Headlines:

អាយុ​ជីវិត​របស់​អ្នក​ដំណើរ​ពឹង​អាស្រ័យ​លើ​អ្នក​បើកបរ​



121226_10d

អ្នក​បើកបរ​រថយន្ដ​ឈ្នួល ឬ​រថយន្ដ​ក្រុង​ពិត​ជា​មាន​តួ​នាទី​សំខាន់​ណាស់​ក្នុង​ការ​ផ្ដល់​សុវត្ថិភាព​ដល់​អ្នក​ដំណើរ​ទាំងអស់​។​ប៉ុន្តែ​តើ​អ្នក​មាន​ចាប់​អារម្មណ៍​ទេ​ថា ជីវិត​របស់​អ្នក​និង​អ្នក​ធ្វើ​ដំណើរ​ផ្សេង​ទៀត​ស្ថិត​ក្នុង​កណ្ដាប់​ដៃ​របស់​អ្នក​បើកបរ​តែ​ម្នាក់?

អ្នក​បើកបរ​ត្រូវ​មាន​ទំនួល​ខុស​ត្រូវ​ខ្ពស់​បំផុត ក្នុង​ពេល​កំពុង​បញ្ជា​ដៃ​ចង្កូត​ដើម្បី​ធានា​ឲ្យ​បាន​នូវ​សុវត្ថិភាព​អ្នក​ដំណើរ​និង​ភ្ញៀវ​ទេសចរ​។ ផ្ទុយ​ទៅ​វិញ ប្រសិន​បើ​ពួក​គេ​បំពាន​ដោយ​មិន​បាន​ប្រុង​ប្រយ័ត្ន​ខ្ពស់​ដែល​គិត​តែ​ពី​និយាយ​ទូរស័ព្ទ​បណ្ដើរ​បើក​បរ​បណ្ដើរ​វា​ពិត​ជា​ជួប​ហានិភ័យ​ខ្ពស់​ណាស់​។

ជាក់ស្ដែង​លោក អោម រដ្ឋា អាយុ​២៣​ឆ្នាំ​ជា​អ្នក​ដំណើរ​លើ​រថយន្ដ​ឆ្ពោះ​ទៅ​កាន់​ខេត្ដ​ពោធិ៍សាត់​កាល​ពី​ថ្ងៃ​សុក្រ​បាន​ឲ្យ​ដឹង​ថា៖​ «អ្នក​បើក​រថយន្ដ​ក្រុង​ដែល​ខ្ញុំ​ជិះ​ប្រើ​ដៃ​ម្ខាង​និយាយ​ទូរស័ព្ទ​ជាង​១០នាទី​ក្នុង​ពេល​បើកបរ និង​ដៃ​ម្ខាង​បញ្ជា​ចង្កូត​រថយន្ដ​។ ពេល​ឃើញ​គាត់​ប្រឹង​កាច់​ចង្កូត​ដៃ​ម្ខាង​អ៊ីចឹង ខ្ញុំ​ដូច​ជា​ផត​ពោះ​ដល់​ហើយ»។

អំឡុង​ពេល​បើកបរ​ពី​៣​ទៅ​៥​ម៉ោង ឬ៨​ម៉ោង​ក៏​ដោយ​អ្នក​បើក​បរ​មិន​គួរ​ណា​ទទួល​ទូរស័ព្ទ ឬ​ហៅ​ចេញ​នោះ​ទេ ព្រោះ​វា​ប៉ះ​ពាល់​ដល់​ការ​ផ្ចង់​អារម្មណ៍ និង​ប្រមូល​កម្លាំង​ក្នុង​ការ​បញ្ជា​យាន​យន្ត ដែល​អាច​បណ្តាល​ឲ្យ​មាន​គ្រោះ​ថ្នាក់​ចរាចរណ៍។ សូម្បី​តែ​ការ​ធ្វេស​ប្រហែស​ត្រឹម​តែ​២​ទៅ​៣​វិនាទី ក៏​អាច​បង្ក​ឲ្យ​មាន​គ្រោះ​ថ្នាក់​បាន​ដែរ។ បើ​ស្ថិត​ក្នុង​កាលៈ​ទេសៈ​ដែល​ត្រូវ​តែ​និយាយ​ទូរស័ព្ទ អ្នក​បើក​បរ​ត្រូវ​តែ​ប្រើ​កាស​ឬ​ប្រ៊ូឡាន​ជា​អ្នក​លើក​ជំនួស​៕​