Headlines:

ឧទ្ធរណ៍​តម្កល់​ទោស​រឿង​ក្តី​ផ្កាយ​១ នួន ប៉ាក់



121113_01
កូនប្រុស​​បី​នាក់​​​របស់​លោក​ឧត្ត​ម​សេនី​យ៍​ត្រី​​នួន​ ប៉ាក់​ពេល​ឡើ​ង​សវនាការ​នៅ​សាលា​ឧទ្ធរ​ណ៍​កាល​ពី​ថ្ងៃ​ម្សិល​មិញ​ ហើយ​ពួក​គេ​ត្រូវ​បាន​តម្កល់​ឲ្យ​ជាប់​ពន្ធនាគារ​ពី​៧​ទៅ​៨​ឆ្នាំ​​ម្នាក់ៗ។ រូប លីណា

ភ្នំពេញៈ សាលា​ឧទ្ធរណ៍​កាល​ពី​ម្សិលមិញ​បាន​សម្រេច​តម្កល់​សេចក្ដី​សម្រេច​របស់ សាលា​ដំបូង​រាជធានី​ភ្នំពេញ​និង​ផ្ដន្ទាទោស​ភរិយា​ និង​កូន​ប្រុស​បី​នាក់​របស់​លោក​ឧត្ដម​សេនីយ៍​ត្រី​ម្នាក់​ នៃ​កង​យោធពល​ខេមរ​ភូមិន្ទ​ឲ្យ​ជាប់​ពន្ធនាគារ​ម្នាក់ៗ ចាប់​ពី​៧​ទៅ​៨​ឆ្នាំ​ ក្រោម​ការ​ចោទ​ប្រកាន់​ពី​បទ​ប្រព្រឹត្ត​អំពើ​ឃោរឃៅ និង​ធ្វើ​ទារុណកម្ម​ប្តី​និង​ឪពុក។

លោក ជួន ស៊ុនឡេង ប្រធាន​ក្រុម​ប្រឹក្សា​ចៅក្រម​ជំនុំ​ជម្រះ​ជា​អនុប្រធាន​សាលា​ឧទ្ធរណ៍ បាន​ថ្លែង​ថា លោក​ស្រី ងិន ចន្ទ្រាទេវី អាយុ​៥០​ឆ្នាំ​ ជា​ភរិយា​លោក​ឧត្ដម​សេនីយ៍​ត្រី នួន ប៉ាក់ អាយុ​៥៥​ឆ្នាំ ជា​ជន​ជាតិ​គ្រឹង​ និង​ជា​ទីប្រឹក្សា​ក្រសួង​ការពារជាតិ ត្រូវ​បាន​ចោទ​ប្រកាន់​ពី​បទ​ប្រើ​អំពើ​ឃោរឃៅ​និង​ទារុណកម្ម។ ចំណែក​កូន​ប្រុស​គាត់​បី​នាក់​ឈ្មោះ ប៉ាញ់ សីហនា អាយុ​២៥​ឆ្នាំ​ជា​សិស្ស ប៉ាញ់ តារាឫទ្ធិ អាយុ​២៣​ឆ្នាំ ជា​និស្សិត​ និង​ឈ្មោះ ប៉ាញ់ អានអាន អាយុ​២០​ឆ្នាំ​ ជា​និស្សិត​ ត្រូវ​បាន​ចោទ​ប្រកាន់​ពី​បទ​សម​គំនិត​ប្រព្រឹត្ត​អំពើ​ឃោរឃៅ​និង​ធ្វើ​ ទារុណកម្ម​វាយ​ដំ​ទៅ​លើ​ឪពុក​ កាល​ពី​អំឡុង​ឆ្នាំ​២០១១ នៅ​ភ្នំពេញ។

លោក ប្រធាន​ចៅក្រម​ជំនុំ​ជម្រះ​បាន​បញ្ជាក់​ថា ពួក​គេ​ត្រូវ​សមត្ថកិច្ច​នគរបាល​ក្រសួង​មហាផ្ទៃ​ចាប់​ខ្លួន​ក្នុង​ផ្ទះ ស្ថិត​នៅ​ក្នុង​សង្កាត់​ផ្សារ​ដេប៉ូ​២ ខណ្ឌ​ទួល​គោក រាជធានី​ភ្នំពេញ កាល​ពី​ថ្ងៃ​ទី​១០ ខែ​ធ្នូ​ ឆ្នាំ​២០១១​។ ពួក​គេ​ត្រូវ​បាន​ចាប់​ខ្លួន​ផ្អែក​តាម​ពាក្យ​បណ្ដឹង​ជន​រង​គ្រោះ​ នួន ប៉ាក់ ​ពាក់ព័ន្ធ​នឹង​ការ​វាយ​ដំ​និង​ធ្វើ​ទារុណកម្ម​រូប​គាត់​ដើម្បី​បង្ខំ ​ឲ្យ​លក់​ដី​ដែល​មាន​តម្លៃ​៨​ម៉ឺន​ដុល្លារ នៅ​ក្នុង​ខេត្ត​រតនគិរី ហើយ​ប្រគល់​ប្រាក់​ទៅ​ឲ្យ​ពួក​គេ។

លោក​ប្រធាន​ចៅ​ក្រម បាន​អាន​សាល​ដីកា កាល​ពី​ថ្ងៃ​ចន្ទ​ថា៖ « យោង​តាម​សវនាការ និង​ភស្តុតាង​ជាក់​ស្ដែង ជន​សង្ស័យ​ទាំង​៤​នាក់ ម្ដាយ​និង​កូន​ប្រុស​បី​នាក់​នេះ​មាន​ពិរុទ្ធភាព ព្រោះ​ពួក​គេ​ពិត​ជា​បាន​វាយ​ដំ និង​ធ្វើ​ទារុណកម្ម​លើ​ជន​រង​គ្រោះ​ជា​ស្វាមី និង​ជា​ឪពុក​ ដូច​បាន​ចោទ​ប្រកាន់​មែន​។ ដូច្នេះ​សាលា​ឧទ្ធរណ៍​សម្រេច​តម្កល់​សាល​ក្រម​សាលា​ដំបូង​រាជធានី ឆ្នាំ​២០១២​ និង​បង្គាប់​ឲ្យ​ឃុំ​ខ្លួន​នៅ​ពន្ធនាគារ​បន្ត​ទៀត​»។

លោក ជួន ស៊ុនឡេង ​បន្ត​ថា ៖ «បើ​សិន​ពួក​គេ​មិន​ទទួល​យក​ការ​ផ្ដន្ទាទោស​នេះ​ទេ ពួក​គេ​អាច​ប្ដឹង​សារ​ទុក្ខ​ទៅ​តុលាការ​កំពូល​តាម​ផ្លូវ​ច្បាប់»។

ជន​សង្ស័យ​ទាំង​៤​នាក់ និង​មេធាវី​ការពារក្ដី​មិន​អាច​ទាក់ទង​សុំ​ការ​អធិប្បាយ​បាន​ទេ កាល​ពី​ថ្ងៃ​ម្សិលមិញ។

លោក នួន ប៉ាក់ ខក​ចិត្ត​លើ​ការ​សម្រេច​របស់​សាលា​ឧទ្ធរណ៍​។ លោក​ថ្លែង​ថា ការ​សម្រេច​របស់​តុលាការ​គឺ​មិន​ឆ្លើយតប​នឹង​ការ​ស្នើ​សុំ​របស់​លោក​ទេ។ ​លោក​ប្រាប់ ភ្នំពេញ​ ប៉ុស្តិ៍ ពី​ថ្ងៃ​ចន្ទ​ថា៖ «​ខ្ញុំ​បាន​ដក​ពាក្យ​បណ្ដឹង​ព្រហ្មទណ្ឌ​ប្រឆាំង​នឹង​ភរិយា​ និង​កូន​ទាំង​បី​នាក់​ជា​ទីស្រឡាញ់​របស់​ខ្ញុំ​រួច​ហើយ ហើយ​បាន​ដាក់​ទៅ​ទាំង​សាលា​ដំបូង​រាជធានី​ភ្នំពេញ និង​សាលា​ឧទ្ធរណ៍​តាំង​ពី​ខែ​មករា​មក​ម្ល៉េះ។ ​ខ្ញុំ​សុំ​ឲ្យ​ដោះ​លែង​ពួក​គេ។ ប៉ុន្តែ​តុលាការ​ទាំង​ពីរ​ថ្នាក់​មិន​ពិចារណា​លើ​ការ​ស្នើ​សុំ​របស់​ខ្ញុំ​ទេ ហើយ​នៅ​តែ​ដាក់​ពន្ធនាគារ​ពួក​គេ​៧-៨​ឆ្នាំ ដដែល។ ខ្ញុំ​ខក​ចិត្ត​ និង​អស់​សង្ឃឹម​យ៉ាង​ខ្លាំង​ ចំពោះ​ការ​សម្រេច​របស់​តុលាការ​»។

ពាក់ ព័ន្ធ​នឹង​ការ​ចោទ​ប្រកាន់​លើ​ភរិយា និង​កូន​ៗ​ទាំង​បី​ លោក​ឧត្ដម​សេនីយ៍ត្រី នួន ប៉ាក់ ទទួល​ស្គាល់​ថា ពួកគេ​ពិត​ជា​រួម​គំនិត​គ្នា​ឃុំ​ វាយ​ដំ និង​ធ្វើ​ទារុណកម្ម​លោក ដូច​ការ​ចោទ​ប្រកាន់​របស់​លោក​មែន​។ តែ​យ៉ាង​ណា​ក៏​ដោយ ​ឥឡូវ​នេះ​លោក​បាន​ពិចារណា​ថា នេះ​គឺ​គ្រាន់​តែ​ជា​អំពើ​ហិង្សា​កើត​ឡើង​នៅ​ក្នុង​រង្វង់​គ្រួសារ ប៉ុណ្ណោះ​។

លោក នួន ប៉ាក់ បាន​បន្ថែម​ថា ឥឡូវ​នេះ​លោក​ឈប់​ខឹង​ និង​លែង​ចង​គំនុំ​នឹង​ពួក​គេ​ទៀត​ហើយ។ លោក​ចង់​ឲ្យ​ពួក​គេ​ត្រឡប់​មក​រួម​រស់​នៅ​ក្នុង​គ្រួសារ​លោក​វិញ។

លោក បាន​បញ្ជាក់​ថា៖«​ដើម្បី​ជួយ​ភរិយា​និង​រួម​ទាំង​កូន​ៗ​ជា​ទីស្រឡាញ់​របស់​ ខ្ញុំ​មាន​សេរី​ភាព ខ្ញុំ​ឥឡូវ​នេះ​កំពុង​តែ​ពិចារណា​នឹង​បន្ត​ប្ដឹង​សារ​ទុក្ខ​ទៅ​តុលាការ​ កំពូល​ក្នុង​ពេល​ឆាប់ៗ​នេះ»។

យោង​តាម​ឯកសារ​របស់​តុលាការ លោក​ស្រី​ ងិន ចន្ទ្រាទេវី ត្រូវ​បាន​សាលា​ដំបូង​រាជធានី​ភ្នំពេញ​កាត់​ទោស​ កាល​ពីថ្ងៃ​ទី​២៦​ខែ​មីនា ឆ្នាំ​២០១២​ សម្រេច​ឲ្យ​ជាប់​ពន្ធនាគារ​រយៈ​ពេល​៨​ឆ្នាំ ហើយ​ឈ្មោះ ប៉ាញ់ សីហនា ឈ្មោះ​ ប៉ាញ់​ ដារាឫទ្ធិ និង​ឈ្មោះ ប៉ាញ់ អាន​អាន ​ក៏​ត្រូវ​បាន​តុលាការ​​កាត់​ទោស​ម្នាក់ៗ​ឲ្យ​ជាប់​ពន្ធនាគារ​រយៈ​ពេល​៧​ ឆ្នាំ​ផង​ដែរ៕ PN

This content has been locked. You can no longer post any comments.
Show/hide comments
busy