Headlines:

លោកតេង សុភ័គ​ប្រាប់បទ​ពិសោធនក្នុង​អចលន​ទ្រព្យ



121114_08b

លោក​តេង​សុភ័គ

ប្រសិន​បើ​និយាយ​អំពី​វិស័យ​អចលន​ទ្រព្យ​ហើយ​ត្រូវ​នឹក​ដល់​វិស័យ​សំណង់​ឬ​ការ​សាង​សង់​និង​វិស័យ​វិនិយោគ​ឬ​សេវាកម្ម​។ នេះ​ជា​សម្ដី​របស់​លោក​តេង​សុភ័គ​ដែល​មាន​បទ​ពិសោធ​ក្នុង​វិស័យ​នេះ​ជា​ច្រើន​ឆ្នាំ​។

លោក​តេង​សុភ័គ​វ័យ​២៧​ឆ្នាំ​ជា​កូន​គ្រូ​បង្រៀន​នៅ​ខេត្ដ​កណ្ដាល​បាន​ក្លាយ​ជា​ម្ចាស់​ភាគ​ហ៊ុន​នៃ​ក្រុមហ៊ុន​អចលនទ្រព្យ​Agent-I Real Estate ដែល​លោក និង​ដៃ​គូ​បាន​ខិត​ខំ​ប្រឹង​ប្រែង​បើក​ក្រុម​ហ៊ុន​នេះ​ឡើង​ក្នុង​គោល​បំណង​រក​ប្រាក់​ចំណូល​ផង និង​ជួយ​ដល់​យុវជន​ផង​។

ក្រោយ​ពី​បញ្ចប់​មធ្យម​សិក្សា​ទុតិយ​ភូមិ​ក្នុង​ឆ្នាំ​២០០២​និង​បន្ដ​ការ​សិក្សា​ភាសា​អង់គ្លេស​នៅ​សាកល​វិទ្យាល័យ​ភ្នំពេញ​អន្តរជាតិ​និង​ផ្នែក​ព័ត៌មាន​វិទ្យា​នៅ​សាកល​វិទ្យាល័យ​ភូមិន្ទ​ភ្នំពេញ​យុវជន​រូប​នេះ មាន​តែ​កង់​កញ្ចាស់​មួយ​សម្រាប់​ជិះ​ទៅ​សាលា​រៀន​និង​កន្លែង​ធ្វើ​ការ​ប៉ុណ្ណោះ​។ ដើម្បី​រត់​ឲ្យ​ទាន់​ជាមួយ​នឹង​ចំណេះ​ដឹង​របស់​និស្សិត​ដទៃ លោក​ជួប​ការ​លំបាក​យ៉ាង ខ្លាំង​ជា​ពិសេស​គឺ​ភាសា​អង់គ្លេស​។

អំឡុង​ពេល​សិក្សា​ឆ្នាំ​ទី​១​លោក សុភ័គ បាន​បំពេញ​ការងារ​ស្ម័គ្រ​ចិត្ដ​ឲ្យ​កាក​បាទ​ក្រហម​កម្ពុជា​ហើយ​ត្រូវ​បាន​ជ្រើស​រើស​ជា​តំណាង​យុវជន​ខ្មែរ​សម្រាប់​ការ​ចូល​រួម​ក្នុង​កម្ម​វិធី​របស់​យុវជន​នៅ​ប្រទេស​ម៉ាឡេស៊ី​។ ជាមួយ​នឹង​ភាព​ប៉ិន​ប្រសប់​ក្នុង​ការងារ លោក​ក៏​ត្រូវ​បាន​បញ្ចូន​ឲ្យ​ទៅ​ប្រទេស​ជប៉ុន​បន្ដ​ទៀត​ដើម្បី​ធ្វើ​ការ​ផ្លាស់​ប្ដូរ​ចំណេះ​ដឹង​រយៈ​ពេល​៣​ខែ​។ ក្រោយ​មក យុវជន​មក​ពី​ខេត្ដ​កណ្ដាល​រូប​នេះ ត្រូវ​បាន​ទទួល​ស្គាល់​ជា​បុគ្គលិក​ផ្នែក​គម្រោង​ពេញ​សិទ្ធិ​នៅ​កាក​បាទ​ក្រហម​កម្ពុជា​តែ​ម្ដង​ហើយ​បន្ដ​ហ្វឹក​ហាត់​និង​បំពេញ​ការងារ​នៅ​បណ្ដា​ប្រទេស​ជា​ច្រើន​ទៀត​រួម​ទាំង​កូរ៉េ អូស្ដ្រាលី សិង្ហ​បុរី ជា​ដើម​។

នៅ​ឆ្នាំ​២០០៧ លោក​បាន​សម្រេច​ចិត្ដ​បន្ដ​ការ​សិក្សា​ថ្នាក់​អនុ​បណ្ឌិត​ផ្នែក​អភិវឌ្ឍ​ជនបទ និង​គ្រប់​គ្រង​គម្រោង​នៅ​សាកល​វិទ្យាល័យ​បៀលប្រាយ​ថ្វី​ដ្បិត​តែ​វា​ខុស​ពី​ជំនាញ​សិក្សា​នៅ​ថ្នាក់​បរិញ្ញាបត្រ​ក៏​ដោយ​។​លោក​លើក​ឡើង​ពី​មូល​ហេតុ​ថា៖ «​វា​ជួយ​ឲ្យ​ខ្ញុំ​យល់​ដឹង​កាន់​តែ​ខ្លាំង​ពី​ស្ថានភាព​សង្គម​ក្រោយ​ពី​បាន​ប្រឡូក​ការងារ​ក្នុង​វិស័យ​អភិវឌ្ឍន៍​នេះ​»។

ដោយ​សា​រតែ​មើល​ឃើញ​នូវ​ការ​រីក​ចម្រើន​នៃ​សេដ្ឋកិច្ច​ជាតិ​រហូត​មក​ដល់​ឆ្នាំ​២០០៩​លោក​បាន​ផ្អាក​ធ្វើ​គម្រោង​នៅ​កាកបាទ​ក្រហម​កម្ពុជា​និង​ចាប់​ផ្ដើម​ការងារ​ថ្មី​ជា​អ្នក​គ្រប់​គ្រង​ផ្នែក​លក់​នៅ​ក្រុមហ៊ុន​អចលនទ្រព្យ​មួយ​។ រយៈ​ពេល​មួយ​ឆ្នាំ​ខណៈ​ពេល​ដែល​ការងារ​ថ្មី​ទទួល​បាន​ជោគ​ជ័យ​លោក​មក​បន្ដ​គម្រោង​ថ្មី​ៗ​ទៀត​នៅ​កាក​បាទ​ក្រហម​កម្ពុជា​ដូច​ធម្មតា​វិញ​។

ដោយ​សារ​តែ​លោក​ជា​យុវជន​មក​ពី​ខេត្ដ​និង​យល់​ច្បាស់​អំពី​ការ​លំបាក​របស់​យុវជន​ដទៃ​លោក តេង សុភ័គ​បាន​ជួយ​ពួកគេ​ឲ្យ​មាន​ការ​ស្នាក់​នៅ​សមរម្យ និង​ផ្ដល់​ជូន​នូវ​តម្លៃ​ទាប តាម​រយៈ​សេ​វា​កម្ម​នៅ​ក្រុម​ហ៊ុន​របស់​លោក​។

លោក សុភ័គ បាន​ប្រាប់​ពី​បទ​ពិសោធ​ការងារ​ថា៖ «​ធ្វើ​ការងារ​ក្នុង​វិស័យ​អចលនទ្រព្យ​ត្រូវ​តែ​ប្រុង​ប្រយ័ត្ន​ខ្ពស់​និង​តាម​ដាន​ស្ថានភាព​សេដ្ឋកិច្ច​គ្រប់​ពេល​វេលា​ពីព្រោះ​វា​អាច​ប្រែ​ប្រួល​ដែល​យើង​មិន​អាច​ដឹង​មុន។​ម្យ៉ាង​វិញ​ទៀត​ត្រូវ​មាន​ការ​រៀប​ចំ​និង​តៀម​ខ្លួន​ជា​ស្រេច​ក្នុង​ការ​ប្រឈម​ជាមួយ​នឹង​ហានិភ័យ​ដែល​នឹង​កើត​ឡើង​គ្រប់​ពេល​ទាំងអស់​»។

លោក​បន្ដ​ថា​៖ «ខ្ញុំ​ជឿ​ថា​រាល់​ការងារ​ទាំង​អស់​ពិត​ជា​ពិបាក​និង​មាន​បញ្ហា​ប្រឈម​ជានិច្ច​ប៉ុន្តែ​គ្មាន​អ្វី​ដែល​ឈ្នះ​ការ​តស៊ូ​ព្យាយាម​និង​ភាព​ស្មោះ​ត្រង់​នោះ​ទេ​»។

នៅ​ទី​បំផុត​ក្នុង​ឆ្នាំ​២០១២​នេះ ក្រុម​ហ៊ុន​ដែល​កើត​ចេញ​ពី​ការ​ខិត​ខំ​របស់​លោក ត្រូវ​បាន​បើក​ដំណើរ​ការ ក្រោយ​ពី​ឆ្លង​កាត់​ការ​រៀប​ចំ​គម្រោង​រយៈ​ពេល​២​ឆ្នាំ និង​សិក្សា​អំពី​ស្ថាន​ភាព​សេដ្ឋកិច្ច​រួច​រាល់​។

ដោយ​សារ​មាន​បទ​ពិសោធ​ជា​ច្រើន​ឆ្នាំ​ជាមួយ​នឹង​វិស័យ​អចលនទ្រព្យ​គាត់​និង​ដៃ​គូ​ដែល​បាន​សហការ​ជាមួយ​គ្នា​អស់​ជា​ច្រើន​ឆ្នាំ​ហើយ​នោះ​មាន​គម្រោង​បើក​ជា​ជំនួញ​ផ្ទាល់​ខ្លួន មួយ​ដែល​បើក​ជា​ក្រុមហ៊ុន​អចលន​ទ្រព្យ​។

អ្វី​ដែល​ជា​លក្ខណ​ពិសេស​របស់​ក្រុមហ៊ុន​នេះ​គឺ​ផ្តោត​ទៅ​លើ​យុវជន​និង​ផ្ដល់​សេវាកម្ម​ជូន​គ្រប់​អតិថិជន​ទាំងអស់​មិនថា​ជា​និស្សិត​ឬ​ម្ចាស់​ក្រុមហ៊ុន​ណា​មួយ​នោះ​ទេ​។

ចំពោះ​គោល​បំណង​ទៅ​ថ្ងៃ​អនាគត​វិញ​ប្រសិន​បើ​ឱកាស​ហុច​ឲ្យ​លោក​នឹង​អាច​បើក​ជា​និវាសនដ្ឋាន​សម្រាប់​យុវជន​ក្រីក្រ​និង​បើក​ជា​មជ្ឈ​មណ្ឌល​បណ្តុះ​បណ្តាល​លើ​វិស័យ​អចលន​ទ្រព្យ​នេះ​ឲ្យ​បាន​ទូលំ​ទូលាយ​។

យុវជន សុភ័គ​បាន​ផ្ដែ​ផ្ដាំ​ថា​៖ «បើ​និយាយ​ពី​ភាព​ជោគជ័យ​គឺ​គ្មាន​នរណា​ម្នាក់​ដែល​និយាយ​ថា​ខ្លួន​ឯង​ជោគជ័យ​នោះ​ទេ​ព្រោះ​កាល​ណា​មាន​ការ​ជោគជ័យ​ក៏​មាន​ការ​បរាជ័យ​នៅ​ក្នុង​នោះ​ដែរ​ហើយ​នៅ​ពេល​ដែល​បាន​មួយ​ហើយ​គឺ​តែង​តែ​ចង់​បាន​មួយ​ទៀត។​ដូចនេះ​ការ​ជោគ​ជ័យ​គឺ​វា​ដើរ​ទៅ​មុខ​រហូត​ហើយ​កើត​ក្នុង​ពេល​អនាគត​រហូត​ដែរ​»។

យុវជន សុភ័គ​បាន​លើក​ឡើង​ថា​៖ «ខ្ញុំ​ក៏​អ៊ីចឹង​ដែរ​ដើរ​មក​ដល់​ត្រឹម​នេះ​ខ្ញុំ​មិន​ទាន់​អាច​សម្រេច​ថា​ខ្ញុំ​ដើរ​មក​ដល់​ចំណុច​ជោគជ័យ​នោះ​ទេ​ខ្ញុំ​នៅ​មាន​គម្រោង​ជា​ច្រើន​ទៀត​ដែល​ត្រូវ​ធ្វើ​ក្នុង​ពេល​អនាគត​របស់​ខ្ញុំ»​៕