សួស្តីឆ្នាំថ្មី! កាសែត​ភ្នំពេញ ប៉ុស្តិ៍ សូម​ជម្រាប​ជូន​ដំណឹង​ដល់​ប្រិយ​មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំង​អស់​ឲ្យ​បាន​ជ្រាប​ថា ដើម្បី​ចូល​រួម​អបអរ​ពិធី​បុណ្យ​ចូល​ឆ្នាំ​ខ្មែរ ប្រពៃណី​ជាតិ​ខាង​មុខ​នេះ ​ភ្នំពេញ ប៉ុស្តិ៍ នឹង​ផ្អាក​ចេញ​ផ្សាយ​ពី​ថ្ងៃទី​១៤ ១៥ ១៦ និង​១៧ មេសា ​២០១៤ ហើយ​នឹង​ចាប់​ផ្តើម​ចេញ​ផ្សាយ​ជា​ធម្មតា​ឡើង​វិញ​នៅ​ថ្ងៃ​ទី ១៨ មេសា ឆ្នាំ​២០១៤។ ភ្នំពេញ ប៉ុស្តិ៍ ​សូម​ជូន​ពរ មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំងអស់ ជួប​តែ​សេចក្តី​សុខ សុភមង្គល​គ្រប់​ៗ​គ្នា និង​គ្រប់​ពេល​វេលា នាឆ្នាំថ្មី​​នេះ។
Headlines:

តើ​អ្នក​យល់​យ៉ាង​ដូចម្តេច​ចំពោះ​យាន​យន្ដ​មាន​ការ​ធានា​រ៉ាប់រង?



121121_09a

កញ្ញា សាយ ឡាលីន អាយុ​២១​ឆ្នាំ ជា​និស្សិត​សាកល​វិទ្យាល័យ​ភូមិន្ទ​ភ្នំពេញ

«ខ្ញុំ​គិត​ថា រថយន្ត​ដែល​មាន​ឬ​គ្មាន​ការ​ធានា​រ៉ាប់រង​មិន​សំខាន់​នោះ​ទេ​វា​អាស្រ័យ​ទៅ​លើ​បុគ្គល​ជា​អ្នក​បញ្ជា​ចង្កូត​ផ្ទាល់​ប៉ុណ្ណោះ។ ប្រសិន​បើ​ពួក​គាត់​គ្មាន​ការ​ប្រុង​ប្រយ័ត្ន​អំឡុង​ពេល​បើកបរ ពួក​គាត់​អាច​ជួប​គ្រោះ​ថ្នាក់​ដូច​គ្នា​។ ម្យ៉ាង​ទៀត​ក្រុម​ហ៊ុន​ធានា​រ៉ាប់រង​ក៏​អាច​នឹង​មិន​ធានា​នឹង​ចេញ​សង​នោះ​ដែរ ករណី​ដែល​បុគ្គល​បើក​បរ​នោះ​បើកបរ​មិន​ប្រុង​ប្រយ័ត្ន​ដោយ​ខ្លួន​ឯង ហើយ​មិន​គោរព​តាម​លក្ខ​ខណ្ឌ​ដែល​ពួក​គេ​បាន​សន្យា​ជាមួយ​នឹង​ក្រុមហ៊ុន​នោះ»៕ ​

121121_09b

លោក នួម វណ្ណាត អាយុ​២២​ឆ្នាំ ជា​និស្សិត​សាកល​វិទ្យាល័យ​ភូមិន្ទ​កសិកម្ម

«រថយន្ត​មាន​ការ​ធានា​រ៉ាប់​រង​មិន​ប្រាកដ​ថា​គ្មាន​គ្រោះ​ថ្នាក់​នោះ​ទេ​វា​អាស្រ័យ​លើ​ម្ចាស់​ថា​តើ​ពួក​គាត់​មាន​ទំនុក​ចិត្ត​ក្នុង​ការ​បើកបរ​ប៉ុនណា ប៉ុន្តែ​ការ​កំណត់​ពី​បញ្ហា​គ្រោះ ថ្នាក់​ចរាចរណ៍​មិន​ស្ថិត​លើ​បុគ្គល ណា​មួយ​ឡើយ​។​អ្នក​ខ្លះ​ទិញ​ធានា​រ៉ាប់រង​ប៉ុន្ដែ​បែរ​ជា​ធ្វេស​ប្រហែស​ក្នុង​ការ​បើកបរ​ដោយ​មិន​ប្រុង​ប្រយ័ត្ន​វា​អាច​ធ្វើ​ឲ្យ​ពួក​គាត់​ជួប​នឹង​គ្រោះ​ថ្នាក់​ចរាចរណ៍​ផង​ដែរ​»៕​

121121_09c

លោក ហេង ហាំង​តុង អាយុ​១៩​ឆ្នាំ ជា​និស្សិត​សាកល​វិទ្យាល័យ​អន្តរជាតិ

«សព្វ​ថ្ងៃ​នេះ​ស្ថានភាព​ចរាចរណ៍​នៅ​ប្រទេស​យើង​កាន់​តែ​មាន​សភាព​អាក្រក់​ទៅ​ៗ​ដែល​អ្នក​បើកបរ​ជា​ច្រើន​បញ្ជា​យាន​ជំនិះ​មិន​គោរព​ច្បាប់​ចរាចរណ៍ ឬ​ប្រុង​ប្រយ័ត្ន​ទេ។​ជួន​កាល​យើង​បើក​ប្រុង​ប្រយ័ត្ន​ហើយ​ប៉ុន្តែ​អ្នក​បើកបរ​ផ្សេង​ទៀត​មិន​ប្រយ័ត្ន​មក​ប៉ះពារ​យើង​រួច​គេច​បាត់​ក៏​មាន​ដែរ។​ដូច្នេះ​ការ​ទិញ​ធានា​រ៉ាប់រង​អាច​ជួយ​បង្កើន​ទំនុក​ចិត្ត​ដល់​យើង​ក្នុង​ពេល​បើកបរ ហើយ​យើង​ក៏​មិន​សូវ​ព្រួយ​បារម្ភ​ពី​ការ​ខូច​ខាត​វា​នោះ​ដែរ»៕

121121_09d

លោក គា វណ្ណច័ន្ទរ៉ាយ៉ា អាយុ​២២​ឆ្នាំ ជា​និស្សិត​សាកល​វិទ្យាល័យ​បៀល​ប្រាយ

«ខ្ញុំ​គិត​ថា​យាន​យន្ត​មាន​ធានា​រ៉ាប់រង​ពិត​ជា​ល្អ និង​មាន​ប្រយោជន៍​ខ្លាំង​ណាស់​សម្រាប់​អ្នក​បើកបរ ពី​ព្រោះ​ប្រសិន​បើ​ជួប​ឧប្បត្តិហេតុ​ដោយ​ចៃ​ដន្យ​ណា​មួយ​ក្រុម​ហ៊ុន​អាច​ជួយ​សម្រួល​កិច្ច​ការ​របស់​ម្ចាស់​យាន​យន្ដ​។​ប៉ុន្តែ ប្រសិន​បើ​ពួក​គេ​មិន​ប្រុង​ប្រយ័ត្ន​ឬ​មិន​គោរព​ច្បាប់​ចរាចរណ៍​ទេ ពួកគេ​នៅ​តែ​ប្រឈម​នឹង​ផ្លូវ​ច្បាប់​។ ថ្វី​ដ្បិត​តែ​ពួកគេ​បាន​ទិញ​ធានា​រ៉ាប់​រង​ក៏​ដោយ​ក៏​អ្នក​បើក​បរ​គ្រប់​រូប​ត្រូវ​តែ​គោរព​ច្បាប់​និង​មាន​ស្មារតី​ខ្ពស់​ចំពោះ​ការ​បញ្ជា​ចង្កូត​យាន​យន្ដ​ដែរ»៕

121121_09e

កញ្ញា រដ្ឋា ពុទ្ធិកា អាយុ​១៨​ឆ្នាំ ជា​និស្សិត​សាកល​វិទ្យាល័យ​ហ្សាម៉ាន់

«ខ្ញុំ​គិត​ថា​ការ​ទិញ​ធានា​រ៉ាប់រង​ចំពោះ​យាន​យន្ត​ពិត​ជា​មាន​ប្រយោជន៍​ច្រើន​ណាស់​។ វា​ហាក់​បី​ដូច​ជា​ការ​សន្សំ​ប្រាក់​ទុក​សម្រាប់​នៅ​ពេល​ដែល​មាន​បញ្ហា​ណា​មួយ​កើត​ឡើង​ដែរ ព្រោះ​យើង​មិន​អាច​មើល​ឃើញ ឬ​ចង់​ជួប​គ្រោះ​ថ្នាក់​ឡើយ​។​បើ​ជួប​គ្រោះ​ថ្នាក់​ចរាចរណ៍​ដោយ​ចៃ​ដន្យ​យើង​ប្រាកដ​ជា​ឆ្លេឆ្លា មិន​ដឹង​ត្រូវ​ធ្វើ​យ៉ាង​ណា​ទេ ណា​មួយ​មាន​របួស ណា​មួយ​ឡាន ឬ​ម៉ូតូ​ខូច​ខាត​ទៀត​។ ដូច្នេះ​ក្រុមហ៊ុន​ធានា​រ៉ាប​រង អាច​នឹង​ជួយ​សម្រួល​ដល់​បញ្ហា​ទាំង​នេះ​»៕