Headlines:

ទ្រីយ៉ាត្លុងនាំ​បទ​ពិសោធ​ថ្មី​សម្រាប់​​ពលរដ្ឋ​កម្ពុជា



121107_11

ខណៈ​ពេល​ដែល​វិស័យ​កីឡា​នៅ​កម្ពុជា​កំពុង​តែ​មាន​សន្ទុះ​រីក​ចម្រើន​មាន​កីឡា ប្រភេទ​ថ្មី​មួយ​ទៀត​ដែល​មក​ដល់​កម្ពុជា​មាន​ឈ្មោះ​ថា ទ្រី​យ៉ា​ត្លុង​។

ទ្រី​យ៉ា​ត្លុង​គឺជា​ប្រភេទ​កីឡា​ដ៏​វិសេស​និង​គួរ​ឲ្យ​ចាប់​អារម្មណ៍​ដែល​វា​តម្រូវ​ឲ្យ​កីឡា​ករ​ទាំង​អស់​ប្រកួត​ឆ្លង​កាត់​ពី​២​ទៅ​៣​វិញ្ញាសា​បន្ដ​បន្ទាប់​គ្នា​ក្នុង​ពេល​តែ​មួយ​ដោយ​ផ្ដើម​ពី​ការ​រត់ ជិះ​កង់ និង​ហែល​ទឹក​ជាដើម​។ ទ្រី​យ៉ា​ត្លុង​បែង​ចែក​ជា​ប្រភេទ​តូច​ៗ ដូចជា ឌូយ៉ាត្លុង (Douathlon) និង​អាខ្វា​ត្លុង (Aquathlon) ដែល​មាន​ការ​ប្រកួត​៣​វិញ្ញាសា​។ រត់​ជិះ​កង់ និង​ហែល​ទឹក​យើង​ហៅថា​កីឡា​ទ្រីយ៉ាត្លុង​ប៉ុន្ដែ​បើ​ការ​ប្រកួត​មាន​តែ​រត់​និង​ជិះ​កង់ យើង​ហៅ​ថា​កីឡា​ឌូអាត្លុង​។ រីក​ឯ​ការ​ប្រកួត​ដែល​បូក​បញ្ចូល​ទាំង​ការ​ហែល​ទឹក​និង​រត់​វិញ​យើង​ហៅ​ថា កីឡា​អាខ្វា​ត្លុង​។​នេះ​យោង​តាម​សម្ដី​របស់​លោក​ងិន សុបញ្ញា ជា​អគ្គ​លេខា​ធិការ​សហព័ន្ធ​កីឡា​ទ្រី​យ៉ា​ត្លុង​។

លោក សុបញ្ញា បាន​ឲ្យ​ដឹង​ថា មូល​ហេតុ​ដែល​បង្កើត​សហព័ន្ធ​នេះ​ឡើង​ដើម្បី​ផ្សព្វ​ផ្សាយ​ដល់​ប្រជា​ពលរដ្ឋ​ខ្មែរ​ឲ្យ​ស្គាល់​អំពី​កីឡា​ទ្រីយ៉ាត្លុង​ដ៏​ថ្មី​នេះ​ដែល​សម្ព័ន្ធ​កីឡា​អូឡាំ​ពិក​កំពុង​តែ​ទទួល​បាន​ការ​គាំ​ទ្រ​ខ្លាំង​នៅ​ទូទាំង​ពិភព​លោក​។

រហូត​ដល់​បច្ចុប្បន្ន​នេះ កីឡា​ទ្រី​យ៉ា​ត្លុង​ត្រូវ​បាន​រៀប​ចំ​ប្រកួត​លើ​ទឹក​ដី​កម្ពុជា​៣​ដង​រួច​មក​ហើយ​ដែល​ចាប់​ផ្ដើម​ពី​ការ​ប្រកួត​ប្រភេទ​អាខ្វាត្លុង​ខ្នាត​មធ្យម​នៅ​ពហុ​កីឡដ្ឋាន​ជាតិ​អូឡាំពិក​។ ប៉ុន្ដែ​អ្វី​ដែល​គួរ​ឲ្យ​ចាប់​អារម្មណ៍​នោះ​គឺជា​ការ​ប្រកួត​កីឡា​ឌូអាត្លុង​នៅ​ថ្ងៃទី​១៥ ខែ​កក្កដា​កន្លង​ទៅ​នៅ​ទីលាន​សាធារណៈ​កោះ​ពេជ្រ​រាជ​ធានី​ភ្នំពេញ​ដែល​មាន​ការ​ចូល​រួម​ពី​សំណាក់​យុវជន​ប្រជា​ពលរដ្ឋ​ទូទៅ និង​កីឡា​ករ​អាជីព​ប្រមាណ​ជាង​៤០០​នាក់​។

ចំពោះ​ការ​គាំទ្រ​កីឡា​ទ្រីយ៉ាត្លុង​នេះ​លោក​ណារិន​ជា​បុគ្គលិក​អង្គការ​សហ​ប្រជាជាតិ​ទទួល​បន្ទុក​ផ្នែក​គ្រឿង​ញៀន និង​បទ​ល្មើស​ដែល​ធ្លាប់​បាន​ចូល​រួម​ការ​ប្រកួត​នេះ​បាន​ឲ្យ​ដឹង​ថា​៖ «​ខ្ញុំ​ចាប់​អារម្មណ៍​និង​ស្រឡាញ់​យ៉ាង​ពេញ​ទំហឹង​ចំពោះ​កីឡា​ប្រភេទ​រត់​ផង​ជិះ​ផង​បែប​នេះ ពីព្រោះ​វា​ជា​កីឡា​ថ្មី​សម្រាប់​កម្ពុជា ជា​ពិសេស​ខ្ញុំ​ត្រូវ​ឆ្លង​កាត់​ដំណាក់​ជា​ច្រើន​ដូច​ជា​រត់​និង​ជិះ​កង់​ដែល​វា​ជា​ចំណូល​ចិត្ដ​របស់​ខ្ញុំ​តែ​ម្ដង​»។

លោក​ណារិន មិន​មែន​ជា​កីឡាករ​អាជីព​ទេ​លោក​គ្រាន់​តែ​ចូល​រួម​ប្រកួត​កម្សាន្ដ​ប៉ុណ្ណោះ​ប៉ុន្ដែ​លោក​នៅ​តែ​ខិត​ខំ​ប្រឹង​ប្រែង​រហូត​ដល់​គោល​ដៅ​។

យោង​តាម​គម្រោង​របស់​សហព័ន្ធ​កីឡា​ទ្រីយ៉ាត្លុង​កម្ពុជា ការ​ប្រកួត​នឹង​ត្រូវ​ប្រព្រឹត្ដ​ទៅ​៥​ដង​ក្នុង​មួយ​ឆ្នាំ​នៅ​តាម​បណ្ដា​ខេត្ដ​នានា​រួម​មាន​អាខ្វា​ត្លុង​២​ដង ឌូអាត្លុង​២​ដង និង​ទ្រី​យ៉ាត្លុង​១​ដង​។ ដោយ​ឡែក​កីឡា​ទ្រី​យ៉ា​ត្លុង​ឆ្នាំ​២០១២​នេះ​អាច​ប្រព្រឹត្ដ​ទៅ​តែ​៣ដង​ប៉ុណ្ណោះ​ហើយ​គម្រោង​នៃ​ការ​ប្រកួត​ផ្សេង​ទៀត​ត្រូវ​បាន​លុប​ចោល​ដោយ​សារ​តែ​ប្រជាពល​រដ្ឋ​ទូទាំង​ប្រទេស​កំពុង​តែ​ចូល​រួម​កាន់​ព្រះ​រាជ​មរណ​ទុក្ខ​យ៉ាង​ក្រៀម​ក្រំ​នៃ​ការ​សោយ​ទិវង្គត​របស់​ព្រះ​មហា​វិរក្សត្រ​។

យ៉ាង​ណាមិញ កីឡា​ទ្រី​យ៉ាត្លុង​នេះ​នឹង​ចាប់​ដំណើរ​ការ​ជា​ម្ដង​ទៀត​នៅ​ក្នុង​ខែ​កុម្ភៈ​ឆ្នាំ​ក្រោយ​ដោយ​បើក​ទទួល​ការ​ចុះ​ឈ្មោះ​ចំពោះ​សិស្ស​និស្សិត​ដោយ​ឥត​គិត​ថ្លៃ រី​ឯ​ប្រជាពលរដ្ឋ​ទូទៅ​វិញ គ្រាន់​តែ​ចំណាយ​ប្រាក់​១ម៉ឺន​រៀល លោក​អ្នក​នឹង​ទទួល​បាន​នូវ​បទ​ពិសោធ​ថ្មី​ចំពោះ​កីឡា​ឆ្លង​កាត់​ច្រើន​ដំណាក់​កាល​នេះ​។ សម្រាប់​ព័ត៌មាន​បន្ថែម សូម​ចូល​ទៅ​កាន់​គេហទំព័រ​សហព័ន្ធ​តាម​អាសយដ្ឋាន www.cambodiatriathlon.org៕​