Headlines:

អ្នក​កាសែត​ខ្លះ​ត្អូញត្អែរ​ពី​ការ​លំបាក​ក្នុង​ពេល​យក​ព័ត៌មាន​កិច្ច​ប្រជុំ​អាស៊ាន



ភ្នំពេញៈ កាន់​ម៉ាស៊ីន​ថត​វីដេអូ​ ជាមួយ​នឹង​ជើង​ម៉ាស៊ីន​ថត លោក Hardjito អ្នក​សារ​ព័ត៌មាន​ឥណ្ឌូនេស៊ី ធ្វើ​ការ​ឲ្យ​ប្រព័ន្ធ​សារ​ព័ត៌មាន Al-Jazeera ធ្លាប់​តទល់​នឹង​សន្តិសុខ​នៅ​ក្នុង​កិច្ច​ប្រជុំ​កំពូល​អាស៊ាន។

អ្នក​កាសែត​រូប​នេះ ត្រូវ​បាន​សន្តិសុខ​នាំ​ចេញ​ពី​បន្ទប់​ប្រជុំ​នានា។ លោក Hardjito ត្រូវ​បាន​សន្តិសុខ​រុញ​ទៅ​ម្ខាង។ នៅ​ពេល​ម្តង​នោះ សន្តិសុខ​បាន​ប្រាប់​គាត់​ថា អាវ​ដៃ​ខ្លី​របស់​គាត់ ពុំ​ស័ក្តិសម ដើម្បី​ចូល​ក្នុង​កិច្ច​ប្រជុំ​មួយ​ចំនួន​ឡើយ។ លោក Hardjito ​បាន​ថ្លែង​ថា៖ «នេះ​ជា​បទពិសោធ​អាក្រក់​ណាស់​ចំពោះ​ខ្ញុំ បើ​ធៀប​នឹង​ប្រទេស​ដទៃ​ទៀត ...»។

ក្នុង​រយៈ​ពេល​ប៉ុន្មាន​ថ្ងៃ​កន្លង ​មក​នេះ​ ទំនាក់​ទំនង​រវាង​ប្រព័ន្ធ​ផ្សព្វផ្សាយ និង​សន្តិសុខ ជា​ទំនាក់​ទំនង​ដែល​មាន​ការ​ប្រឈម​មុខ​ដាក់​គ្នា។ វា​បាន​ឈាន​ដល់​ចំណុច​កំពូល កាល​ពី​ថ្ងៃ​ចន្ទ នៅ​ពេល​អ្នក​សារ​ព័ត៌មាន ​ត្រូវ​បាន​បញ្ជា​ឲ្យ​ចេញ​ពី​បន្ទប់ ពេល​លោក បារ៉ាក់ អូបាម៉ា ប្រធានាធិបតី​អាមេរិក ទើប​ចាប់​ផ្តើម​កិច្ច​សន្ទនា​ជាមួយ​លោក​នាយក​រដ្ឋ​មន្ត្រី​ហ៊ុន សែន​។

ស្លៀក​ពាក់​ក្នុង​ឯក​សណ្ឋាន មន្រ្តី​សន្តិសុខ ដែល​ឃើញ​មាន​វត្តមាន​នៅ​គ្រប់​កន្លែង​នោះ ត្រូវ​បាន​គេ​រាយការណ៍​ថា បាន​រុញ ច្រាន ចាប់​ទាញ និង​ធ្វើ​សេចក្តី​សម្រេច​តាម​អំពើ​ចិត្ត អំពី​ថា​ តើ​អ្វីខ្លះ​ដែល​ហួស​ដែន​កំណត់​។ ​ម្តង​នោះ ពួក​គេ បាន​ដាក់​កម្រាល​រហែក​ពី​លើ​កម្រាល​ព្រំ​ដ៏​វែង​ពណ៌​ក្រហម ដើម្បី​កុំ​ឲ្យ​អ្នក​សារព័ត៌មាន​ធ្វើ​ឲ្យ​ប្រឡាក់។

យ៉ាង​ណា​ក្តី លោក ផៃ​ ស៊ីផាន អ្នក​នាំ​ពាក្យ​ទីស្តីការ​គណៈ​រដ្ឋ​មន្ត្រី​ បាន​ថ្លែង​ថា អ្នក​សារ​ព័ត៌​មាន​រហូត​ដល់​ទៅ ២០០០ នាក់ ​បាន​ចុះ​ឈ្មោះ ដើម្បី​យក​ព័ត៌មាន​ក្នុង​ឱកាស​កិច្ច​ប្រជុំ​អាស៊ាន ហើយ​កម្រិត​សន្តិសុខ​គឺជា​បញ្ហា​រក្សា​សណ្តាប់​ធ្នាប់ និង​សុវត្ថិភាព។ លោក​លើក​ឡើង​ថា៖ «​ការ​បង្ការ​ជា​ការ​ល្អ​ប្រសើរ​ណាស់​»។ លោក​បន្ថែម​ថា ប្រព័ន្ធ​ផ្សព្វផ្សាយ នៅ​នឹង​កន្លែង​កិច្ច​ប្រជុំ កំពុង​ធ្វើ​ការងារ​គួរ​ឲ្យ​កោត​សរសើរ​។ «ពួក​គេ​ផ្សព្វផ្សាយ​យ៉ាង​រលូន ហើយ​ខ្ញុំ​កោត​សរសើរ​ចំពោះ​កិច្ច​សហប្រតិបតិ្តការ​របស់​អ្នក គ្រប់​គ្នា»។

ការ​កំហិត​លើ​ប្រព័ន្ធ​ផ្សព្វផ្សាយ​ គឺ​ស្រប​នឹង​ការ​ខិតខំ​ប្រឹងប្រែង​ របស់​អាជ្ញាធរ ក្នុង​ការ​រក្សា​សណ្តាប់​ធ្នាប់ ខណៈ​ដែល​កិច្ច​ប្រជុំ​កំពូល​ កំពុង​ប្រព្រឹត្ត​ទៅ។ ​ការ​ពង្រឹង​ការ​អនុវត្ត​ច្បាប់ មាន​ដូច​ជា ការ​បិទ​ស្ថានីយ​ប្រេង​ឥន្ធនៈ និង​ហាង ​ការ​បញ្ឈប់​បាតុកម្ម​នៅ​តាម​ផ្លូវ​ធំៗ ការ​ប៉ះ​ទង្គិច​ជាមួយ​នឹង​បាតុករ ការ​រារាំង​ក្រុម​អង្គការ​សង្គម​ស៊ីវិល​កុំ​ឲ្យ​ជួប​ប្រជុំ និង​ការ​ឃុំ​ខ្លួន​ប្រជាជន​ដែល​សរសេរ​អក្សរ SOS ​នៅ​លើ​ដំបូល​ផ្ទះ​របស់​ពួក​គេ ដើម្បី​ឲ្យ​លោក​ អូបាម៉ា មើល​ឃើញ។

យោង ​តាម​អ្នក​សារ​ព័ត៌មាន​ឥណ្ឌូនេស៊ី​ដែល​ស្នើ​សុំ​មិន​បញ្ចេញ​ឈ្មោះ ឲ្យ​ដឹង​ថា លោក Marty Natalegawa រដ្ឋ​មន្រ្តី​ការ​បរទេស​ឥណ្ឌូនេស៊ី​បាន​អញ្ជើញ​ក្រុម​អ្នក​យក​ព័ត៌មាន ពី​ប្រទេស​របស់​លោក​ ឲ្យ​ចូល​រួម​ក្នុង​សន្និសីទ​សារព័ត៌មាន កាល​ពី​ព្រឹក​ថ្ងៃ​អង្គារ​។ ការ​អញ្ជើញ​​នោះ​​ មិន​បាន​បញ្ឈប់​សន្តិសុខ​មិន​ឲ្យ​រាំង​ស្ទះ​ផ្លូវ​របស់​ពួក​គេ​ឡើយ។ លោក​ស្រី​បញ្ជាក់​ថា៖ «​យើង​ត្រូវ​ពន្យល់​ម្តង​ហើយ​ម្តង​ទៀត រហូត​ទាល់​តែ​ទី​បំផុត​ពួក​គេ​ព្រម​ឲ្យ​យើង​ទៅ»។

លោក​ស្រី Ellen Mondez Cruz ដែល​ធ្វើ​ការ​ឲ្យ​កាសែត​ជប៉ុន បាន​រៀប​រាប់​ឡើង​វិញ អំពី​ករណី​ដែល​លោក​ស្រី​បាន​និយាយ​ជាមួយ​នឹង​មន្រ្តី​ហ្វីលីពីន នៅ​ជាន់​ទី១​នៃ​វិមាន​សន្តិភាព។ ​លោក​ស្រី​បន្ត​ថា​៖«សន្តិសុខ​៣​នាក់​បាន​ដើរ​មក​ជិត​យើងហើយ​និយាយ ថា អ្នក​មិន​អាច​នៅ​ទី​នេះ​ទេ» ជា​បញ្ជា​ដែល​នឹង​ត្រូវ​គោរព​តាម ប្រសិន​បើ​មន្រ្តី​ហ្វីលីពីន​នោះ​ មិន​កាត់​សម្តី​សន្តិ​សុខ​ ហើយ​ប្រាប់​សន្តិសុខ​ថា ពួក​គេ​កំពុង​សន្ទនា​គ្នា។ លោក​ស្រី​បន្ត​ថា៖ «បន្ទាប់​មក នៅ​ពេល​យើង​ចប់​ការ​សន្ទនា សន្តិសុខ​បាន​អម​ដំណើរ​យើង​រហូត​ដល់​ជាន់​ផ្ទាល់​ដី ពួក​គេ​ត្រូវ​ប្រាកដ​ថា យើង​បាន​ចេញ​ផុត»។

លោក​ស្រី​បាន​ បន្ថែម​ថា វា​មិន​មែន​តែង​តែ​បែប​នេះ​ឡើយ ហើយ​អ្នក​យក​ព័ត៌មាន​ដទៃ​ទៀត ​ពី​ប្រព័ន្ធ​ផ្សព្វ​ផ្សាយ​ក្នុង​តំបន់ បាន​យល់​ស្រប​ដូច​លោក​ស្រី​ផង​ដែរ។  នៅ​កិច្ច​ប្រជុំ​កំពូល​មុនៗ អ្នក​យក​ព័ត៌មាន​បាន​ថ្លែង​ថា មាន​កន្លែង​អាច​ទៅ​សួរ​មន្រ្តី​បាន ក៏​មាន​ឯកសារ​ផ្សព្វ​ផ្សាយ​ផង​ដែរ ហើយ​ជា​ទូទៅ​ នីតិវិធី​មាន​ការ​រៀបចំ។

​តម្រូវ​ឲ្យ​មាន​ប័ណ្ណ​ឆ្លង​កាត់​ខុសៗ គ្នា​ដើម្បី​ចូល​រួម​ក្នុង​កិច្ច​ប្រជុំ​កំពូល​ខុស​ៗ​គ្នា ​ដោយ​កិច្ច​ប្រជុំ​កំពូល​មួយ​ចំនួន​បាន​ប្រព្រឹត្ត​ទៅ​ក្នុង​បន្ទប់​តែ​មួយ ។ ប៉ុន្តែ ​ដោយ​អស់​ប័ណ្ណ​ឆ្លង​កាត់ ដែល​មាន​ចំនួន​កម្រិត អ្នក​យក​ព័ត៌មាន ដែល​បាន​ចុះ​ឈ្មោះ​យក​ព័ត៌មាន អំពី​កិច្ច​ប្រជុំ​កំពូល​អាស៊ាន អាច​មិន​បាន​ចូល​ក្នុង​កិច្ច​ប្រជុំ ដោយ​ឈរ​នៅ​ជាន់​ទី១​នៃ​វិមាន​សន្តិភាព ដោយ​ព្យាយាម​សួរ​សំណួរ​មន្រ្តី ទាំង​បរាជ័យ ពេល​ពួក​គេ​ដើរ​ចេញ​ពី​ជណ្តើរ​យន្ត៕ TK

This content has been locked. You can no longer post any comments.
Show/hide comments
...
ទោះបីកិច្ចប្រជុំកំពូលអាស៊ានលើកទី២១ កម្ពុជាជាម្ចាស់ផ្ទះ តែបែរជាកម្ពុជាមានការហាមឃាត់
អ្នកសារពត៌មានមិនអោយចូលយកពត៌មានទៅវីញ ហ្នឹងហើយគេហៅថាការរំលោភសិទ្ធិអ្នក
សារពត៌មាន ចឹងហើយបើនិយាយពីការរំលោភសិទ្ធិមនុស្សទៅលើប្រជាពលរដ្ឋខ្មែរវិញគឺ ១០០
ភាគរយ!!!
Ratha on November 21, 2012 Report
vote down vote up Votes: 0
...
ទោះបីកិច្ចប្រជុំកំពូលអាស៊ានលើកទី២១ កម្ពុជាជាម្ចាស់ផ្ទះ តែបែរជាកម្ពុជាមានការហាមឃាត់
អ្នកសារពត៌មានមិនអោយចូលយកពត៌មានទៅវីញ ហ្នឹងហើយគេហៅថាការរំលោភសិទ្ធិអ្នក
សារពត៌មាន ចឹងហើយបើនិយាយពីការរំលោភសិទ្ធិមនុស្សទៅលើប្រជាពលរដ្ឋខ្មែរវិញគឺ ១០០
ភាគរយ!!!
Ratha on November 21, 2012 Report
vote down vote up Votes: 0
busy