Headlines:

ជនជាតិ​ភាគតិច​ព័រ​ព្រួយ​បារម្ភ​ពី​ការ​បាត់​ដី​ចម្ការ​វិល​ជុំ​ដោយ​ការ​រំលោភ



121123_06
ជន​ជាតិ​ភាគ​តិច​ នៅ​ក្នុង​ខេត្ត​រត​ន​គិរី កំពុង​ជញ្ជាត់​ត្រី កាល​ពី​ពេល​កន្លង​មក​។ រូបថត សហ​ការី (ឯកសារ)

ប្រជា​ពលរដ្ឋ​ជន​ជាតិ​ដើម​ភាគ​តិច​«ព័រ» ចំនួន​១៦០​គ្រួសារ​កំពុង​ប្រឈម​នឹង​ការ​បាត់​បង់​ដី​ព្រៃ​ចម្ការ​វិល​ជុំ ​ដែល​ពួក​គាត់​កំពុង​អាស្រ័យ​ផល ​បន្ទាប់​ពី​ក្រុម​ហ៊ុន​ឯក​ជន​មួយ​បាន​បោះ​បង្គោល​រំលោភ​យក​ចម្ការ​វិល​ជុំ ជាង​២​ហិកតា​នៅ​ឃុំ​តា​តោក ស្រុក​សំឡូត ​ខេត្ត​បាត់​ដំបង។

លោក ឆឺត ឈន​ អាយុ​៤៣​ឆ្នាំ ជា​តំណាង​សហគម​ជន​ជាតិ​ដើម​ភាគ​តិច​ព័រ​ក្នុង​ខេត្ត​បាត់ដំបង​បាន​អះ​អាង​កាល​ពី​ថ្ងៃ​ព្រហស្បតិ៍​ម្សិលមិញ​ថា ​ក្រុម​ហ៊ុន​មួយ​ឈ្មោះ​រ័ត្ន​ សម្បត្តិ​ ដែល​បាន​ទទួល​ដី​សប្បទាន​សេដ្ឋកិច្ច​ពី​រដ្ឋាភិបាល បាន​ធ្វើ​ការ​បោះ​បង្គោល​ចូល​ដី​ចម្ការ​វិល​ជុំ​របស់​ជន​ជាតិ​ព័រ​ចំនួន​២ ហិកតា។

លោកឆឺត ឈន បាន​បញ្ជាក់​ថា​៖«ជន​ជាតិ​យើង​១៦០​គ្រួសារ​រស់​នៅ​ពឹង​លើ​អនុ​ផល​ព្រៃ​ ឈើ​តាម​លក្ខណៈ​ប្រពៃណី​ពី​ចម្ការ​វិល​ជុំ​នេះ។ បើ​បាត់​វា​ទៅ ​យើង​ដូច​ជា​បាត់បង់​អ្វីៗ​ទាំង​អស់។ ប៉ះ​ពាល់​ដល់​ជីវភាព មិន​ដឹង​រស់​យ៉ាង​ម៉េច​នោះ​ទេ»។

លោក ​ឆឺត ​ឈន​ បាន​បន្ថែម​ថា ​សហគមជន​ជាតិ​ដើម​ភាគ​តិច​ព័រ​របស់​ពួក​គាត់​ចាប់​មាន​បញ្ហា​ដីធ្លី​ជាមួយ​ នឹង​ក្រុម​ហ៊ុន​មួយ​នេះ​តាំង​តែ​ពី​ឆ្នាំ​២០០៨​មក ហើយ​បាន​ដាក់​ពាក្យ​សុំ​ជួយ​អន្តរាគមន៍ និង​រក​ដំណោះស្រាយ​ពី​អាជ្ញាធរ​ខេត្ត​ចំនួន​៣ដង​មក​ហើយ ប៉ុន្តែ​គ្មាន​បាន​លទ្ធ​ផល​នោះ​​ទេ។ លោក​ឆឺត ឈន​បាន​ថ្លែង​ថា ​«អាជ្ញាធរ​បាន​ត្រឹម​តែ​សន្យា​ថា​ចុះ​មក​វាស់​វែង​ដី​ព្រៃ​ឲ្យ​ជន​ជាតិ​ភាគ តិច​យើង​នៅ​ខែ​វិច្ឆិកា​នេះ​ តែ​ជិត​ដាច់​ខែ​ទៅ​ហើយ ​មិន​ទាន់​មក​ទៀត។ យើង​បារម្ភ​ណាស់»។ លោក​ក៏​បាន​បន្ត​ផង​ដែរ​ថា ​ក្រៅ​ពី​អាជ្ញធរ​ប្រជាពលរដ្ឋ​ក៏​បាន​ស្វះ​ស្វែង​រក​អន្តរាគមន៍​ពី​អង្គ​ការ ក្រៅ​រដ្ឋាភិបាល​ផង​ដែរ។

លោក​យិន​ ម៉េងលី អ្នក​សម្រប​សម្រួស​សមាគម​ការ​ពារ​សិទិ្ធ​មនុស្ស​អាដហុក​ខេត្ត​បាត់​ដំបង​ បាន​ឲ្យ​ដឹង​ថា​ លោក​កំពុង​តែ​ចុះ​ធ្វើ​ការ​ស៊ើប​អង្កេត​ពី​បញ្ហា​នេះ​ និង​រក​ឃើញ​ថា​ក្រុម​ហ៊ុន​នេះ​បាន​បោះ​បង្គោល​ចូល​ដី​ព្រៃ​ចម្ការ​វិល​ជុំ​ ចំនួន​២​ហិកតា​។ លោក​យិន ​ម៉េងលី​បាន​និយាយ​ថា៖ «សហគមន៍​បាន​ឲ្យ​ក្រុមហ៊ុន​ដក​បង្គោល​ចេញ​វិញ​ តែ​គេ​មិន​ដក​។ វា​ពិបាក​ណាស់​បើ​ពួក​គាត់​ដក​ខ្លួន​ឯង ​នោះ​នឹង​ប្រឈម​នឹង​ការ​ជាប់​គុក​ច្រ​វាក់​ដោយ​សារ​តែ​គេ​ចោទ​ថា​បំផ្លាញ​ ទ្រព្យ​សម្បតិ៍​អ្នក​ដទៃ​។ មួយ​វិញ​ទៀត​ក្រុម​និស្សិត​ស្ម័គ្រ​ចិត្ត​ក៏​មិន​បាន​វាស់​ឬ​ឆ្កៀល​ដី​ឲ្យព​ លរដ្ឋ​ដែរ»។

ភ្នំពេញ​ប៉ុស្តិ៍មិន​អាច​ទាក់​ទង​ក្រុម​ហ៊ុន​រ័ត្ន​សម្បត្តិ​សុំ​ការ​បំភ្លឺ​បាន​ទេ​កាល​ពី​​ម្សិល​មិញ។​

ទោះ​យ៉ាង​ណា​លោក​ ហែម​ សុផល ​អភិបាល​ស្រុក​សំឡូត​ បាន​អះ​អាង​ថា​ អាជ្ញាធរ​បាន ចុះ​ទៅ​ពិនិត្យ​ផ្ទាល់​ដល់​កន្លែង ហើយ​ឃើញ​ថា​ប្រជាពលរដ្ឋ​នៅ​តំបន់​នោះ​មាន​ការ​ប៉ះពាល់​តិច​តូច​ប៉ុណ្ណោះ។ លោក​សុផល ថ្លែង​ថា៖ «អាជ្ញាធរ​បាន​ទៅ​ហើយ​ ប៉ុន្តែ​ការ​បោះ​បង្គោល​របស់​​ក្រុម​ហ៊ុន​នោះ​វា​មាន​ការ​ប៉ះ​ពាល​ដល់​ ដី​ចម្ការ​វិល​ជុំតិច​តូច​ប៉ុណ្ណោះ​»។

ទាក់ទង​ទៅ​នឹង​ការ​ចុះ​វាស់​វែង​ រប​ស់ក្រុ​មនិស្សិត​ស្ម័គ្រ​វិញ​ លោក​ហែម សុផល​បាន​ថ្លែង​ថា​ក្រុម​និស្សិត​មិន​ទាន់​បាន​ចុះ​ទៅ​តំបន់​នោះ​នៅ​ឡើយ​នោះ ទេ។

លោក ​សៀន​ស៊ុត​ថង​ អតីត​អភិបាល​រង​ខេត្ត​បាត់​ដំបង​ទទួល​បន្ទុក​ដោះស្រាយ​វិវាទ​ដី​ធ្លី​បាន​ មាន​ប្រសាសន៍​ថា​ក្រុមហ៊ុន​រ័ត្ន​សម្បត្តិ​បាន​ទទួល​ដី​សប្បទាន​សេដ្ឋកិច្ច​ពី​រដ្ឋាភិបាល​ចំនួន​៥០០០​ហិកតា​ដើម្បី​អភិវឌ្ឍន៍​ដំណាំ​កសិឧស្សាហកម្ម។

សូម​បញ្ជាក់​ថា ទំហំ​ដី​នេះ​ក៏​ស្ថិត​នៅ​ក្នុង​ខេត្ត ពោធិសាត់​ផង​ដែរ​មួយ​ផ្នែក​ផង​ដែរ៕

This content has been locked. You can no longer post any comments.
Show/hide comments
busy