​យន្ត​ហោះ​ទៅ​សម្តែង​នៅ​កាណាដា​ នៅ​ថ្ងៃ​ទី២៧​ ខែ​វិច្ឆិកា ហ្នឹង​ហើយ ជាមួយ​នឹង​លោក​ សុខ រក្សា។ រីឯ​កញ្ញា ឆៃលី​ ដាឡែន គាត់​ត្រូវ​ផ្លាស់​ទៅ​បារាំង​វិញ»។

នាង​ក៏​បាន​លើក​ឡើង​ឲ្យ​ដឹង​បន្ត​ថា៖ ​«ខ្ញុំ​និង​លោក​សុខ រក្សា មាន​ការ​ត្រៀម​លក្ខណៈ​បាន​ល្អ​ណាស់​ក្នុង​ការ​ចេញ​ទៅ​សម្តែង​នៅ​កាណាដា​នេះ ពោល​គឺ​ពួក​យើង​បាន​ធ្វើ​ការ​ហាត់​សម​បទ​ចម្រៀង​ជា​មួយ​គ្នា​រួច​រាល់​ហើយ​ ដែរ​»។

ថ្វី​ដ្បិត​ថា​ការ​ចេញ​ទៅ​សម្តែង​ក្រៅ​ប្រទេស​នេះ​ជា​លើក​ទី​មួយ​ និង​មិន​មែន​ជំនាញ​ពិត​ របស់​នាង​ កុល​ ដាវី​ក៏ដោយ​តែ ​នាង​ហាក់​មាន​ជំនឿ​ក្នុង​ការ​ទទួល​បាន​ជោគ​ជ័យ​ ដោយ​នាង​លើក​ឡើង​ថា៖ «ដ្បិត​ថា ដំណើរ​ចេញ​ទៅ​សម្តែង​នៅ​កាណាដា ជា​ការ​បើក​ឆាក​របស់​ខ្ញុំ​ជា​លើក​ដំបូង តែ​ខ្ញុំ​មាន​ការ​ជឿជាក់​លើ​សមត្ថភាព​ និង​ទេពកោសល្យ​របស់​ខ្ញុំ ថា​អាច​ធ្វើ​កើត​ឬ​មិន​កើត​នោះ​»។

តារា​ចូល​ចិត្ត​សម្ញែង​ដើម​ទ្រូង​រូប​ នេះ​បាន​ប្រាប់​ថា៖ «ខ្ញុំ​បាន​ធ្វើ​ការ​ហាត់​រៀន​ច្រៀង​ បទ​ចម្រៀង​ពី​ដើមៗ​បាន​ច្រើន​បទ​ដែរ ដែល​ភាគ​ច្រើន​បទ​ឆ្លង​ឆ្លើយ ​និង​ជា​ការ​ពេញ​និយម​របស់​បង​ប្អូន​ខ្មែរ​នៅ​ក្រៅ​ស្រុក ជាមួយ​នឹង​សម្លៀក​បំពាក់​បែប​ប្រពៃណី​ខ្មែរ​»។

ចំណែក​ឯលោក សុខ រក្សា ក៏​បាន​ឲ្យ​ដឹង​ផង​ដែរ លោក​បាន​ប្រាប់​ថា៖ «ខ្ញុំ​បាន​ចូល​ទៅ​ធ្វើ​តេស្ត​នៅ​ស្ថាន​ទូត​កាណាដា នៅ​ក្រុង​បាំង​កក​ កាល​ពីថ្ងៃ​ទី​១៥​ខែ​ វិច្ឆិកា​ជាមួយ​នឹង​កញ្ញា ​កុល ដាវី ហើយ​ពួ​ក​ខ្ញុំ​ក៏​បាន​ធ្វើការ​ហាត់​សម​បទ​ចម្រៀង​ជា​មួយ​គ្នា​កាល​ពី​នៅ​ បាំង​កក​នោះ​បាន​​ខ្លះៗ​ហើយ​ដែរ»៕

This content has been locked. You can no longer post any comments.
Show/hide comments
busy