Headlines:

យុវជន​ធ្លាប់​ញៀន​ល្បែង​ស៊ី​សង ដឹង​ខុស កែ​ខ្លួន



121107_10a

នៅ​ក្នុង​វ័យ​សិក្សា​បើ​យុវ​សិស្ស​សេព​គប់​មិត្ត​ភក្តិ​ល្អ​អ្នក​ទាំង​នោះ​នឹង​នាំ​ទៅ​ដើរ​ផ្លូវ​ត្រូវ​និង​មាន​អនាគត​ភ្លឺ​ស្វាង​ប៉ុន្តែ​បើ​សេព​គប់​ប៉ះ​ចំ​មិត្ត​ភក្តិ​មិន​ល្អ​វិញ​នោះ​គេ​នឹង​អូស​ទាញ​អ្នក​ទៅ​ដើរ​ផ្លូវ​ខុស​និង​ប្រព្រឹត្ត​អំពើ​ផ្សេង​ៗ​ដែល​បំផ្លាញ​អនាគត​របស់​អ្នក​និង​សង្គម​ជាតិ​។

ដោយ​ឡែក​ក៏​មាន​យុវសិស្ស​មួយ​ចំនួន​ប្រព្រឹត្តិ​អំពើ​ពាលា​ផ្សេង​ៗ​ដោយ​គ្មាន​អ្នក​ណា​អូស​ទាញ​ដូច​ជា​យុវជន​ប៊ុន​ណារិទ្ធ ដែល​ធ្លាប់​ជា​អតីត​សិស្ស​វិទ្យា​ល័យ​រដ្ឋ​មួយ​ក្នុង​រាជធានី​ភ្នំពេញ​បាន​ដើរ​ផ្លូវ​ខុស​ដោយ​គេច​មិន​ចូល​សិក្សា​និង​លេង​ល្បែង​ភ្នាល់​ដោយ​ចំណាយ​ថវិកា​អស់​ជា​ច្រើន​។​លោក​ណារិទ្ធ​បាន​និយាយ​ថា៖ «ខ្ញុំ​ចាប់​ផ្តើម​ចេះ​លេង​ហ្គេម ចាប់​ពី​ថ្នាក់​បឋម​ហើយ​ចាប់​ផ្តើម​ចេះ​គេច​សាលា និង​ចាក់​បាល់​ពេល​កំពុង​រៀន​នៅ​វិទ្យា​ល័យ​ដោយ​មិន​មាន​អ្នក​នាំ​នោះ​ទេ»។

ទោះ​បី​ជា​យ៉ាង​នេះ​ក្តី សកម្មភាព​ទាំង​អស់​នេះ​មិន​បាន​បង្អាក់​យុវ​ជន​ម្នាក់​នេះ​ពី​ការ​សិក្សា​ឡើយ។ នៅ​ក្នុង​ឆ្នាំ​២០០៧ លោក ណារិទ្ធ បាន​បន្ត​ថ្នាក់​មហា​វិទ្យាល័យ​ផ្នែក​ភាសា​អង់គ្លេស និង​សិក្សា​នៅ​ឯ​សាកល​វិទ្យា​ល័យ​អន្តរជាតិ​​(IU) ប៉ុន្តែ​ដោយ​សារ​មូល​ដ្ឋាន​គ្រឹះ​មិន​រឹង​មាំ​ការ​សិក្សា​របស់​លោក​មិន​ទទួល​បាន​លទ្ធ​ផល​ល្អ​ឡើយ​ហើយ​រៀន​ធ្លាក់​ស្ទើរ​តែ​រៀង​រាល់​ខែ។ ដោយ​មាន​ការ​មិន​ពេញ​ចិត្ត​ចំពោះ​លទ្ធ​ផល​នៃ​ការ​សិក្សា លោក ណារិទ្ធ ក៏​បាន​ងាក​ទៅ​រក​ទង្វើ​ចាស់​វិញ ហើយ​ចាប់​ផ្តើម​គេច​សាលា​មិន​ចូល​រៀន​តទៅ​ទៀត។

លោក​បាន​បន្ត​ការ​លេង​ល្បែង ហើយ​ស្ថិត​នៅ​ក្នុង​ទ្រង់ទ្រាយ​ធំ​ជាង​មុន ដោយ​រូប​លោក​ហ៊ាន​ចូល​ប្រឡូក​ក្នុង​វង់​ល្បែង​ប្រភេទ ឡូតូ (ស្លូត​ម៉ាស៊ីន)​ដែល​ទទួល​ការ​ភ្នាល់​ធំៗ។ លោក​បាន​បញ្ជាក់​ថា៖ «ដំបូង ចេះ​តែ​លេង​ដើម្បី​សប្បាយ​ទេ ប៉ុន្តែ​បន្ទាប់​ពី​ចាញ់ ចាញ់ ចាញ់ អស់​ជា​ច្រើន​សា​ខ្ញុំ​ចាប់​ផ្តើម​ភ្នាល់​កាន់​តែ​ធំ​ទៅ​ៗ ដើម្បី​ស្រង់​ដើម​មក​វិញ ប៉ុន្តែ​លទ្ធ​ផល​ចុង​ក្រោយ គឺ​នៅ​តែ​ចាញ់​ទៀត»។ បើ​តាម​ការ​បូក​សរុប ក្នុង​រយៈ​ពេល​មួយ​ឆាវ​ដែល​លង់​ខ្លួន​នេះ លោក ណារិទ្ធ​បាន​ចោល​លុយ​ក្នុង​វង់​ល្បែង​ប្រហែល​ជា​ជាង ២ ០០០ ដុល្លារ ដោយ​បូក​រួម​ជា​មួយ​ទាំង​ម៉ូតូ មួយ​គ្រឿង និង លុយ​បង់​សាលា​ថែម​ទៀត​។ លោក ណារិទ្ធ បាន​បន្ត​ដោយ​ដក​ដង្ហើម​ធំ​ថា៖​«នេះ​គឺជា​រឿង​អតីត​កាល ខ្ញុំ​ក៏​មិន​ចង់​រំឭក​ដែរ»។

បច្ចុប្បន្ន​នេះ លោក​ប៊ុន ណារិទ្ធ គឺ​ជា​អ្នក​លក់​គ្រឿង​សំណង់ ហើយ​ប្រាក់​ចំណេញ​ពី​ការ​លក់​ដូរ គឺ​យក​មក​សម្រាប់​ផ្គត់ផ្គង់​ក្រុម​គ្រួសារ​ទាំង​មូល។

លោក​បាន​បង្ហើប​ប្រាប់​ឲ្យ​ដឹង​ពី​មូល​ហេតុ​ដែល​ប្រែ​ក្លាយ​លោក ឲ្យ​ឈប់​ពី​ល្បែង​ថា៖ «ពេល​ឃើញ​ឪពុក​ម្តាយ​គាត់​ខំ​ប្រឹង​ប្រែង​រក​លុយ​ដើម្បី​កូន ខ្ញុំ​ក៏​ចាប់​ផ្តើម​មាន​អារម្មណ៍​សោក​ស្តាយ​ចំពោះ​ទង្វើ​ដែល​ខ្ញុំ​ធ្លាប់​បាន​ប្រព្រឹត្តិ​ណាស់ ហើយ​ខ្ញុំ​ក៏​តាំង​ចិត្ត​ឈប់​វា​តែ​ម្តង»។

ជា​ចុង​ក្រោយ លោក​មាន​ពាក្យ​ផ្តាំ​ផ្ញើ​ថា៖ «ប្រសិន​បើ​មិន​ធ្លាប់ ចូរ​កុំ​សាក​ល្បង​ឲ្យ​សោះ ប៉ុន្តែ​បើ​ជ្រុល​ទៅ​ហើយ គួរ​តែ​ដក​ខ្លួន​ចេញ​ឲ្យ​ឆ្ងាយ ពី​ព្រោះ​ពាក្យ​ថា ធ្វើ​ខុស កែ​ខ្លួន​នៅ​តែ​មាន​អត្ថន័យ​ជានិច្ច​សម្រាប់​អ្នក»៕