Headlines:

ផ្ទះ​ស្អាត ឧបករណ៍​ទំនើប និង​មាន​ឱកាស​សិក្សា​ខ្ពស់



121114_10b
កញ្ញា លីដា រីណា

នៅ​ពេល​ដែល​ខ្ញុំ​ឈាន​ជើង​ដើរ​ចូល​ផ្ទះ​មួយ​ដ៏​ស្អាត​ដូច​ជា​វីឡា​មាន​ពីរ​ល្វែង ខ្ញុំ​ឃើញ​រថយន្ដ​ឡិច​ស៊ីស​ដ៏​ទំនើប​មួយ​គ្រឿង​ចត​នៅ​ខាង​មុខ​ផ្ទះ​។ ពេល​ទៅ​ដល់​បរិវេណ​ខាង​ក្នុង​ខ្ញុំ​ឃើញ​មាន​បំពាក់​សុទ្ធ​តែ​គ្រឿង​សង្ហារិម​ប្រណីត​ៗ​និង​ឧបករណ៍​ប្រើ​ប្រាស់ រួម​ទាំង iphone smart phone​MacBook Pro និង ipad​ដែល​ងាយ​ស្រួល​ក្នុង​ការ​ស្រាវជ្រាវ​ឯកសារ​ផ្សេង​ៗ​តាម​អ៊ីនធឺណិត​។

ក្នុង​ទឹក​មុខ​រីក​រាយ​ដែល​រស់​នៅ​ក្នុង​ផ្ទះ​ដ៏​ស្រស់​ស្អាត​ប្រកប​ដោយ​ផាសុកភាព​កញ្ញា​លីដា រីណា វ័យ​២១​ឆ្នាំ​ជា​និស្សិត​សាកលវិទ្យាល័យ​ភូមិន្ទ​នីតិ​សាស្ដ្រ​និង​វិទ្យា​សាស្ដ្រ​សេដ្ឋកិច្ច​(RULE) បាន​ឲ្យ​ដឹង​ថា​៖ «​ខ្ញុំ​តែង​តែ​ប្រើ​ឧបករណ៍​ទាំង​នេះ​ជា​ប្រចាំ​ដើម្បី​ស្រាវជ្រាវ​ឯកសារ​សម្រាប់​ការ​សិក្សា​។ ប្រសិន​បើ​គ្មាន​ឧបករណ៍​ទាំង​អស់​ទេ ខ្ញុំ​មិន​អាច​ទាក់​ទង​ជាមួយ​មិត្ដភក្ដិ​ឬ​ក៏​ប្រើ​ជា​ប្រភព​ក្នុង​ការ​ស្រាវ​ជ្រាវ​មេ​រៀន​សម្រាប់​សិក្សា​ឡើយ​»។

កញ្ញា រីណា យល់​ឃើញ​ថា ឧបករណ៍​ទំនើបៗ​ពិត​ជា​មាន​សារៈ​សំខាន់​ណាស់​សម្រាប់​កញ្ញា​ក្នុង​ការ​សិក្សា និង​ទំនាក់​ទំនង​ក្នុង​សង្គម ហើយ​វា​មាន​សារៈ​សំខាន់​ខុស​ៗ​គ្នា​ដោយ​លើក​យក​ឧទាហរណ៍​ថា៖ «​ខ្ញុំ​មិន​អាច​យក MacBook Pro តាម​ខ្លួន​គ្រប់​ទី​កន្លែង​ទេ​ពេល​ខ្លះ​ខ្ញុំ​ត្រូវ​យក ipad មក​ជំនួស​វិញ​»។

សរុប​មក ការ​រស់​នៅ​ក្នុង​ជីវភាព​ធូរ​ធារ មិន​ត្រឹម​តែ​ផ្ដល់​ភាព​ស៊ីវិល័យ​ប៉ុណ្ណោះ​ទេ ប៉ុន្ដែ​វា​ថែម​ទាំង​ផ្តល់​នូវ​ងាយ​ស្រួល​ក្នុង​ការ​ស្វែង​រក​ឧបករណ៍​ជំនួយ​ដល់​ការ​សិក្សា​ផង​ដែរ​។ ជាង​នេះ​ទៅ​ទៀត​ទោះ​បី​ជា​កញ្ញា​រីណា​មាន​របស់​ប្រើ​ប្រាស់​យ៉ាង​សម្បូរ​បែប​គ្រប់​យ៉ាង​នេះ​ក្តី​ក៏​កញ្ញា​នៅ​មិន​ភ្លើត​ភ្លើន​ហើយ​ភ្លេច​ការ​សិក្សា​ឡើយ​៕​