Headlines:

គ្មាន​សុជីវ​ធម៌​ក្នុង​ពេល​បើក​បរ​បង្ក​ការ​រំខាន និង​គ្រោះ​ថ្នាក់​ចរាចរណ៍



121121_04

ប៉ប​ៗៗ!!​» វា​ជា​សំឡេង​ដ៏​ក្ដៅ​ស្លឹក​ត្រចៀក​និង​បុក​ពោះ​យ៉ាង​ខ្លាំង នៅ​ពេល​ដែល​ខ្ញុំ​កំពុង​តែ​ឈប់​ត្រង់​ភ្លើង​ស្ដុប​។ ខ្ញុំ​ពិត​ជា​មិន​អាច​ទប់​អារម្មណ៍​មិន​ជេរ​ប្រទេច​ចំពោះ​អ្នក​បើកបរ​រថយន្ដ​ទំនើប​មួយ​គ្រឿង​ដែល​ស៊ី​ផ្លេ​ទាំង​ទទឹង​ទិស​ខណៈ​អ្នក​ដំណើរ​ដទៃ​កំពុង​តែ​ឈប់​ភ្លើង​ស្ដុប​ក្រហម​» នេះ​ជា​បទ​ពិសោធ​ផ្ទាល់​របស់​កញ្ញា ថន លក្ខណា​អាយុ​២៥​ឆ្នាំ ជា​និស្សិត​ឆ្នាំ​ទី​៤​នៃ​វិទ្យា​ស្ថាន​ភាសា​បរទេស​។

ការ​ចុច​ស៊ី​ផ្លេ​ខុស​ទំនង​មិន​ត្រូវ​ស្ថានភាព​ចំពោះ​មុខ​ខ្វះ​សីលធម៌​របស់​អ្នក​បើកបរ​មួយ​ចំនួន និង​ការ​និយាយ​ទូរស័ព្ទ​ក្នុង​ពេល​បើក​បរ ពិត​ជា​ផ្ដល់​ការ​រំខាន និង​បង្ក​គ្រោះ​ថ្នាក់​ជា​យថា​ហេតុ​ដល់​អ្នក​បើក​បរ​ដទៃ​ផង​ដែរ​។

នៅ​ពេល​ដែល​អ្នក​ដំណើរ​ទូទៅ​កំពុង​តែ​បើក​បរ​លើ​ដង​ផ្លូវ​ប្រកប​ដោយ​ការ​គោរព​ច្បាប់​ចរាចរណ៍​យ៉ាង​ខ្ជាប់​ខ្ជួន ស្រាប់​តែ​រថយន្ដ ឬ​ម៉ូតូ​កំពុង​តែ​បោះ​ពួយ​យ៉ាង​លឿន​ពី​ក្រោយ រួច​ចុច​ស៊ី​ផ្លេ «​ប៉ប​ៗ!»​ជា​សញ្ញា​ឲ្យ​អ្នក​ដទៃ​ចៀស​ចេញ​ពី​ផ្លូវ​របស់​ខ្លួន​វា​អាច​ធ្វើ​ឲ្យ​អ្នក​ដែល​បើកបរ​គោរព​ច្បាប់​ភិត​ភ័យ​ខំ​ប្រវេ​ប្រវា​គេច​ចេញ​ពី​ផ្លូវ​ទាំង​ខ្លួន​កំពុង​បើក​បរ​យ៉ាង​ត្រឹម​ត្រូវ​។

ម្យ៉ាង​វិញ​ទៀត នៅ​ពេល​ដែល​ពួក​គេ​ខំ​ចៀស​ឲ្យ​រថយន្ដ​ដែល​ស៊ី​ផ្លេ​នោះ​ជែង​ទៅ​មុខ​ពួក​គេ​អាច​ជួប​នឹង​គ្រោះ​ថ្នាក់​ជា​យថា​ហេតុ​ប្រសិន​បើ​ពួក​គេ​គេច​មិន​ទាន់​ឬ​ក៏​ចៀស​ទៅ​ប៉ះ​ពារ​អ្នក​ដទៃ​។

ចំពោះ​ទង្វើ​ខ្វះ​សុជីវធម៌​ក្នុង​ការ​បើក​បរ​នេះ កញ្ញា ថន លក្ខណា បាន​ប្រាប់​ថា ម្ចាស់​រថយន្ដ​ដែល​ចុច​ស៊ី​ផ្លេ​ពី​ក្រោយ​ខ្លាំង​ៗ​ទាំង​ខ្លួន​កំពុង​ជិះ​ខុស​គំនូស ជា​មនុស្ស​ឈ្លើយ​និង​អសីលធម៌​បំផុត​។ អ្នក​បើក​រថយន្ដ ឬ​ម៉ូតូ​ទាំង​អស់ គួរ​តែ​ធ្វើ​ខ្លួន​ឲ្យ​ថ្លៃ​ថ្នូរ​ដើម្បី​ស័ក្ដិ​សម​នឹង​តម្លៃ​យាន​យន្ដ។

ក្នុង​ទឹក​មុខ​យ៉ាង​មុត​មាំ​កញ្ញា ឃិន​លីដា​អាយុ​២០​ឆ្នាំ​ជា​និស្សិត​ឆ្នាំ​ទី៤​នៃ​សាកល​វិទ្យាល័យ​វិទ្យា​សាស្ត្រ​សុខា​ភិបាល​បាន​ឲ្យ​ដឹង​ដែរ​ថា ការ​និយាយ​ទូរស័ព្ទ​ក្នុង​ពេល​បញ្ជា​ដៃ​ចង្កូត​ធ្វើ​ឲ្យ​ស្ទះ​ចរាចរណ៍​និង​អាច​ជួប​គ្រោះ​ថ្នាក់​ពី​ព្រោះ​ពួក​គេ​មិន​បាន​ផ្ដោត​អារម្មណ៍​លើ​ការ​បើកបរ​ដែល​ពេល​ខ្លះ​ភ្លេច​មើល​ភ្លើង​ស្ដុប​ឬ​វេ​ចុះ​វេ​ឡើង គ្មាន​លំនឹង​ដែល​ធ្វើ​ឲ្យ​អ្នក​បើក​បរ​ខាង​ក្រោយ​ខឹង​សម្បា​និង​កក​ស្ទះ ហើយ​មិន​អាច​ទៅ​មុខ​រួច​។

ឆ្លើយ​តប​នឹង​ការ​ត្អូញ​ត្អែរ​ខាង​លើ​យុវជន​រាង​សង្ហា​ជិះ​រថយន្ដ​ទំនើប​ឈ្មោះ បញ្ញា​បាន​ទទួល​ស្គាល់​ថា​ខ្លួន​ពិត​ជា​ធ្លាប់​និយាយ​ទូរស័ព្ទ​ក្នុង​ពេល​បើកបរ​និង​ចូល​ចិត្ដ​ចុច​ស៊ី​ផ្លេ​រំខាន​អ្នក​ដទៃ​ទាំង​ទទឹង​ទិស​ប្រាកដ​មែន​ប៉ុន្ដែ​លោក​ប្រាប់​ពី​មូល​ហេតុ​ថា លោក​គ្រាន់​តែ​ប្រញាប់​ដោយ​គ្រាន់​ស៊ី​ផ្លេ​ដាក់​ម៉ូតូ​ខ្លះ​ដែល​បើក​ឆ្វេ​ឆ្វាច​ឲ្យ​ប្រុង​ប្រយ័ត្ន​ប៉ុណ្ណោះ លោក​គ្មាន​បំណង​បង្ក​បញ្ហា​អ្វី​ឡើយ​។

បើ​យោង​តាម​លទ្ធផល​នៃ​ការ​ស្រាវជ្រាវ​របស់​អង្គការ​សុខ​ភាព​ពិភពលោក ដែល​បាន​ចេញ​កាល​ពី​ឆ្នាំ​២០១១​បាន​បញ្ជាក់​ថា​ការ​និយាយ​ទូរស័ព្ទ​ក្នុង​ពេល​កំពុង​បើកបរ​ជា​បញ្ហា​ធំ​មួយ​ដែល​អាច​បង្ក​ឲ្យ​មាន​គ្រោះ​ថា្នក់​ចរាចរណ៍​ខ្ពស់​ដូច​កត្តា​ប្រើ​ប្រាស់​គ្រឿង​ស្រវឹង​ពេល​បើកបរ​ដែរ​។ ដូច្នេះ​បណ្ដា​ប្រទេស​មួយ​ចំនួន​លើ​សកល​លោក​កំពុង​តែ​យក​ចិត្ត​ទុក​ដាក់​យ៉ាង​ខ្លាំង​ចំពោះ​បញ្ហា​នេះ​។

ការ​ស្រាវជ្រាវ​របស់​អង្គការ​សុខ​ភាព​ពិភព​លោក​ដដែល បាន​ឲ្យ​ដឹង​ថា​ការ​និយាយ​ទូរ​ស័ព្ទ​អាច​បណ្តាល​ឲ្យ​អ្នក​បើក​បរ​មាន​សកម្មភាព​អវិជ្ជមាន​ជា​ច្រើន​ដូចជា​ការ​បាត់បង់​ភាព​ម្ចាស់​ការ​លើ​ការ​បញ្ជា​យានយន្ត​បង្កើន​នូវ​ភាព​តាន​តឹង​ដល់​ខួរ​ក្បាល​សមត្ថភាព​នៃ​ការ​គ្រប់​គ្រប់​ហ្វ្រាំង​ធ្លាក់​ចុះ​ប៉ះ​ពាល់​ដល់​សមត្ថភាព​ចក្ខុ​វិញ្ញាណ​ក្នុង​ការ​តម្រង់​ទិស​យាន​យន្ត​បាត់​បង់​ភាព​រំញោច​ភ្លាមៗ​ក្នុង​ការ​ដោះ​ស្រាយ​ឬ​គេច​ពី​ឧបសគ្គ​ជា​ដើម​។

ចំពោះ​បញ្ហា​ចុច​ស៊ី​ផ្លេ​លោក ឈឿន​ជា​មន្ដ្រី​ប៉ូលិស​ចរាចរ បាន​បក​ស្រាយ​ថា​៖ «​តាម​ពិត​ការ​ស៊ីផ្លេ​ឮ​ខ្លាំង​គ្មាន​សណ្តាប់​ធ្នាប់​និង​ការ​និយាយ​ទូរស័ព្ទ​ក្នុង​ពេល​កំពុង​បើកបរ​មិន​ត្រឹម​តែ​ជា​អំពើ​អសីលធម៌​មួយ​ប៉ុណ្ណោះ​ទេ វា​ជា​អំពើ​ល្មើស​ច្បាប់​តែ​ម្តង ព្រោះ​ការ​ល្មើស​ទាំង​នេះ​សុទ្ធ​តែ​បាន​ចែង​ក្នុង​មាត្រា​នៃ​ច្បាប់​ចរាចរណ៍​ផ្លូវ​គោក​របស់​កម្ពុជា​តាំង​ពី​ប៉ុន្មាន​ឆ្នាំ​មុន​ម៉្លេះ​»។ លោក​បន្ថែម​ថា​ប៉ុន្តែ​ចំពោះ​ការ​ផាក​ពិន័យ​ចំពោះ​បញ្ហា​ទាំង​អស់​នេះ​នៅ​មិន​ទាន់​អនុម័ត​នៅ​ឡើយ​ទេ​ដោយ​សារ​តែ​ថ្នាក់​លើ​ចង់​ពង្រឹង​ច្បាប់​ថ្មី​ដូចជា​ការ​ពាក់​មួក​សុវត្ថិភាព​ដាក់​កញ្ចក់​និង​ដាក់​ខ្សែ​ក្រវាត់​សុវត្ថិភាព​ឲ្យ​បាន​ខ្ជាប់​ខ្ជួន​ជា​មុន​សិន​។

លោក​អ៊ា​ចរិយា​អ្នក​សម្រប​សម្រួល​ស្រាវជ្រាវ​និង​វាយ​តម្លៃ​កម្ម​វិធី​សុវត្ថិភាព​ចរាចរណ៍​នៃ​អង្គការ​Handicap ​បាន​ឲ្យ​ដឹង​ថា​លោក​លើក​ទឹក​ចិត្ត​ឲ្យ​រដ្ឋាភិបាល​ចាប់​ផ្តើម​រឹត​បន្តឹង​ចំពោះ​អ្នក​និយាយ​ទូរ​ស័ព្ទ​ក្នុង​ពេល​បើកបរ​និង​ការ​ប្រើ​ប្រាស់​ស៊ីផ្លេ​គ្មាន​សណ្តាប់​ធ្នាប់​ពី​ព្រោះ​បញ្ហា​ទាំង​ពីរ​នេះ​សុទ្ធ​តែ​អាច​បង្ក​ឲ្យ​មាន​កំណើន​គ្រោះ​ថា្នក់​ចរាចរណ៍​ដូច​បញ្ហា​ប្រើ​ប្រាស់​គ្រឿង​ស្រវឹង​និង​កត្តា​ធំៗ​ជា​ច្រើន​។

លោក​បាន​បញ្ជាក់​បន្ថែម​ថា​ពេល​ខ្លះ​យើង​គិត​ថា​អ្នក​បើកបរ​អាច​មាន​ជំនាញ​គ្រប់គ្រាន់​ប៉ុន្តែ​ការ​និយាយ​ទូរស័ព្ទ​នៅ​តែ​បង្ក​ជា​ហានិភ័យ​ធំ​មួយ​ដែល​ធ្វើ​ឲ្យ​ចរាចរណ៍​ស្រុក​ខ្មែរ​យើង​គ្មាន​សុវត្ថិភាព​។​ការ​ស៊ីផ្លេ​ក៏​មិន​ខុស​គ្នា​ដែរ​អ្នក​បើកបរ​រថយន្ត​ទាំង​ឡាយ​ជាពិសេស​អ្នក​បើកបរ​រថយន្ត​ធំៗ​ដែល​បំពាក់​ស៊ីផ្លេ​ខ្យល់​មិន​គួរ​ណា​ប្រើប្រាស់​ក្នុង​ទី​ប្រជុំ​ជន​ឡើយ​ពី​ព្រោះ​វា​អាច​ធ្វើ​មាន​សំឡេង​រំខាន​ខ្លាំង​និង​ពេល​ខ្លះ​អាច​ឲ្យ​អ្នក​ដំណើរ​ភ្ញាក់​ស្លុត​ស្មារតី​រេ​ចង្កូត​បង្ក​ឲ្យ​មាន​គ្រោះ​ថ្នាក់​ថែម​ទៀត​ផង​។

លោក​មុន្នី រ័ត្ន ជា​ប្រធាន​ក្រុម​យុវជន​ស្ម័គ្រ​ចិត្ត​កាក​បាទ​ក្រហម​ដែល​តែង​តែ​ចុះ​អប់រំ​ប្រជាពល​រដ្ឋ​តាម​ដង​ផ្លូវ​បាន​ឲ្យ​យោបល់​ថា​ការ​និយាយ​ទូរស័ព្ទ​ក្នុង​ពេល​បើកបរ​អាច​សម្រួល​ទៅ​បាន​បើ​សិន​ជា​អ្នក​បើកបរ​ប្រើប្រាស់​ឧបករណ៍​ជំនួយ​(កាស)​ឬ​ឈប់​អែប​ស្តាំ​ដើម្បី​និយាយ​ទើប​ជា​ការ​ប្រសើរ​។ ម្យ៉ាង​វិញ​ទៀត​អ្នក​បើកបរ​គួរ​តែ​កាត់​បន្ថយ​ការ​ស៊ីផ្លេ​ដោយ​ចិត្ត​អំណត់​ពីព្រោះ​សំឡេង​ស៊ីផ្លេ ប៉ះពាល់​ខ្លាំង​ដល់​អារម្មណ៍​អ្នក​ធ្វើ​ដំណើរ​លើ​ដង​ផ្លូវ​។

មិន​ថា​អ្នក​បើកបរ​រថយន្ត​ឬ​ម៉ូតូ​ការ​គោរព​ច្បាប់​ចរាចរណ៍​តែ​មួយ​មុខ នៅ​មិន​ទាន់​គ្រប់គ្រាន់​នៅ​ឡើយ​ទេ​យើង​ទាំងអស់​គ្នា​គួរ​តែ​បង្កើន​នូវ​ក្រម​សីលធម៌​ចរាចរណ៍​ក្នុង​ខ្លួន​ឲ្យ​បាន​ច្រើន​ទើប​ការ​ធ្វើ​ចរាចរណ៍​ប្រព្រឹត្ត​ទៅ​យ៉ាង​ល្អ​ដោយ​អាច​កាត់​បន្ថយ​នូវ​គ្រោះ​ថា្នក់​ចរាចរណ៍​។​ត្រូវ​ចង​ចាំ​ថា​ការ​យោគ យល់​គ្នា​ជា​អំពើ​ដ៏​ប្រសើរ​សម្រាប់​អ្នក​បើកបរ​។ ម្យ៉ាង​វិញ​ទៀត​ការ​គោរព​អាយុ​ជីវិត​អ្នក​ដទៃ ក៏​មិន​ខុស​ពី​ការ​គោរព​អាយុ​ជីវិត​ខ្លួន​ឯង​ផង​ដែរ​៕​​ ​