Headlines:

សូម៉ាហ្វាម​ប្រើ​បច្ចេកទេស​ធម្មជាតិ



121123_20a
ផ្កាអ័រគីដេ​ច្រើន​ពូជ​ត្រូវ​បាន​ដាំ​ជា​ជួរ​យ៉ាង​មាន​សណ្ដាប់​ធ្នាប់​នៅកសិដ្ឋាន​​សូម៉ាហ្វាម​​។ រូបថត ឈឹម ស្រីនាង

ភ្នំពេញ : យើង​ធ្វើ​ដំណើរ​ទៅ​តាម​ផ្លូវ​ជាតិ​លេខ​២​ឆ្ពោះ​ទៅ​ជិត​ដល់​ទន្លេ​បាទី​ នៅ​ខាង​ឆ្វេង​ដៃ​នោះ​ យើង​នឹង​ឃើញ​កសិដ្ឋាន​មួយ​ដែល​មាន​របង​ព័ទ្ធ​យ៉ាង​វែង​ ខណៈ​ដែល​សម្រែក​ខ្ញៀវ​ខ្ញារនៃ​សត្វ​មាន់ និង​ក្លិន​ចំណី​សត្វ​បាន​រសាត់​តាម​ខ្យល់។ ​កសិដ្ឋាន​នោះ​មាន​ឈ្មោះថា​ សូ​ម៉ា​ហ្វាម​ដែល​មាន​ផ្ទៃ​ដី​ប្រមាណ​ជា​៣០០​ហិកតា​បម្រើ​លើ​ការ​ដាំ​ដុះ​ ដំណាំ​ និង​សត្វ។ ក្រៅពី​ការ​ចិញ្ចឹម​បសុ​សត្វ​ត្រី និង​សត្វ​ពាហនៈ កសិដ្ឋាន​នេះ​ក៏​ទទួល​នូវ​ម្លប់​ពី​រុក្ខជាតិ​ដទៃ​ដូចជា​ដំណាំ​ ខ្មុរ​ ដូង​ក្រអូប​ ស្វាយ​ ក្រូចឆ្មារ បន្លែ​ ស្រូវ​ពូជ ​និង​ផ្កា​អ័រ​គីដេ​ដ៏​ច្រើន​ពណ៌​ជាដើម។​

កសិដ្ឋាន​សូម៉ាហ្វាម​មាន​វាល​ស្រែ​ដ៏​ធំ​ស្ថិត​នៅ​ស្រុក​គិរីវង់ ដែល​មាន​ផ្ទៃ​ដី​ប្រហែល​ជា​៣៥៩​ហិកតា។ លោក សឿង សាំងអេម ប្រធាន​គ្រប់គ្រង​កសិដ្ឋាន បាន​ឲ្យ​ដឹង​ថា ​ដំបូង​ឡើយ ទី​នេះ​ជា​តំបន់​ដាច់​ស្រយាល​ដូច្នេះ​វត្តមាន​របស់​កសិដ្ឋាន​មានគោល​ បំណង​ពង្រីក​វិស័យ​កសិកម្ម​ ដើម្បី​ឲ្យ​ប្រជាជន​នៅ​ទីនោះ​មាន​ការ​ងារ​ធ្វើ និង​បាន​យល់​ដឹង​ពី​បច្ចេកទេស​ដាំដុះ​ច្បាស់​លាស់​។ ម៉្យាង​វិញ​ទៀត កសិដ្ឋាន​សូម៉ាហ្វាម​ក៏​មាន​ទទួល​និសិ្សត​ជំនាញ​ផ្នែក​នេះ​ចុះ​​មក​ស្រាវ​ជ្រាវ​ផ្ទាល់​ផង​ដែរ។

ប្រធាន​គ្រប់គ្រង​កសិដ្ឋាន​រូប​នេះ បាន​ឲ្យ​ដឹង​ទៀត​ថា៖ «គោល​ដៅ​សំខាន់​របស់​កសិដ្ឋាន​ទៅ​ថ្ងៃ​អនាគត​គឺ​យើង​ចង់​តែ​ប្រើ​បច្ចេកវិទ្យា​មួយ​គឺ​យើង​ដាក់​ជីធម្មជាតិ​ដែល​យើង​ផលិត​ដោយ​ខ្លួន​ឯង​ទៅ​លើ​ គ្រប់​ដំណាំ​»។

កសិដ្ឋាន​ដែល​កកើត​ឡើង​តាំង​ពី​១៩៩៥​ បច្ចុប្បន្ន​បាន​ប្រមូល​កសិករ និង​អ្នក​បច្ចេក​ទេស​ដែល​ចេញ​មក​ពី​សាលា​កសិកម្ម​ឲ្យ​មក​បម្រើ​ការងារ​ នៅទីនេះ។​

លោក​បាន​បន្ត​ទៀត​ថា ​កសិដ្ឋាន​របស់​លោក​មាន​ទិសដៅ​​ធំ​បំផុត​គឺ​ទី​មួយ​ការ​ចិញ្ចឹម​ត្រី និង​សត្វ​ដែល​មាន​គោ​មាន​៦​ប្រភេទ​ គឺ​ប្រភេទ​ហូស្ទេន ប្រាម៉ាន់​ត្រចៀក​វែង ​ប្រាម៉ាន់​ក្រហម ​ប្រាម៉ាន់​ត្រចៀក​ខ្លី កំផែង​សែន និង ដ្រហ្វ​ម៉ាស្ទើរ។ ចំណែក​ឯ​មាន់​វិញ​គឺ​មាន​ប្រភេទ​សម្រាប់​​យក​ស៊ុត​ និង​មាន់​បី​សាសន៍។ ​រីឯ​ទី២​គឺ​ដំណាំ​ដែល​កសិដ្ឋាន​ផ្ដោត​ខ្លាំង​ជាង​គេ​លើ​ដូង ជា​ពិសេស​គឺ​ដូង​ក្រអូប​តែ​ម្ដង ដោយ​សារ​តម្រូវ​ការ​ខ្ពស់​ពី​អតិថិជន​។

លោក បញ្ជាក់​ទៀត​ថា​ ចំណុច​សំខាន់​របស់​កសិដ្ឋាន​គឺ​ការ​ប្រើ​ប្រាស់​ជី​ធម្មជាតិ​ និង​ចំណី​មិន​លាយ​ឡំ​ជាតិ​គីមី​ដែល​យើង​ផ្តល់​ទៅ​ឲ្យ​សត្វ និង​រុក្ខជាតិ។

លោក សឿង សាំងអេម និយាយ​ថា៖ «​លក្ខណ​ពិសេស​របស់​ខ្ញុំ​ក្នុង​ការ​ដាំ​បន្លែ​ គឺ​ពួក​ខ្ញុំ​សុទ្ធតែ​ជា​អ្នក​បច្ចេក​ទេស​ដែល​ចេញពី​សាលា​កសិកម្ម​ក្នុង​ ស្រុក និង​ក្រៅ​ស្រុក​ ហើយ​គោល​ការ​ណ៍នៅ​ក្នុង​កសិ​ដ្ឋាន​នេះ​គឺ​តម្រូវ​ឲ្យ​ប្រើ​ប្រាស់​ជី​ធម្មជាតិ​ អ៊ីចឹង​ហើយ​ទិន្ឋ​ផល​របស់​ខ្ញុំ​នេះ​គឺ​មាន​ការ​ទទួល​ស្គាល់​​ខ្ពស់​ ហើយ​គុណ​ភាពក៏​ល្អ ជា​ពិសេស​​គឺ​ការ​ប្រើ​ប្រាស់​ជី​ធម្មជាតិ»។​​

ជី ដែល​ប្រើ​ប្រាស់​នៅ​ក្នុង​កសិដ្ឋាន​នេះ​គឺ​ផលិត​ដោយ​​អ្នក​បច្ចេកទេស​ទីនោះ ផ្ទាល់​ ដោយ​ធ្វើ​ការ​កែ​ច្នៃ​ផលិតផល និង​កាក​សំណល់​មាន​ស្រាប់​ក្នុង​កសិដ្ឋាន​ ដើម្បី​ធ្វើ​ជី​ធម្មជាតិ​នេះ។​ កាក​សំណល់​ទាំង​នោះ​រួម​មាន​លា​មក​មាន់​ គោ ​និង​កាក​សំណល់​រុក្ខជាតិ​ដែល​ត្រូវ​បាន​យក​មក​ផ្សំ​ចូល​គ្នា​ដើម្បី​ធ្វើ​ ជា​ជី​កំប៉ុស។

ក្រៅពី​ចរាចរណ៍​លក់​ក្នុង​ស្រុក និង​គម្រោង​នាំ​ចេញ​ភោគផល​ទៅ​ក្រៅ​ប្រទេស​ លោក​បញ្ជាក់​ថា៖ «ពោល​ផលិតផល​កសិដ្ឋាន​របស់​យើង​គឺ​ផែ្អក​លើ​គុណភាព និង​ការ​យក​ចិត្ត​ទុក​ដាក់​លើ​សុខភាព​អ្នក​ប្រើប្រាស់»៕

This content has been locked. You can no longer post any comments.
Show/hide comments
busy