Headlines:

ចិញ្ចើម​ផ្លូវ​មុខ​ផ្ទះ​ជា​ផ្លូវ​ដ៏​ពេញ​និយម​របស់​អ្នក​បើកបរ



121121_10a

បើ​ងាក​ទៅ​មើល​កាល​ពី​ប៉ុន្មាន​ឆ្នាំ​មុន​ការ​កក​ស្ទះ​ចរាចរណ៍ គឺ​កើត​ឡើង​ម្តង​កាល​ឬ​តែ​ក្នុង​ករណី​មួយ​ចំនួន​ប៉ុណ្ណោះ​ដូច​ជា​នៅ​ថ្ងៃ​បុណ្យ​ទាន​ពិសេស​និង​ពេល​ដាច់​ភ្លើង​ចរាចរណ៍​ជា​ដើម​។​ផ្ទុយ​ទៅ​វិញ​បើ​យើង​ក្រឡេក​មក​មើល​ចរាចរណ៍ នា​ពេល​បច្ចុប្បន្ន​នេះ​វិញ ការ​កកស្ទះ​ក្នុង​ពេល​ធ្វើ​ដំណើរ​គឺ​ស្ទើរ​តែ​ត្រូវ​បាន​ក្លាយ​ទៅ​ជា​ទម្លាប់​ទៅ​ហើយ​។​មូល​ហេតុ​ដែល​យើង​តែង​តែ​មើល ឃើញ​នោះ​គឺ​មក​ពី​ចំនួន​នៃ​អ្នក​ធ្វើ​ដំណើរ កាន់​តែ​ច្រើន​។​ជាមួយ​គ្នា​នេះ​ការ​កក​ស្ទះ​ចរាចរណ៍​ជា​ហេតុ​ក្នុង​ការ​ពន្យឺត​អ្នក​ធ្វើ​ដំណើរ​ដែល​ចង់​ទៅ​មុខ​លឿន​ដើម្បី​ឲ្យ​ឆាប់​ទៅ​ដល់ គោល​ដៅ​ហើយ​បាន​ធ្វើ​ឲ្យ​ពួកគេ​ខំ​ប្រឹង​បញ្ជា​ចង្កូត​យាន​ជំនិះ​ក្នុង​គ្រប់​វិធី​ដើម្បី​បាន​ទៅ​មុខ​មុន​គេ ដោយ​ពេល​ខ្លះ​គេ​មិន​សូវ​ខ្វល់​ពី​អ្នក​ធ្វើ​ដំណើរ​ជុំ​វិញ​ខ្លួន​នោះ​ទេ។

បើ​តាម​បទ​ពិសោធ​របស់​ខ្ញុំ​ផ្ទាល់​ដែល​បាន​ឃើញ​ផ្ទាល់​ភ្នែក​ជា​រឿយ​ៗ​ការ​ធ្វើ​ដំណើរ​ក្នុង​ផ្លូវ​កក​ស្ទះ​ខ្ញុំ​តែង​តែ​សម្គាល់​ឃើញ​អ្នក​ធ្វើ​ដំណើរ​មួយ​ចំនួន​ជា​ពិសេស​គឺ​អ្នក​ជិះ​ម៉ូតូ​យក​ចិញ្ចើម​ផ្លូវ​មុខ​ផ្ទះ​មក​ធ្វើ​ដំណើរ​ដើម្បី​ឲ្យ​គាត់​បាន​ទៅ​មុខ​ហើយ​គេច​ផុត​ពី​ការ​ស្ទះ​ចរាចរណ៍។​តើ​ហេតុ​អ្វី​បាន​ជា​អ្នក​ទាំង​នោះ​ធ្វើ​ដូច្នេះ​? ហើយ​បើ​សិន​អ្នក​ជា​អ្នក​ថ្មើរ​ជើង​ឬ​ជា​ម្ចាស់​ផ្ទះ​នៅ​លើ​ចិញ្ចើម​ផ្លូវ​នោះ តើ​អ្នក​នឹង​មាន​អារម្មណ៍​បែប​ណា​?

លោក​តែប​ម៉ារ៉ាឌី​ជា​ម្ចាស់​ផ្ទះ​មួយ​រូប​ដែល​រស់​នៅ​លើ​ផ្លូវ​ម៉ៅ​សេ​ទុង​ជិត​ភ្លើង​ស្តុប​ផ្សារ​ដើម​គ បាន​ប្រាប់​ពី​អារម្មណ៍​របស់​លោក​ថា​៖​«​មិន​មែន មាន​តែ​ខ្ញុំ​ទេ​ដែល​មិន​សប្បាយ​ចិត្ត​នោះ រីឯ​អ្នក​ជិត​ខាង​របស់​ខ្ញុំ​ដ៏​ដូច្នេះ​ដែរ ហើយ​ក៏​មិន​ចង់​ឃើញ​អ្នក​ធ្វើ​ដំណើរ​ប្រព្រឹត្ដ​ទង្វើ​អសីល​ធម៌​បែប​នេះ​ទេ​។​វា​ធ្វើ​ឲ្យ​ខ្ញុំ​ព្រួយ​បារម្ភ​ដល់​សុវត្ថិ​ភាព​ពី​ព្រោះ​ពួក​គាត់​ធ្វើ​ដំណើរ​ជិត​ផ្ទះ​របស់​ខ្ញុំ​ណាស់​។​ជួន​កាល​មិន​មែន​មាន​ត្រឹម​តែ​ម៉ូតូ​ទេ​ដែល​ជិះ​លើ​ចិញ្ចើម​ផ្លូវ​មុខ​ផ្ទះ​របស់​ខ្ញុំ​ប៉ុន្ដែ​ពេល​ខ្លះ ក៏​មាន​ទាំង​ឡាន​ខំ​ឡើង​ទៀត​ផង​ដែរ»​។

ជា​មួយ​គ្នា​នេះ​លោក​ម៉ារ៉ាឌី​បាន​បន្ត​ប្រាប់​ពី​បទ​ពិសោធ​របស់​លោក​ទៀត​ថា​មាន​អ្នក​បើក​បរ​មួយ​ចំនួន​ជិះ​រំលោភ​ផ្លូវ​មុខ​ផ្ទះ​គាត់​ហើយ​ថែម​ទាំង​ស្រែក​ស្តី​ឲ្យ​គាត់​ថា​បាំង​ផ្លូវ​របស់​គេ​ទៀត។​ មក​ដល់​ពេល​នេះ​តាម​អ្វី​ដែល​គាត់​បាន​ដឹង​បាន​ឃើញ​មាន​គ្រោះ​ថ្នាក់​ប៉ះ​គ្នា​បី​ដង​ហើយ​នៅ​លើ​ចិញ្ចើម​ផ្ទះ​របស់​គាត់​ដោយ​សារ​តែ​ការ​ជិះ​លឿន​មិន​ខ្វល់​ពី​អ្នក​ដទៃ​។

ជា​ចុង​ក្រោយ​លោក​ម៉ារ៉ាឌី​ក៏​មាន​សំណូម​ពរ​ដែរ​ថា​៖​ «​ទាំង​ម៉ូតូ​និង​រថយន្ត​ទាំង​អស់​គួរ​ធ្វើ​ដំណើរ​តែ​នៅ​លើ​ផ្លូវ​របស់​ខ្លួន​ហើយ​គួរ​ចៀស​វាង​ការ​បើក​បរ​ហួស​ការ​កំណត់​ជា​ពិសេស​នៅ​លើ​ចិញ្ចើម​ផ្លូវ​មុខ​ផ្ទះ​សម្រាប់​អ្នក​ថ្មើរ​ជើង​។​នេះ​ជា​ការ​ចូល​រួម​គោរព​ច្បាប់​ចរាចរណ៍​និង​ការ​ចេះ​យោគ​យល់​គ្នា​ទៅ​វិញ​ទៅ​មក​ក្នុង​នាម​ជា​ជន​ជាតិ​ខ្មែរ​ដូច​គ្នា​»​។

ជា​ការ​ពិត​ណាស់ ការ​កក​ស្ទះ​ចរាចរណ៍​មិន​អាច​ចៀស​ផុត​ឡើយ​ប៉ុន្ដែ​អ្នក​បើក​បរ​ត្រូវ​គោរព​ច្បាប់​មាន​ការ​យោគ​យល់​និង​អធ្យា​ស្រ័យ​គ្នា​ហើយ​មិន​ប្រមាថ​ជីវិត​អ្នក​ដទៃ​ដើម្បី​បញ្ចៀស​នូវ​បញ្ហា​និង​គ្រោះ​ថ្នាក់​នា​នា​នៅ​ពេល​ធ្វើ​ដំណើរ​។

រួម​គ្នា​កាត់​បន្ថយ​គ្រោះ​ថ្នាក់​និង​ការ​កក​ស្ទះ​ចរាចរណ៍​នៅ​កម្ពុជា​៕