Headlines:

ល្បែង​តែង​តែ​វិនាស សូម​កុំ​យក​តម្រាប់​តាម



121107_10b

រំឭក​ដល់​សម័យ​កាល​នៃ​ការ​ភ្នាល់​ល្បែង ដូច​ជា ភ្នាល់​បាល់ ឆ្នោត (ចាក់​កន្ទុយ​លេខ) ​យើង​សង្កេត​ឃើញ​ថា​ក្មេង​ចាស់ ប្រុស​ស្រី​មួយ​ចំនួន​ដែល​ងប់​នឹង​ល្បែង តែង​តែ​ប្រព្រឹត្ត​ជា​ប្រចាំ​ថែម​ហើយ​រហូត​ដល់​ហិន​ហោច​ទ្រព្យ​សម្បត្តិ​អស់​គ្មាន​សល់​ពី​ខ្លួន​។

ជាក់​ស្តែង​ដូច​ជា មាន​ប្តី​ប្រពន្ធ​មួយ​គូ ដែល​ខ្ញុំ​បាន​ឃើញ​ផ្ទាល់​ភ្នែក​ពួក​គាត់​មាន​ជំនាញ​ខុស​គ្នា ប្តី​ខ្លាំង​ខាង​បាល់ រីឯ​ប្រពន្ធ​វិញ​ខ្លាំង​ខាង​ឆ្នោត ហើយ​ពួក​គាត់​គឺ​ជា​ប្តី​ប្រពន្ធ​គំរូ​ប្រចាំ​តំបន់​ផ្សារ​សេរី​ភាព​។

ប្តី​នោះ​ឈ្មោះ ត.ប ព្រលឹម​ឡើង​អង្គុយ​សំកុក អត់​ប្រឹង​ធ្វើ​ការ ច្បាម​យក​តែ​បុង​បាល់ មក​អង្គុយ​ម៉ិៈ​សម្លឹង​ចុះ​សម្លឹង​ឡើង គូស​នេះ​បន្តិច គូស​នោះ​បន្តិច សម្រេច​ចិត្ត​មិន​ត្រូវ ថា​ភ្នាល់​ក្រុម​មួយ​ណា។ មិន​ត្រឹម​តែ​ប៉ុណ្ណឹង​ទេ កុំ​ឲ្យ​តែ​ឃើញ​អ្នក​ស្គាល់​ដើរ​កាត់ ស្កាត់​ទៅ​ទាញ​ដៃ​អ្នក​នោះ ហៅ​មក​សួរ​ថា​យក​អាមួយ​ណា​ល្អ សុំ​ជា​យោបល់​មិន​ឈប់។ មិន​អស់​ចិត្ត ខំ​ប្រឹង​ទៅ​អង្គុយ​ចាំ​នៅ​ឯ​កន្លែង​កត់​បាល់​ទៀត បើ​មិន​បាន​ចាក់​គឺ​មិន​អស់​ចិត្ត។

បើ​ក្រឡេក​មក​មើល​ខាង​ប្រពន្ធ​វិញ​ម្តង ចេញ​ពី​ផ្ទះ​កាល​ណា ជុំ​គ្នា​ជា​មួយ​អ្នក​ជិត​ខាង សួរ​ថា៖ «យប់​មិញ​យល់​សប្តិ​ឃើញ​អ្វី»? ឲ្យ​តែ​ឮ​ថា​អ្នក​ណា​យល់​សប្តិ ខំ​ប្រឹង​យក​មក​អង្គុយ​កាត់​ចេញ​ជា​លេខ​នឹង​អាល​យក​ទៅ​ចាក់​ឆ្នោត​។ ចាក់​ព្រឹក​មិន​ត្រូវ ចាក់​ពេល​ល្ងាច​ទៀត ល្ងាច​មិន​ចេញ ចាក់​ពេល​យប់​ទៀត។ មួយ​ថ្ងៃ​ចាក់​៣​ដង​ជា​ប្រចាំ​មិន​ដែល​ខក​ខាន។

អ្នក​ណា​មិន​ល្បី ប្តី​ប្រពន្ធ​អ្នក​មាន​មួយ​គូ​នេះ ឲ្យ​តែ​ឈ្នះ​ជប់​លៀង​មួយ​ភូមិ ប៉ុន្តែ​បើ​ចាញ់​វិញ ស្ងាត់​ឲ្យ​ជ្រាប ហើយ​នៅ​តែ​មិន​រាង ខំ​ប្រឹង​ទៅ​ស្រង់​ដើម​ទៀត ចុង​ក្រោយ​ឈ្នះ​តែ​មេ ឯ​កូន​ចាញ់​តែ​រហូត​។

ដោយ​សារ​តែ​មាន​វិធាន​ការ​បង្រ្កាប​ល្បែង​ពី​សំណាក់​រាជរដ្ឋា​ភិបាល ប្តី​ប្រពន្ធ​មួយ​គូ​នេះ ក៏​បោះបង់​ចោល​នូវ​ទង្វើ​នេះ​ទាំង​ស្រុង ហើយ​ងាក​មក​ប្រកប​របរ​រក​ស៊ី​ចិញ្ចឹម​ជីវិត​ដូច​សព្វ​មួយ​ដង​វិញ។

សកម្ម​ភាព​របស់​ប្តី​ប្រពន្ធ​មួយ​គូ​នេះ​បាន​ហុច​ផល​ឲ្យ​ពួក​គាត់​យ៉ាង​ទាន់​ហន់​ដែល​ពួកគេ​ធ្លាក់​ខ្លួន​ពី​មាន​ជីវភាព​ធូរ​ធារ​មក​មាន​ជីវ​ភាព​មិន​សូវ​សម្បូរ​បែប​៕