Headlines:

ខាត់ សុឃីម បញ្ជាក់​រឿង​ជួល​ប្តី​រៀប​ការ



121226_20a
អ៊ិន សុផាណូ និង​ ខាត់ សុឃីម​ នៅ​ពេល​ទទួល​ភ្ញៀវ​​ក្នុង​ថ្ងៃ​រៀប​ការ​​។ រូបថត សេត គឹមសឿន

ភ្នំពេញៈ តើ​តារា​ចម្រៀង​បែប​កំប្លែង​មាន​ប្រភព​ពី​អ្នក​ច្រៀង​ភ្លេង​ការ​នៅ​ភ្នំ​បាសិត​នាង ខាត់ សុឃីម ពិត​ជា​ជះ​លុយ​ជួល​លោក អ៊ិន សុបញ្ញា ហៅ សុផាណូ រៀប​ការ​ធ្វើ​ប្តី​មែន​ឬ​? ហាក់​ដូចជា​ក្តៅ​ស្លឹក​ត្រចៀក​ដែរ ខាត់ សុឃីម បាន​និយាយ​ភ្លាម​ថា ថ្វី​ដ្បិត​មាន​គេ​ថា នាង​ស្រឡាញ់​ប្រុស​ក្មេង តែ​ស្នេហា​ប្តី​ប្រពន្ធ​របស់​នាង​ជា​ស្នេហ៍​បរិសុទ្ធ​។ ភ្លាម​នោះ លោក អ៊ិន សុផាណូ ក៏​បាន​បញ្ជាក់​ថា លោក​ជា​កូន​ប្រុស​ដើម​ទ្រូង​ប្រាំ​ហត្ថ លោក​មិន​ដល់​ថ្នាក់​លក់​ខ្លួន​នោះ​ទេ​។

ខណៈ​ពេល​ដែល​ភាព​សប្បាយ​រីក​រាយ​ជាង​គេ​នៅ​ក្នុង​ឆាក​ជីវិត​របស់​អ្នក​នាង ខាត់ សុឃីម និង​លោក អ៊ិន សុផាណូ ក្រោម​ដំបូល​អាពាហ៍​ពិពាហ៍​កំពុង​តែ​កើត​មាន​ឡើង​នោះ ការ​រិះ​គន់​របស់​អ្នក​ក្រៅ និង​ក្នុង​សិល្បៈ ក៏​បាន​រំលេច​ឡើង​ស្រប​គ្នា​នោះ​ដែរ​។ មាន​ការ​និយាយ​ថា ស្នេហា​មួយ​នេះ​មិន​មែន​ជា​ការ​ពិត​ទេ ដោយ​អ្នក​ខ្លះ​បាន​រិះ​គន់​ថា ស្រី​ចាស់​ស្រឡាញ់​ប្រុស​ក្មេង ពោល​គឺ​ស្នេហា​ប្រើ​ទឹក​លុយ​ជា​ធ្នាក់ ហើយ​មាន​មនុស្ស​មួយ​ចំនួន​នោះ​ហ៊ាន​និយាយ​ដល់​ថ្នាក់​ថា លោក អ៊ិន សុផាណូ ត្រូវ​បាន​អ្នក​នាង ខាត់ សុឃីម ជួល​ឲ្យ​រៀប​មង្គល​ការ​ជាមួយ​ទៀត​ផង​។

ប៉ុន្តែ​ការ​និយាយ​ស្តី​របស់​អ្នក​រិះ​គន់​ខ្លាំងៗ​ជា​ថ្មី​ជុំវិញ​ស្នេហា​ខុស​វ័យ​មួយ​នេះ ហើយ​ថែម​ទាំង​ការ​និយាយ​នូវ​សម្តី​មិន​សម​រម្យ​ថា ស្នេហា​នេះ​កើត​ឡើង​ពី​ការ​ជះ​ទឹក​លុយ​ពោល​គឺ ខាត់ សុឃីម ជួល អ៊ិន សុផាណូ រៀប​ការ​ជាមួយ​ត្រូវ​បាន​អ្នក​នាង ខាត់ សុឃីម និង​លោក អ៊ិន សុផាណូ បដិសេធ ហើយ​ពួក​គេ​ក៏​មិន​ខ្លាច​នឹង​ទម្លាយ​អំពី​ចំណង​ស្នេហ៍​នេះ​ជា​ថ្មី​ប្រាប់​ដល់​មហា​ជន​ដែរ។ ទាំង ខាត់ សុឃីម និង អ៊ិន សុផាណូ បាន​និយាយ​ហាក់​ផុស​ចេញ​ពី​បេះដូង​តែ​មួយ​ថា ស្នេហា​របស់​ពួក​គេ​ជា​ស្នេហា​ពិត​ផ្តើម​ចេញ​ពី​បេះដូង​បរិសុទ្ធ​ហើយ​ពួក​គេ​បាន​តស៊ូ​ជម្នះ​ការ​រិះ​គន់​មិន​តិច​ទេ ទម្រាំ​តែ​ឈាន​ដល់​ថ្ងៃ​មិន​អាច​បំភ្លេច​បាន​ក្នុង​នាម​ជា​ប្តី​ប្រពន្ធ​ក្នុង​ឆាក​ជីវិត​នេះ​។

តារា​ចម្រៀង​ដែល​មាន​កូន​ប្រុស​ម្នាក់​ទើប​រៀប​ការ​នាង ខាត់ សុឃីម បាន​និយាយ​ចេញ​ពី​ចិត្ត​ស្មោះ​ថា៖​«​មាន​គេ​ថា ខ្ញុំ​ចាស់​ស្រឡាញ់​ក្មេង តែ​ស្នេហា​ខ្ញុំ​ជា​ស្នេហា​បរិសុទ្ធ ពួក​យើង​បាន​តស៊ូ​ជាមួយ​គ្នា​ច្រើន​ណាស់ ដើម្បី​ជម្នះ​ការ​រិះ​គន់​ទាំង​នេះ​ហើយ​យើង​បាន​សម្រេច​បំណង​ដ៏​ធំ​នៅ​ពេល​នេះ​»។

នៅ​ក្នុង​ចំណោម​ការ​រិះ​គន់​ទាំង​នោះ អ្វី​ដែល​ជា​ការ​និយាយ​ដ៏​ធ្ងន់​ធ្ងរ​មិន​អាច​ទទួល​យក​បាន​នោះ​គឺ​ការ​លើក​ឡើង​ថា អ្នក​នាង ខាត់ សុឃីម បាន​ជួល​លោក អ៊ិន សុផាណូ រៀប​មង្គល​ការ​ធ្វើ​ប្តី​តែ​លោក អ៊ិន សុផាណូ បាន​ចេញ​មុខ​បញ្ជាក់​ដោយ​ចិត្ត​ត្រជាក់​ស្រប​គ្នា​នឹង​ភរិយា​ថា មង្គល​ការ​ជា​រឿង​សំខាន់​បំផុត​នៅ​ក្នុង​ជីវិត​មិន​មែន​ជា​រឿង​លេង​សើច​ឡើយ ដូច្នេះ​ស្នេហា​របស់​លោក និង​ភរិយា​នាង ខាត់ សុឃីម គឺ​កើត​ឡើង​ពី​ក្តី​ស្រឡាញ់​ស្មោះ​ភក្តី​ពិត​ប្រាកដ ហើយ​លោក​និយាយ​ក្នុង​នាម​ជា​កូន​ប្រុស​ដើម​ទ្រូង​៥​ហត្ថ​។ លោក​បាន​បញ្ជាក់​ថា សូម​កុំ​មើល​ងាយ​អ្នក​សិល្បៈ​បែប​នេះ ព្រោះ​អ្នក​សិល្បៈ​ទាំង​អស់​មិន​ដូច​គ្នា​ទេ​។

លោក អ៊ិន សុបញ្ញា ហៅ ផាណូ បាន​និយាយ​ក្នុង​នាម​ជា​កូន​ប្រុស​ប្រកប​ដោយ​ទំនួល​ខុស​ត្រូវ​ថា៖​«​អ្នក​ខ្លះ​និយាយ​ថា ភរិយា​ខ្ញុំ​ជួល​ខ្ញុំ​រៀប​ការ​ជាមួយ ខ្ញុំ​ហួស​ចិត្ត​ណាស់​។ ខ្ញុំ​ជា​កូន​ប្រុស​ម្នាក់ ខ្ញុំ​មិន​ដល់​ថ្នាក់​លក់​ខ្លួន​រៀប​ការ​បែប​នេះ​ទេ តែ​ផ្ទុយ​មក​វិញ ពួក​ខ្ញុំ​ទាំង​ពីរ​ស្រឡាញ់​គ្នា​ដោយ​ស្នេហ៍​បរិសុទ្ធ​បំផុត​»។

លោក​បាន​បញ្ជាក់​ថា៖ ​«អ្នក​សិល្បៈ​ទាំង​អស់​មិន​ដូច​គ្នា​ទេ កុំ​មើល​ងាយ​អ្នក​សិល្បៈ​បែប​នេះ​»។

នេះ​មិន​មែន​ជា​លើក​ទី១​ឡើយ​ដែល​មាន​ការ​រិះ​គន់​បែប​នេះ​តែ​ស្នេហា​របស់​តារា​ទាំង​ពីរ​ដួង​នេះ ត្រូវ​បាន​មនុស្ស​ជា​ច្រើន​គាំទ្រ និង​មើល​ឃើញ​ស្ទើរ​ទាំង​អស់​គ្នា​ថា ក្តី​ស្នេហ៍​អ្នក​ទាំង​ពីរ​បាន​កើត​ឡើង​ដោយ​ចិត្ត​និង​ចិត្ត មិន​មែន​ស្នេហា​ហុត​ទឹក​សម្លឹង​កាក​ដូច​ការ​និយាយ​របស់​មនុស្ស​មួយ​ក្តាប់​តូច​នោះ​ឡើយ​៕

This content has been locked. You can no longer post any comments.
Show/hide comments
...
បើខ្ញុំជានាងនិងលោកផាណូខ្ញុំនិងប្តឺងរកមុខអ្នកនិយាយដើម្បីអោយទទួលខុសត្រូវចំពោះមុខច្បាប់។
អ៊ិន សំណាង on December 26, 2012 Report
vote down vote up Votes: 0
...
អោយគេមានសេចក្តីសុខផងមិនបានទេរឺ..?
chariya on December 25, 2012 Report
vote down vote up Votes: 0
busy