សួស្តីឆ្នាំថ្មី! កាសែត​ភ្នំពេញ ប៉ុស្តិ៍ សូម​ជម្រាប​ជូន​ដំណឹង​ដល់​ប្រិយ​មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំង​អស់​ឲ្យ​បាន​ជ្រាប​ថា ដើម្បី​ចូល​រួម​អបអរ​ពិធី​បុណ្យ​ចូល​ឆ្នាំ​ខ្មែរ ប្រពៃណី​ជាតិ​ខាង​មុខ​នេះ ​ភ្នំពេញ ប៉ុស្តិ៍ នឹង​ផ្អាក​ចេញ​ផ្សាយ​ពី​ថ្ងៃទី​១៤ ១៥ ១៦ និង​១៧ មេសា ​២០១៤ ហើយ​នឹង​ចាប់​ផ្តើម​ចេញ​ផ្សាយ​ជា​ធម្មតា​ឡើង​វិញ​នៅ​ថ្ងៃ​ទី ១៨ មេសា ឆ្នាំ​២០១៤។ ភ្នំពេញ ប៉ុស្តិ៍ ​សូម​ជូន​ពរ មិត្ត​អ្នក​អាន និង​អ្នក​ផ្សាយ​ពាណិជ្ជកម្ម​ទាំងអស់ ជួប​តែ​សេចក្តី​សុខ សុភមង្គល​គ្រប់​ៗ​គ្នា និង​គ្រប់​ពេល​វេលា នាឆ្នាំថ្មី​​នេះ។
Headlines:

គ្មាន​ផ្ទះ&​ឧបករណ៍​ទំនើប ប៉ុន្ដែ​​ពុះពារ​ក្នុង​ការ​សិក្សា



121114_10a

យុវជន​មួយ​ចំនួន​រស់​នៅ​ក្នុង​ជីវិត​ដ៏​សម្បូរ​បែប​ផ្ទុយ​មក​វិញ សូម​ក្រឡេក​មក​ឃើញ​ពី​ជីវភាព​នៃ​ការ​រស់​នៅ និង​សិក្សា​របស់​និស្សិត​ក្រី​ក្រ​វិញ​ម្តង។

យុវជន​ហាក់​ម៉េង អាយុ​២៣​ឆ្នាំ មាន​ស្រុក​កំណើត​នៅ​ខេត្ត​កំពង់ស្ពឺ​ជា​ក្មេង​កំព្រា​តាំង​ពី​កុមារ​ភាព​មក ជា​មួយ​បង​ប្អូន​៣នាក់​។

ក្នុង​នាម​ជា​កូន​ប្រុស​ពៅ​គាត់​មាន​វាសនា​កម្សត់ មិន​ខុស​ពី​បង​កំព្រា​ទាំង​ពីរ​នាក់​ទេ​។​ពួកគេ​ពិត​ជា​ត្រូវ​ការ​ការ​ថ្នាក់​ថ្នម​យ៉ាង​កក់​ក្ដៅ​ពី​ឪពុក​ម្ដាយ​ប៉ុន្ដែ​ក្ដី​ស្រមៃ​ហាក់​ដូច​ជា​ផ្សែង​អណ្ដែត​កណ្ដាល​លំហ ប៉ុណ្ណោះ​។ ទោះ​បី​ជា​ជួប​ប្រទះ​បញ្ហា​យ៉ាង​នេះ​ក្តី​ពួក​គេ​មិន​បណ្ដោយ​ខ្លួន​រស់​តាម​ព្រេង​វាសនា​ទេ។

ដោយ​ទទួល​បាន​ការ​សន្តោស​ប្រណី​ពី​ម្ដាយ​មីង​ទាំង​៣​នាក់ កូន​កំព្រា​៣​នាក់​នោះ​បាន​សុំ​ពួក​គាត់​មក​ជ្រក​កោន​ស្នាក់​អាស្រ័យ​។

យុវជន ហាក់ ម៉េង គឺជា​អ្នក​ដែល​មាន​សំណាង​ជាង​គេ​ក្នុង​ចំណោម​បង​២​នាក់​ទៀត​ពី​ព្រោះ​លោក​មាន​ឱកាស​បាន​ចូល​សាលា​រៀន​។ ប៉ុន្តែ​មុន​នឹង​ឈាន​ទៅ​មក​ដល់​ថ្នាក់​មហា​វិទ្យាល័យ​ដូច​ថ្ងៃ​នេះ​យុវជន​កំព្រា​រូប​នេះ​បាន​ឆ្លង​កាត់​ភាព​ល្វីង​ជូរ​ចត់​ទាំង​ជីវភាព និង​ខ្វះ​ភាព​កក់​ក្ដៅ​ពី​ឪពុក​ម្ដាយ។​លោក​ត្រូវ​រៀន​រស់​ដោយ​ខ្លួន​ឯង​តាំង​ពី​អាយុ​១៥​ឆ្នាំ​មក​ម៉្លេះ​ពោល​គឺ​នៅ​ពេល​ដែល​មីង​របស់​លោក​បាន​មក​រស់​នៅ​ទីក្រុង​ភ្នំពេញ​ចោល​គាត់​លោក​ត្រូវ​រស់​នៅ​តែ​ម្នាក់​ឯង​ដោយ​សិក្សា​ផង​និង​ចិញ្ចឹម​មាន់​ជ្រូក​ផង​ដើម្បី​ចម្អែត​ក្រពះ​ប្រចាំ​ថ្ងៃ។

រហូត​មក​ដល់​ឆ្នាំ​២០០៨​លោក​បាន​ផ្លាស់​មក​សិក្សា​នៅ​ទី​ក្រុង​ភ្នំពេញ​តែ​ម្នាក់​ឯង​ដោយ​មាន​លុយ​ក្នុង​ដៃ​ចំនួន​២០០​ដុល្លារ ដែល​បាន​មក​ពី​ប្រាក់​កម្ចី​ពី​អ្នក​ជិត​ខាង​ដោយ​លោក​បាន​អះ​អាង​ថា៖ «នេះ​គឺជា​ជំហាន​ដំបូង​ដែល​ខ្ញុំ​បាន​ចាប់​ផ្តើម​ការ​សិក្សា​មហា​វិទ្យាល័យ​នៅ​ឯទី​ក្រុង​ភ្នំពេញ»។

បច្ចុប្បន្ន​នេះ​យុវជន​ហាក់​ម៉េង​ជា​និស្សិត​ថ្នាក់​បរិញ្ញា​បត្រ​ផ្នែក​ភាសា​អង់គ្លេស​នៅ​វិទ្យា​ស្ថាន​ភាសា​បរទេស និង​ជា​គ្រូ​បង្រៀន​ស្ម័គ្រ​ចិត្ត​នៅ​អង្គការ ស្នាម​ញញឹម​នៃ​កុមារ។ ជា​រៀង​រាល់​សប្តាហ៍​លោក​ទទួល​បាន​ប្រាក់​ឧបត្ថម្ភ​ពី​បង​ស្រី​និង​បង​ប្រុស​ពី​៥​ម៉ឺន​ទៅ​៧ម៉ឺន​រៀល​សម្រាប់​ចំណាយ​លើ​ថ្លៃ​ជួល​ផ្ទះ សាលា​សៀវភៅ ការ​ធ្វើ​ដំណើរ​និង​អាហារ​ហូប​ចុក​ដែល​ពេល​ខ្លះ​លោក​ត្រូវ​ដាច់​បាយ​ម្ដង​ម្កាល​ក៏ មាន​ដែរ​។

ការ​រស់​នៅ​ដ៏​ផ្ទុយ​ស្រឡះ​ពី​ភាព​ស៊ីវិល័យ​យុវជន​រូប​នេះ​ជ្រក​ក្រោម​ដំបូល​ផ្ទះ​ជួល​ដែល​គ្មាន​សម្ភារ​សិក្សា​គ្រប់​គ្រាន់​សូម្បី​តែ​តុ ឬ​កៅអី​ស្ទើរ​តែ​គ្មាន​ផង មិន​ចាំ​បាច់​នឹក​ស្រមៃ​ដល់​ipad, iphone ឬ MacBook Pro អី​នោះទេ​។

ជីវ​ភាព​ខ្វះ​មុខ​ខ្វះ​ក្រោយ​បែប​នេះ នៅ​តែ​មិន​អាច​បន្ទុច​បង្អាក់​ការ​តស៊ូ​ដ៏​មោះ​មុត​របស់​យុវជន​យើង​បាន​ទេ។​នេះ​ជា​គំរូ​មួយ​ដ៏​ល្អ​កម្រ​រក​បាន​សម្រាប់​យុវ​សិស្ស​ទាំង​ឡាយ​ក្នុង​ការ​ពុះពារ​តស៊ូ​ជម្នះ ការ​លំបាក ដើម្បី​ប្ដូរ​យក​ចំណេះ​វិជ្ជា​៕