Headlines:

រមណីយដ្ឋាន​ភូមិ​ត្នោត ភូមិ​ឋាន​សុខភាព



121116_20a
ផ្ទះ​ឫស្សីប្រក់​ស្លឹក​នៅ​លើ​ផ្ទៃ​ទឹក សម្រាប់ភ្ញៀវ​អង្គុយលេង​កម្សាន្ត​ ឬ​ទទួលទាន​អាហារនានា។ រូបថត ហុង មិនា

ភ្នំពេញ : ក្រោយ​បំពេញ​ការងារ​ហត់​នឿយ​មួយ​សប្តាហ៍​នោះ នា​ថ្ងៃ​ឈប់​សម្រាក​ថ្ងៃ​សៅរ៍​អាទិត្យ ​អ្នក​ខ្លះ​ជ្រើស​យក​ការ​លម្ហែ​ឆ្នេរ​សមុទ្រ ខ្លះ​ទៀត​និយម​ទស្សនា​សួន​សត្វ ​ប្រាសាទ​បុរាណ​ដែល​នៅ​ជិតៗ​រាជធានី ភ្នំពេញ​ជា​ដើម។ ក្នុង​នោះ​រមណីយដ្ឋាន​ទេសចរណ៍ ​«ភូមិ​ត្នោត​ ភូមិ​ឋាន​សុខភាព» ដែល​គេ​ទើប​តែ​បង្កើត​ថ្មីស្ថិត​នៅ​ភូមិ​រាយ​ដប​ ឃុំ​សៀមរាប ស្រុក​កណ្តាល​ស្ទឹង​នោះ ក៏​គោល​ដៅ​ពេញ​និយម​ទាក់​ទាញ​ភ្ញៀវ​ទៅ​សម្រាក​កម្សាន្ត​លម្ហែ​កាយ​ផង​ដែរ ​។

រមណីយដ្ឋាន​ភូមិ​ត្នោត​ មាន​ចម្ងាយ​ប្រមាណ​តែ​២៦​គីឡូម៉ែត្រ​ប៉ុណ្ណោះ ​ពីទី​ក្រុង​ភ្នំពេញ។​ បើ​យើង​ចង់​ធ្វើ​ដំណើរ​ទៅ​ទី​នោះ យើង​គ្រាន់​តែ​ចំណាយ​ពេល​ប្រមាណ​៤០​នាទី​ឆ្លង​ស្ពាន​ស្ទឹង​មាន​ជ័យ រួច​បត់​ចូល​តាម​ផ្លូវ​ជើង​ឯក​ កាត់​ស្ពាន​ព្រែក​ជ្រៃ ​ឆ្ពោះ​ទៅ​ផ្លូវ​ជាតិ​លេខ​ពីរ​ ដល់​ទឹក​ដីឃុំ​សៀមរាប​ រួច​ក្រឡេក​មើល​ខាង​ឆ្វេង​ដៃ​នឹង​ឃើញ​ស្លាក​សរសេរ​ថា «ភូមិ​ត្នោត​ ភូមិ​ឋាន​សុខ​​សាន្ត» រួច​បត់​ចូល​ទៅ​តាម​ខ្លោង​ទ្វារ​ វត្ត​វិហារ​កំបោរ​ចម្ងាយ​ជាង​ពីរ​គីឡូម៉ែ​ត្រ​នឹង​​បាន​ឃើញ​ស្លាក​មួយ​ទៀត​ ដែល​ គេ​សរសេរ​ថា «ភូមិ​ត្នោត​»។

មិន​ខុស​ពី​ឈ្មោះ​របស់វា​ទេ រមណីយដ្ឋាន​ភូមិ​ត្នោត​នេះ​ស្ថិត​នៅ​កណ្តាល​វាល​ស្រែ​ព័ទ្ធ​ជុំវិញ​ដែល​ រំលេច​ទៅ​ដោយ​ដើម​ត្នោត​ និង​រុក្ខ​ជាតិ​តូច​ធំ​ពណ៌​ខៀវ​ស្រងាត់​ ដែល​ត្រូវ​បាន​គេ​ថែ​រក្សា ដើម្បី​តុប​តែង​ជា​មួយ​សំណង់​ធ្វើ​ពី​ឫស្សី ​និង​ដើម​ត្នោត​ ជា​សម្បត្តិ​ធម្មជាតិ​របស់​ខ្មែរ​។ ការ​តុប​តែង​ដ៏​ត្រជាក់​ភ្នែក​ដូច្នេះ​ បាន​ធ្វើ​ឲ្យ​ទីនេះ ក្លាយ​ទៅ​ជា​ទីកន្លែង​ទាក់ទាញ​ក្រៃ​លែង ​រួម​ទាំង​មាន​រស​ជាតិ​ម្ហូប​ខ្មែរ មាន់​ដុត​ និង​សម្លក​កូរ​ត្នោត​ផង​ដែរ។

លោក ​ឈឹម យឿន​ អ្នក​គ្រប់​គ្រង​រមណីយដ្ឋាន​ភូមិ​ត្នោត​ ភូមិ​ឋាន​សុខភាព​នេះ ​បាន​ឲ្យដឹង​ថា រមណីយដ្ឋាន​ភូមិ​ត្នោត​ ភូមិ​ឋាន​សុខ​ភាព​ ត្រូវ​បាន​ផ្តួច​ផ្តើម​ដោយ​លោក​ស្រី ពុំ ឆវី ​អតីត​កូន​កសិករ នៅ​ភូមិ​រាយ​ដប​នេះ ​ដែល​សព្វ​ថ្ងៃ​គាត់​ជា​មន្ត្រី​ចូល​និវត្តន៍​រស់​នៅ​ភ្នំពេញ។

លោក​បន្ត ថា៖ «រមណីយដ្ឋាន​បាន​ទាក់ទាញ​ភ្ញៀវ​ទេសចរជាតិ និង​អន្តរ​ជាតិ​រយៈ​ពេល​ពីរឆ្នាំ​​ហើយ។ វា​ធ្លាប់​ជា​ទី​ទួល​ខ្ពស់​មួយ​មិន​លិច​ទឹក​ មាន​ផ្ទៃដី​ជាង​ពីរ​ហិកតា​ មាន​ដើម​ត្នោត​១០០ ​ដើម​ និង​រុក្ខជាតិ​តូច​ធំរាប់​សិប​ដើម។ យើង​ថែរ​ក្សា និង​បាន​បន្ត​ដាំ​ដុះ​បន្ត​ក្រោយ​ពី​មាន​ការ​កែ​ប្រែ​ទី​នេះ​ឲ្យ​ក្លាយ​ជា រមណីយដ្ឋាន»។

អ្នក​គ្រប់គ្រង​វ័យ​៥៤​ឆ្នាំ​រូប​នេះ​បាន​បង្ហើប​ឲ្យ ដឹង​ទៀត​ថា៖ «គម្រោង​ក្នុង​ការ​អភិវឌ្ឍ​កែច្នៃ​តំបន់​រមណីយដ្ឋាន​ទេសចរណ៍​នេះ លើ​គម្រោង​ដី​ចំនួន​៦​ហិកតា ប៉ុន្តែ​ពេល​នេះ​ទើប​តែ​ធ្វើ​ការ​កែច្នៃ​ពង្រីក​បាន​ចំនួន​២ហិកតា​ទេ ។ ប៉ុន្តែ​លោក​បាន​អះអាង​ទៀត​ថា ពេល​នេះ​ថៅកែ​​កំពុង​សិក្សា​គម្រោង​ពង្រីក ដើម្បី​បំពេញ​តម្រូវ​ការ​ភ្ញៀវ ខណៈ​ដែល​សព្វ​ថ្ងៃ​រមណីយដ្ឋាន​នេះ​ទទួល​បាន​ភ្ញៀវ​ចូល​មក​កម្សាន្ត យ៉ាង​ច្រើន​កុះករ​នោះ»។

លោក ឈឹម យឿន បាន​ប្រាប់​ថា៖​«នៅ​ថ្ងៃ​សៅរ៍ និង​ថ្ងៃ​អាទិត្យ​ភ្ញៀវ​មក​លេង​ទី​នេះ​មិន​ដែល​ក្រោម​ពី​៤០០​នាក់​ទៅ ៥០០​នាក់​ទេ ហើយ​ភ្ញៀវ​នោះ​មាន​ចម្រុះ​ជាតិ​សាស្រ្ត​ ពិសេស​អ្នកនៅ​ភ្នំពេញ»។

យោង​តាម​ សម្ដី​របស់​លោក នៅ​រៀង​រាល់​ថ្ងៃ​អាទិត្យ​នៅ​ខាង​មុខ​នេះ ភូមិ​​ត្នោត​មាន​ផ្សារ​តូច​មួយ​នៅ​ចាំ​ស្វាគមន៍​ភ្ញៀវ​ទេសចរ ដែល​នៅ​ផ្សារ​នោះ​មាន ​លក់​បន្លែ​ ត្រី​សាច់ ​និង​ វត្ថុ​អនុស្សាវរីយ៍ កែច្នៃ​ចេញពី​វត្ថុ​ធាតុ​ដើម​ធម្មជាតិ ច្រើន​សម្រាប់​ភ្ញៀវ​ទេសចរ​ ហើយ​អ្នក​ដែល​ត្រូវ​បាន​អនុញ្ញាត​ឲ្យ​យក​របស់​នោះ​មក​លក់​ទៀត​សោធ​សុទ្ធ​តែ​ជា កុមារ​កំព្រា​និង​ស្ត្រី​មេម៉ាយ​នៅ​ក្នុង​ភូមិ​ឃុំ​នេះ​ ដែល​ទទួល​បាន​ការ​បណ្តុះ​បណ្តាល​លើ​ជំនាញ​កែច្នៃ និង​រៀប​ចម្លាក់ ដោយ​អង្គការ​ក្រៅ​រដ្ឋាភិបាល​ «​ដើម្បី​វិបុល​ភាព»។

ជាមួយ​ការ​ លើក​ឡើង​ឲ្យ​ដឹង​នេះ លោក ឈឹម យឿន បាន​រៀបរាប់​ឲ្យ​ដឹង​ពី​ការ​តុប​តែង និង​សោភណភាព​នៅ​ខាង​ក្នុង​រមណីយដ្ឋាន​ថា ចូល​ផុត​ខ្លោង​ទ្វារ​ភូមិ​ត្នោត​បន្តិច​នៅ​ខាង​ស្តាំ​ដៃ​មាន​ស្រះ​ទឹក​មួយ​ ត្រូវ​បាន​គេ​សង់​ជា​តូប​សម្រាប់​ជា​កន្លែង​អង្គុយ​លម្ហែ​កាយ។ នៅ​ខាង​ឆ្វេង​ដៃ​វិញ​មាន​សង់​អាង​ហែល​ទឹក​បែប​អឺរ៉ុប​មួយ ​ដែល​មាន​ទឹក​ថ្លា​សម្រាប់​ភ្ញៀវ​ហែល​លេង​កម្សាន្ត។ នៅ​ខាង​លិច​ អាង​ហែល​ទឹក​នោះ​មាន​ភោជនីយដ្ឋាន យ៉ាង​ធំ​មួយ​នៅ​ខាង​មុខ​ភោជនីយដ្ឋាន មានសង់​រូប​សំណាក​បុរស​ពាក់​មួក​ស្លឹក​ត្នោត ស្ពាយ​អង្រុត ​និង​ស្ត្រី​ទូល​ផ្លែ​ឈើ​មួយ​ល្អី​យ៉ាង​ពេញ​រង់​ចាំ​ស្វាគមន៍​ភ្ញៀវ​ទេសច​រ ​ដែល​ចូល​ទៅ​ពិសា​អាហារទី​នោះ។ ចំណែក​នៅ​ខាង​ក្នុង​ភោជនីយដ្ឋាន​វិញ ​ទាំង​តុ ​កៅអី​ សាឡុង​អង្គុយ​សម្រាប់​ភ្ញៀវ​ ទទួល​ទាន​ និង​សម្ភារ​តុប​តែង​ ផ្សេងៗ​ទៀត​សុទ្ធ​សឹង​ធ្វើ​ពីដើម​ត្នោត​សុទ្ធ​សាធ​។ ម្ហូប​អាហារ​នៅ​ទី​នេះ​មាន​តម្លៃ​ថោក​សមរម្យ​មាន​ចំនួន​៤០​មុខ  ដែល​អាហារ​ពិសេស​ប្រចាំ​ហាង នោះ​គឺ​មាន់​ដុត និង​សម្ល​កកូរ​ត្នោត​។ អ្វី​ដែល​ពិសេស​នោះគឺ ​ស្ករ​ត្នោត​ និង​ទឹក​ត្នោត​ ដែល​ផលិត​ដោយ​ដៃ​អ្នក​ធ្វើ​ការ​នៅ​ទីនេះ​ ទាញ​ចេញ​ពី​ដើម​ត្នោត​នៅ​ក្នុង​រមណីយដ្ឋាន​នេះ​សុទ្ធ​សាធ និង​គ្មាន​ជាតិ​គីមី​។

លោក យឿង បាន​ឲ្យដឹង​បន្ត​ថា នៅ​ខាង​លិច​ភោជនីយ​ដ្ឋាន នោះ​មាន​រោង​រម្ងាស់​ស្ករ​ត្នោត​តូច​មួយ​ដែលទឹក​ត្នោត​ទាំង​នោះ​ត្រូវ​បាន​គេ​ ឡើង​ត្រង​យក​ពី​ដើម​ត្នោត​នៅ​ទីនេះ។ ខាង​ជើង​ទល់​មុខ​ភោជនីយដ្ឋាន​មាន​កន្លែង​កម្សាន្ត ​សម្រាប់​កុមារ​ ទីលាន​កីឡា ​បណ្ណាល័យ ​ហាង​កាហ្វេ និង​សំណង់​បម្រើ​ការ​កម្សាន្ត​សប្បាយ​ផ្សេងៗ​ជា​ច្រើន​ទៀត​។ នៅ​ចំ​កណ្តាល​ ផ្លូវ​ចូល​មាន​សង់​រូប​សំណាក​បុរស​ម្នាក់​ស្លៀក​ខោ​ខ្លី ​ញក់​មួក ​ស្លឹក​ត្នោត​ ដៃ​ម្ខាង​កាន់​កាំបិត​ត្នោត និង​ដៃ​ម្ខាង​ទៀត​កាន់​ដង​រែក​បំពង់​ទឹក​ត្នោត​ បង្ហាញ​ពី​មុខ​របរ​ដូន​តា​ដ៏​ចំណាស់​មួយ​នេះ​មិន​បាត់​បង់​ឡើយ​។ នៅ​បរិវេណ​ខាង​លិច​មាន​សង់​ផ្ទះ​ឫស្សី​ប្រក់​ស្លឹក​ត្នោត​ជា​ពីរ​ជួរ មួយ​ជួរ​មាន​ផ្ទះ ​ដោយ​មាន​ការ​តុប​តែង​តាម​បែប​ធម្មជាតិ ​លម្អ​ទៅ​ដោយ​សួន​ច្បារ​ អាងហែល ពោង​ទឹក ​និង​ សម្បុក​ចាប​រយីង​រយោង​នៅ​ពី​មុខ​ផ្ទះ​ដែល​ប្រកប​ទៅ​ដោយ ​ផាសុកភាព​ មើល​ទៅ​គួរ​ឲ្យ​ចង់​ស្នាក់​នៅ​ក្រៃលែង​។

លោក ឈឹម យឿន បាន​បញ្ជាក់​ថា៖ «រមណីយដ្ឋាន​ភូមិ​ត្នោត​ ភូមិ​ឋាន​សុខភាព នេះ​ក្រៅ​ពី​ស្វែង​រក​​ចំណូល​ពី​សេវាកម្ម​នេះ​នោះ ​គឺ​ការ​បង្កើត​ឡើង​នេះ​ក្នុង​ន័យ ​រួម​ចំណែក​ថែ​រក្សា​កេរ​មរតក​ដូន​តា ពិសេស​គឺ​ធម្មជាតិ​​រុក្ខ​ជាតិ​ដើម​ត្នោត និង​រុក្ខ​ជាតិ​ឫស្សី​តែង​ម្ដង»៕

This content has been locked. You can no longer post any comments.
Show/hide comments
...
can you please give the contact details of that place please?
Tharoth on November 18, 2012 Report
vote down vote up Votes: 0
busy